Вторник, марта 19, 2024
Важное

Марина Фёдорова (тейтерьксэнь фамилиязо Денисова) чачсь ды кассь Отяжелень райононь Сабанцелесэ. Эйкакшпингстэ саезь сон вечкиль эйкакшонь ваномо ды мартост налксеме, секскак сюлмизе эрямонзо те тевенть марто. Школанть прядомадо мейле мольсь тонавтнеме М. Е. Евсевьев лемсэ пединститутов.

Сонзэ прядомадо мейле тусь Челяба ошов, косо ниле иеть важодсь полициясо. Ансяк ялатеке седеезэ тердсь кудов, эйкакш малас, ды истя лисськак. Мирдензэ марто састь Саранск ошов ды ней уш кемготово иеть авась важоди воспитателекс ошонь 5 № эйдень кужосо.

Аволь умок Саранск ошсо ютась «2023 иень Этновоспитатель» пелькстамось. Марина Николаевна кувать апак арсе кармась эйзэнзэ анокстамо. Важодсь кавто недлят, ризнэсь ды кавтолдсь, лиси а лиси мезеяк. Паро, маласо ульнесть ялганзо ды Лариса Валерьевна Антонова – эйдень кужонь прявтось. Марина Николаевна ёвты тенст покш сюкпря лездамонть кис.

Васенце этапонтень тейсь визитка, тов авась сёрмадсь валморот, тейсь видео, рузонь кельсэ сёрмадсь эседензэ аволь покш ёвтнема. Ёвтнесь «Светёлка» кужонть ланга, конасонть сон эйкакштнень тонавты эрзянь келентень. Кенярдыть «Эрзяночка» кужонтень аволь ансяк эйкакштне, истя жо тетятне-аватнеяк. Кадык сынь а содасызь келенть, ялатеке ули покш мелест сёрмадстомс эйкакшост те куронтень. Кортыть: эйкакштненень пек вечкевить Марина Николаевнань ёвтнеманзо эрзянь кельде, эрзянь ломантнеде ды койтнеде-кирдатнеде.
Аволь эрьва эйдень кужосо улить истят курот ды воспитательть, конатне бажить кандомс эрзянь коень-кирдань сюпавчинть седе тов.
Эйдень кужоськак а кадновкшны удалов, истя жо бажи ванстомс эрзянь койтнень. Неень шкане моли оршамопельтнень одкстомтомась. Те тевенть топавтыть эйдень кужонь важодицятне ды Марина Николаевна. Тевенть прядомадо мейле сынь арсить ёвтнемс теде эйкакштненень. Эйсэст тонавтомо ушоды вете иестэ саезь, моры морот, ловны валморот, ёвтни эрзянь койтнеде-кирдатнеде. Весе занятиятне ютыть мазылгавтозь нупальсэ, тосо ладсезь кезэрень чакшт, пенчть-вакант. Марина Николаевна ашти мельспаросо: тонавты аволь ансяк рузонь, истя жо татаронь, армянонь эйкакшт. Кенярды: ули изницязо школань олимпиадасо. Эйдень кужосо тонавтсь эйсэнзэ эрзянь келентень ды важодемазо эзь ёма стяко, цёрынесь сайсь васенце тарка.

Омбоце этапонтень воспитателесь анокстась занятия, конанть ютавтызе жюринть икеле, невтизе видеонзо. Юткошкасто авась вечки кодамо, стамо, тееме эрьва кодат налкшкеть, секскак колмоце этапсто невтсь мастер-класс, тейсь «Столбушка» эрзянь няка, конась пек вечкевсь жюринтень.

Пелькстамосонть весемезэ ульнесть колоньгемень воспитательть, финалонтень эйстэдест кочказельть вете, косо ульнесь Марина Николаевнаяк.
Ней весе эйдень кужонть марто Марина Николаевна аноксты республиканской пелькстамонтень. Тов воспитателесь сёрмадсь эссе, конанть ютавтызе эрзянь кельс патязо Надежда Николаевна Сайгушкина. Арсетяно Марина Николаевнанень изнявкст сыця пелькстамосонть. Седе товгак вечкемс тиринь келенть, тонавтомс эйзэнзэ эйкакштнень!

Яна Кудашкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».