Вторник, марта 19, 2024
Важное

Якшамковонь 25-це чистэ Рузонь Православиянь Церьковась ледстни Татиана Римская майсицянть (мученицанть). Татьянань чистэнть, 1755 иестэ Елизавета Петровна инязоравась тешкстась Московонь университетэнь панжомадо Указ. Самай се шкастонть саезь Иневанькс Татиана ловови студенттнэнь ванстыцякс, сыненст лездыцякс.

«Татиана» кезэрень лемесь грекень кельстэ ютавтови кода «устроительница». Масторсонок Студентэнь чись тешкстави 2005 иестэ саезь, сестэ кемекстазель «О Дне российского студенчества» Президентэнь Указось.

Кода эрить ды тонавтнить неень шкань студенттнэ? Теде миненек ёвтнить редакциянь инжетне.

Катя, ёвтнек эсь прядот. Косо чачить-касыть?

– Чачома таркам – Отяжбуень Дюрькинась. Весе эйкакшпингем ютавтыя те эрзянь велесэнть, косо свалшкане гайгсь тиринь келесь, покш читнестэ пидесть-пансть коень каванямкат ды эрямонтень секе-тев совавтовсть кезэрень койтне-кирдатне. Тонавтнинь Дюрькинань школасо, те шкадонть нейгак ледстнян лембестэ. Сюконян тонавтыцятнень туртов – превей, чевте седей ды покш ойме марто ломанть, сынь содылизь ды вечкилизь тевест. Макссть минек туртов кеме содамочить, невтизь виде эрямо кинть ды пачтясть тенек: тонавтнемась – те валдо ды мелень саиця тев. Школав молеманть свал учинек, те таркасонть маринек прянок, теке мерят, омбоце кудосо. Тонавтыцянок лездасть тенек невтемс эсь прянть, муемс эсенек кинть-янонть. Покш сюкпря сыненст тень кисэ! А ёвтавикс ризкс марто вастыя кулянть – тиринь школанок пекстызь: велесэнть аламолгадсть эйкакштне. Кадовсть ансяк лембе ледстнемат те шкадонть.

Ков молить тонавтнеме школанть прядомадо мейле ды косо ней тонавтнят?

– Школадо мейле поладыя тонавтнемам М.Е. Евсевьев лемсэ МГПУ-нь филологиянь факультетсэ. Пек покш тарка эрямосон свал сайсь ловномась. Сон кандсь мельспарояк, лезкскак. Пек вечкилия сёрмадоманть, парсте маринь прям рузонь ды эрзянь келень ды литературань уроктнесэ. Тонавтнеманть кочкия седеень коряс, эзинь арсе ды кавтолдо, эзинь вешне, мезесь канды седе ламо материальной парочить. Молинь тов, ков тердсь седеесь, ды, нама, зярдояк эзинь янксе тень кувалма. Бакалавриатсо тонавтнема иетне ливтясть прок вейке чи. Студентэкс улема шкась пешксель тевде, вадря ёжодо ды мельде, эрямонь паро лувдо. Минь важодинек ды кецнинек, явинек тонавтнемантень покш мель.

Тонавтнема шкань перть сёрмадынь сочиненият, очеркть, научной статьят, нолдыя шкинеманть оляс. Теньсэ пек тень лездась филологиянь наукань кандидатось, МГПУ-нь тиринь келень ды литературань кафедрань доцентэсь Елена Петровна Прокаева. Арсян, ансяк сонзэ содамочитнень, опытэнть ды ёрокчинть лангс нежедезь, мон теинь эскельксэнь шкинемасо. Неть эскелькстнэ, нама, яла кандтнесть цётамот – пелькстамотнесэ ды конференциятнесэ изнявксон тешкставсть.

Вете иень ютазь молинь магистратурас – домкалгавтомс содамочитнень филологиянь наукатнесэ. Мейле поладыя тонавтнеманть Гуманитарной наукань научно-исследовательской институтонь аспирантурасо. Кочкия «Фольклористика» специальностенть. Вишка шкасто саезь ульнесь мелем содамс неть тамашань койтнеде-кирдатнеде. Ледстнян, кода бабам пансесь тундонть вастомга чапаксонь норовжорчт, ильтясть иень те шканть мазый моро марто, ульцятнева кандсть наряжазь килей чувто.

Койде-кирдадо, кувака мелень саиця мородо пешксе эрямось велетнесэ. Косто саевсть неть койтне? Мезе сынь кандыть? Мезень кис ютавтовить? Фольклорось канды минек покштятнень-бабатнень содамочинь виенть. Те историянок, культуранок, конась аламонь-аламонь туи сыре ломантнень марто. Пек паро улевель бу ванстомс сонзэ ды пачтямс од ломантнень туртов.

Ней тонавтнемась моли дистанционной лувсо. Те шкань вешема ды минек туртов сон овсе аволь пирявкс. Важодемась юты пек парсте. Колмо иень ютазь икелень карми аштеме тев – идемс кандидатской диссертациянть. Пек бажан сонзэ топавтомс.

Кода содатано, уш студентэнь шкасто ушодыть важодеме 10-це каналонь «Од пинге» передачасо. Мейсэ вечкеви те тевесь?

– Журналистикань тевесь свал тердсь, сайсь мель. Те – од ёжот, ломань марто кортамот, од таркат, теевкст, шкинема. Теке марто вечкса тиринь эрзянь келем, бажан кортамс эйсэнзэ, секскак кочкия национальной журналистикасо важодеманть. Покш бажамом – невтемс, кода эри раськень культурась ней, кода ванстови келесь, кодат изнявксонзо эрзянь раськенть неень шкане. Вете иень перть ардтнян эрьва кодамо таркава, тееван содавиксэкс ломантнень марто ды видеосюжеттнэнь вельде пачтян сень, мезе неян. Тевесь пек вечкевикс ды покш мелем важодемс седе тов.

Монь тонавтнемам ды важодемам сюлмазь вейс. Тонавтнян келенть ды те лезды монень важодемасонть, седе домкасто тееван содавиксэкс историянть ды культуранть марто – те лезды панжомс неть тематнень сюжетэст седе парсте.

Якшамковонь 25-це чистэ тешкставсь Студентэнь чись. Кода сонзэ яла ютавтнят?

– Те чись монь туртов свал вечкевикс. Ледстнян тонавтнема иетнень, конатне кадовсть удалов, тонавтнема шкань оятнень, сынь свал седейсэнь. Гайневтнян ялгатнень туртов, ёвтан тенст лембе валт ды вейсэ ледстнетяно студентэнь а стувтовикс шкадонть. Весе студенттнэнень ёвтан паро валт те чинть кувалма. Аштеде мельспаросо тонавтнемань эрьва чинть коряс, эдь те шкась – теке ёвксонь, содамочитне – те паро юр, конань лангсо ашти вадря эрямось!

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».