Кочкурбуень Сурвеленть маласо ушодызе важодеманзо «Орбита» эйкакшонь шумбрачинь витемань лагересь. Тесэ панжовсь «Эряк, тиринь кель!» тонавтнемань сменась. Лагерев састь 32 эйкакшт кода эсенек республикасто, истя жо лия регионсто: Московонь, Владимирэнь ды Пензань областтнестэ. Эйкакштнень марто важодить кавто тонавтыцят ды кавто вожатойть. «Эрзянь правдась» пачколесь тов инжекс, пачтятано, кода эри лагересь, кода тов понгомс.
– «Эряк, тиринь кель!» лагерентень понгомга эрявсь тиринь кельсэ сермадомс «Монь тиринь енксом» теманть коряс сочинения. Эрьвась кочкась мезде сермадомс – веледензэ, оштонзо. Сермадовкстнэнь эрявсь кучомс «Мира» образованиянь центрав. Тосо ваннызь ды кочкизь сехте вадря автортнэнь, тиринь келень ды масторонь вечкицятнень. Ды вана пурнавинек весе вейс. Эрьва чистэ ютавттано эрьва кодат мельстуиця занятият. Тонавтнетяно морот, стихть, киштемат. Кой-кить уш содыть эрзянь ды мокшонь морот. Сынь невтизь пряст сцена лангсо лагерень панжомсто. Эйкакштне састь оймсеме раськень оршамопель марто, те седеяк мазылгавтызе сменанть.
Ветятано эрзянь ды мокшонь келень коряс занятият, конатнесэ бажатано вельмевтемс эйкакштнень потсо толнэ, кадык явить тиринь келентень башка мель. Нама, аволь весе кармить кортамо, улить келень парсте чарькодицят. Содамс эсь ундоксот, раськеть – те пек паро. Маряви, неень шкане ломантне кармасть вешнеме ундоксост, а виздить, эрьва косо евтнить эйстэдест. Те неяви эйкакштнень коряскак. Сынь тейнить нурька видеот, косо невтить коенек-кирданок, путыть интернетс. Свал тенст кортан: мольтядо велев сырькаенк-покштянк туртов, тееде мельстуиця нурька видеот, максодо кевкстемат. Весе те пек эряви! – тешкстась «Тавла» образованиянь центрань – 17 № школань эрзянь келень тонавтыцясь Ольга Дорофеева.
Ольга Сергеевна ветеце ие важоди этнолагерьсэ. Валонзо коряс, стака маряви ансяк васенце читнестэ, мейле весе теевить содавиксэкс, тонадыть. Эйкакштне евтнить, костонь сынь, косто ундоксост. Саемга, келень занятиятнесэ мелезэст тукшны ванномс диалекттнэнь, кодамо велесэ кода мерить те эли тона валонтень. Тонавтницятне сеске ледстнить бабаст кортавксост. Ольга Дорофеевань натой чачсь мелезэ отпусконь шкасто Отяжбуень Селища эсензэ велесэ пурнамс вейс сазь эйкакштнень ды ютавтомс мартост эрзянь келень занятият.
Омбоце тонавтыцясь – Марина Миронова, сон важоди «Высота» образованиянь центрань – 15 № школасо. Марина Николаевнань малав комсь иеть тердтнить ветямо этнолагерень сменатнень.
– Весе те шканть перть этнолагеренть важодемасо ульнесть ламо полавтовомат. Васня пурнылизь ансяк тиринь келень олимпиадань изницятнень. Седе тов сакшность малав сядо эйкакшт, конат весе кортыть эрзянь, мокшонь эли татаронь кельтнесэ. Ламо иеть лагересь важодсь «Сивиньсэ». Ней ветеце ие сменась панжовкшны «Орбитасо». Тесэнь лувтне пек парт, инфраструктурась полавтозель. Корпустнэсэ эйкакштне эрить нилень-нилень, эрьва нупальсэ санузел, душ. Парсте теезь столовоесь, андыть вадрясто. Ули медпункт. Клубсонть ютавттано весе вастовоматнень. А кодамо пертьпельксэсь! Вирь, касыть пичеть, аволь васоло чуди Сурась, улить оймсемань таркат. Весемесь теезь истя, эйкакштненень улевель паро. Кой-конатне уш аволь васенцеде сыть этнолагерев. Те корты вейкеде – мелезэст тукшны. Башка валт евтавлинь «Мира» образованиянь центрадонть. Нама, кирдить мартонок сюлмот. Минь весементь толковасынек, мезенть эряви полавтомс, кодат одкстомтомат теемс этнолагеренть важодемасо. Арсетяно ютавтомс вастовомат писательтнень, ученойтнень, артисттнэнь марто. Пек учотано Павел Мигуновонь, кона ютавты «Тюштянь налксемат», – евтнесь Марина Миронова.
Кортнинек эйкакштнень мартояк.
– Мон тей сынь Ицялбуень Сакулька велестэ. Семиясонок ниле эйкакшт. Тетям-авам, сырькаень-покштян весе кортыть эрзякс, мондень башка. Тонавтнян Береговые Сыреси велень школасо, прядыя 8-це классонть. Этнолагерьсэнть мон колмоцеде. Пек тукшны мелезэнь, муинь ламо ялгат, – пачтясь Вика Пискайкина.
Олег Деров сась Орданьбуестэ. Сон прядызе 5-це классонть. Церыненть авазо Кеченьбие велестэ, тов сеедьстэ ардтни инжекс бабанстэнь. Этнолагерьсэнть омбоце ие, вечкеви тензэ. Тестэ мусь од ялгат, тесэ ве минутаяк а ютни стяко.
Настя Латышева сась Саранскойстэ, ундоксонзо Отяжбуень Селищасто. Тейтернесь видькстась, пек бажи тонавтнемс эрзянь келенть ды маштомс кортамо.
«Эрзянь правдань» прявт редакторось Марина Девятова евтнесь газетадонть, кода сон пурнави, кодат сермадовкст лиснить, кить геройтне. Тердсь варчамс виест сермадомань тевсэнть. Казсь весенень газетат. Истя жо этнолагерев сакшность «Мокша» ды «Якстерь тяштеня» журналонь важодицятне.
Теке жо чистэнть «Орбита» лагерев пачколесть паро инжеть – МР-ва Россиянь МЧС-нь ГУ-нь важодицятне. Пожаронь мадстемань покш машинась лоткась видьстэ лагерень куншкас.
– Эрьва иестэ лагерень сменатнень марто ютавттано пожаро-безопасной оймсемань коряс занятият. Евтнетяно, кода тевс нолдамс толонь мадстемань средстватнень. Ютавттано пожарно-спасательной пропаганда: кода ветямс прянть, кода а нолдамс зыянонть, мезе теемс, зярдо кирвазсь тол, – кортась МР-ва Россиянь МЧС-нь ГУ-нь Лямбирень райононь ды Кочкурбуень надзорной тевень ды профилактической тевтнень коряс отделэнь прявтось, внутренней службань полковникесь Д.А. Куколин.
Сонзэ валонзо поладынзе теке отделэнь старшей дознавателесь, внутренней службань капитанось Р.А. Аникин:
– Кочкурбуесэ важодить «Орбита» ды «Энергетик» лагертне. Весе сынь вановттонок ало. Течи невтяно противопожарной инструктаж, евтнетяно пожаронь мадстемань техникадонть, кода ветямс прянть зыянов шкане. Теде башка, те – профилактической ды профориентационной тевть. Паряк, кияк покшсто касозь, кочкасы эрямонь тевекс пожарноень профессиянть.
Эйкакштне свал явить мель спецтехникантень. Вана нейгак, варчасть валномс ведь, кузнесть кабинас ды натой машинанть пряс.
Кода неинек, «Эряк, тиринь кель!» этнолагерьсэнть эрямось моли мельстуезь, эрьва чи ютыть лезэв вастовомат. Тонавтыцятне путыть весе оймест ды виест, штобу сменась туевель эйкакштнень мельс, вельмевель седейсэст тиринь келентень ды раськентень вечкема.
Татьяна Маторкина