Эрзянь-мокшонь раськень драматической театрасо ютась кенярксчинь промкс. Сон алтавсь Эрзянь ды мокшонь кельтнень весероссиянь чинтень. Весе инжетнень театрав совамсто гайтев моросо вастсь «Торама» фольклорной ансамблясь. Тей сакшность Саранскойстэ ды районтнэстэ тиринь келень тонавтыцятне, культурасо ды СМИ-сэ важодицятне.
Минек республикасо Эрзянь келень чинь тешкстамось ушодовсь 1993 иестэ, сон алтави ученоенть, педагогонть, профессоронть, лингвистэнть А.П. Рябовонь ледстнемга (1894–1938).
Лембе вал марто пурнавозтненень пшкадсь МР-нь Правительствань Председателень тевтнень топавтыцясь Галина Лотванова.
– Российской Федерациясо теевсь коекс тешкстамс Эрзянь ды мокшонь кельтнень чинть. Ды те пек паро. Ули мелем евтамс покш сюкпря тыненк эрьвантень – тонавтыцянтень, воспитателентень, библиотекарентень, культурасо важодицянтень. Тынь вансттадо минек покштянок-бабанок историянть, койтнень-кирдатнень, культуранть, келенть.
Койсэнь, РФ-со арась регион, косо бу авольть эря эрзят ды мокшот. Сынь паро мельсэ бажить ванстомс се питнейчинть, конась лемдеви раськень культуракс. Регионтнэсэ важодить национально-культурной малав 40 автономият. Сынь ютавтыть вастовомат, кенярксчить, кирдить кеме сюлмот Мордовиянть марто. Миненек эряви лездамс тенст.
Республикасонок тевс нолдави государственной программась, конась алтави тиринь кельтнень ды культуранть ванстомантень. Сонзэ пингстэ ютавттано ламо лезэв тевть. Те аламо. Эряви тенек вейсэндявомс ды ванстомс сень, мезе кадсть тенек покштянок-бабанок. Сюкпря важодеманк кисэ, эрьвась эсь профессиясонзо теи покш тев – вансты минек раськень историянть, – кортась Галина Алексеевна.
МР-нь Прявтонть кармавтоманзо коряс музыкань искусствасо ды эрзянь, мокшонь раськень культуранть кастомань-кепетемань кисэ «МР-нь заслуженной артист» лемсэ казевсть «Торама» фольклорной ансамблянь морыцятне Александра Ломачкина, Валентина Миркина ды Татьяна Храмова. СВО-нь передовойсэ тейтертне невтсть малав сядо концертт. Кепедсть цератнень боевой духост.
«МР-нь заслуженной артист» лем максозель Эрзянь-мокшонь раськень театрань артистэнтень Анатолий Нуштайкиннэнь. Те кулянть весе вастызь виев цяпамосо. Анатолий чачсь ды кассь Орданьбуень Пиксяська велесэ. Эрзянь келенть вечксы ды парсте содасы. Прядызе Саранскоень культурань училищань эстрадань отделениянть. Сон 28 иеть роботы Нацтеатрасо, налкси эрьва кодамо спектаклясо. Пек вечки налксеме эрзянь путовкстнэсэ, покш мельсэ невти велень ломантнень образтнэнь, истятнэнь, кода сонсь ды малавиксэнзэ.
МР-нь Почетной грамотасо казевсть МР-нь культурань, национальной политикань, архивень тевень министрань полавтыцясь Александр Кочеваткин, Саранск ошонь «Информационно-методический центр» МУ-нь этнокультурной образованиянь отделэнь прявтось Мария Вельмякина, Мордовиянь народной телевидениянь общественно-политической программань отделэнь обозревателесь Лина Буянкина. «Умарина» морамонь ды киштемань государственной ансамблянь прявтонтень Наталья Касаткинанень максовсь МР-нь Прявтонь Благодарность.
Казезтнень ютксо истя жо «Эрзянь правда» газетань специальной корреспондентэсь Мария Яксяргина. Сон малав 40 иеть важоди минек редакциясо. Мария Петровна казевсь МР-нь Почетной грамотасо.
Евтатано тензэ пси поздоровт!
М. П. Яксяргина чачсь Покш Березникбуень Чугырвелесэ. 1983 иестэ школань прядомадо мейле тонавтнесь Саранскоень 3-це № ГПТУ-со машинисткакс. Кавто иеть важодсь гражданской оборонань штабсо. Мейле сась «Эрзянь правдав». Кода ледстни, понгсь прок тиринь велев: перьканзо весе эрзят, весе эсь ютковаст ялга-ялгацек, пшкалесть вейкест-вейкест туртов лемсэ, аволь тетялемсэ. Икеле компьютерт арасельть. Сынст таркас ульнесть печатамо машинкат. Эрявсь пек пштистэ ваномс, а нолдамс кодаткак ильведевкст. Газетась лиснесь недлязонзо колмоксть. Се шкасто сеедьстэ эрсесть пленумт, съездт, материалтнэде пек ламольть. Лиясто натой редакциясо кирдевиль талай чокшнес. Истя жо эрявсь ютавтомс текстт. Машинисткатнень ваксс озыль ломань, кона ютавтыль, мельганзо эрявсь куроксто ды ильведевкстэме печатамс. Кабинеттнэсэ аштесть зярыя важодицят, машинкатнень эйстэ гайтесь кие соды ков марявсь. Компьютертнэнь самост марто тевесь пек шождалгадсь.
Кенярксчинть кувалма поздоровт евтась МР-нь Государственной Собраниянь депутатось Евгений Ледяйкин:
– Сюкпря евтавлинь эрзянь ды мокшонь кельтнень тонавтыцятненень, газетасо ды журналсо важодицятненень, сынь топавтыть стака тев, пачтить минек келенть пек васов, ветить покш важодема. Госсобраниянть пельде сюкпря весе раськентень, республикань томбале эриця эрзятненень-мокшотненень. Мезть сепомс, келесь ванстови стакасто. Аламо кортыть. Велетнестэ весе туить ошов. Эряви ванстомс келенть эстенек, кортамс эйкакшонок марто.
Эрзянь ды мокшонь раськень регионъютконь общественной вейсэндявксонь прявтось Юрий Мишанин пачтясь, иеде иес Эрзянь ды мокшонь кельтнень весероссиянь чинть тешкстыть седеяк ламо регионсо. Те кецявты. Маласо шкастонть кенярксчить ютыть Пензань, Саратовань, Ульяновскоень областтнесэ.
Видео вельде лембе поздоровт кучсть Якутиясто, Московсто, Нижней Новгородсто ды натой США-сто – содавикс хоккеистэсь Александр Овечкин евтась кенярксчинть кувалма паронь арсемат.
Покшчись поладовсь мазый концертсэ. Сцена лангсо ульнесть «Умарина» морамонь ды киштемань государственной ансамблясь, «Мерема» этно-фолк группась, Мордовиянь филармониянь солистэсь Андрей Бочканов.
Татьяна Маторкина.
Фототне Егор Горинэнь