Неть читнестэ минь пачколинек Чаунзабуень Покш Эрьмезенкав. Тесэ важоди «Ремезенское» ООО-сь, конань прявтсо ламо иень перть эрзянь церась, «ООО МАПО и К» ТНВ-нь генеральной директоронь полавтыцясь Александр Борисович Ботайкин. Неень шкасто предприятиясонть, кода республикань ды целанек масторонь велень хозяйствань енкссонть, моли сюронь нуемась. Норовось тедеде чачсь вадря, ансяк читне аштест манейть, штобу урядамс сонзэ шкастонзо.
– Нуеме лисинек июлень 18-це чистэ. Ушодынек озимой товзюронть пивсэме. Аволь умок лисинек кснавонть урядамо. Сондензэ видезь 200 гектарт, сон уш кенерсь ды, бути кадомс седе тов, карми певереме, – евтни Александр Борисович. – Невтевкстнэ а берянть. Кснавось гектарстонть саеви косо-бути 50 центнерт. Озимой товзюроськак чачсь вадря. Вейке паксясь макссь 58 центнерт гектарсто, омбоцесь – 50. Арсетяно, среднейстэ гектарсто лиси малав 50 центнерт. Сюрось коське, летькезэ весемезэ ансяк 13 %.
Озимой сюродонть «Ремезенское» ООО-нь паксятнесэ видезь 517 гектарт. Те недлянь пондельникентень сюрось пивсэзель 300 гектартнэнь лангсто. Весемезэ жо, кода евтнесь предприятиянь прявт агрономось Андрей Александрович Алексин, сюротнень, тикшетнень ды лия культуратнень алов хозяйствасонть явозь 2223 гектарт. Озимой товзюродонть ды кснавдонть башка видезь 436 гектарт шуж, 396 гектарт ламбамо якстерькай, 236 гектарт силосокс кукуруза, 228 гектарт ламо иень тикшеть ды 210 гектарт лияназ. Лияназ тедеде тесэ видсть васенцеде, вансызь, кода невтьсы прянзо.
Паксятнесэ нуить ACROS колмо комбайнат. Кода тешкстызе Александр Ботайкин, техникась вадря, комбайнатне рамазельть меельце иетнестэ. Пивсэме тесэ лисить валске марто, кода ансяк росась коськи. Ды чивалгомас роботыть. Сюрось паксясто пачтяви тинге лангов, косо сон юты шукшонть эйстэ ванськавтома, ды мейле совавтови утомс. Тинге лангсо свалшкане роботыть кавто ломанть, теке марто нуема шкастонть сынст улить лездыцяст – те школасо тонавтницятне. Сынь тенсить-ванськавтыть территориянть ды лездыть лия аволь стака тевтнесэ.
– Сюронь пивсэма шкась лия енов а молиця. Зярдо жо норовось чачи вадря – ежоськак весень паролгады. Комбайнертнэ кедьсэнек роботыть умок. Тевест содасызь парсте, алкуксонь специалистт. Сынст аволь вейке техникаст. Тельня – тракторсо, тунда сокить-видить, изыть-кавшакавтыть, нуема шкане – комбайнасот. Ризнэвти, од ломантнень арась мелест мода лангсо роботамо. А сатныть тенек трактористт, скалонь потявтыцят. Весе кемемась сетнень лангс, кить уш ламо иеть важодить мартонок, – корты «Ремезенское» ООО-нь прявтось А.Б. Ботайкин.
Ды истят ломантнеде аволь аламо. Сынст ютксо водителесь Николай Васильевич Наумкин. Сон тесэ роботы уш малав 50 иеть! Ней чизэнзэ кавксть ускси паксяв нуицятненень ярсамопель: обед ды ужин. Эряви меремс, важодицятнень тундонь, кизэнь ды сексень тевтнень топавтомсто свал андыть пек паро ярсамопельде, конань пидить Эрьмезенка велесэ предприятиянть столовойсэ. Пидицятнестэ-паницятнестэ вейкесь – Ольга Петровна Егорькина. Ольга Петровна хозяйствасонть поварокс роботы кавксоце ие. Тедеде столовойсэ лездыцякс саизе Антон церанзояк. Сонензэ уш 15 иеть ды кизэнь каникулатнестэ шканть тевтеме а емавтнемга авазо саизе эстензэ лездыцякс. Кадык тонавтни важодеме.
– «Пси» шкатнестэ минек предприятиясо важодицятнень туртов ули обед ды ужин. Менюсь эрьва чистэ лия. Нама, свал ули ям, чистэ сон лия, пидетяно кашат, омбоце блюдат, истя жо ули чай, сонстемензэ ковгак, – евтни Ольга Егорькина. – Важодеманок ушодови валскень 7 чассто, штобу обед шкантень весемесь улевель анок.
Цератне каванявить а беряньстэ: сывель марто капста ды лия эрьва кодамо ямдо, ликшань, кснавонь кашадо, модамарде котлета марто, од эмежень салатто, умарень компотто, чайде. А эште столовоенть менюсо эрси керсезь сывель, плов, рестазь алт. Тантейть пидевксэст-паневксэст столовоень важодицятнень, неяви сеске, роботыть оймень путозь!
Башка евтама прявт техникасонть – комбайнатнесэ ды автомашинатнесэ важодицятнеде. Сынстемест велень хозяйствасо куш кодамо шкасто кодаяк. Комбайнерось Олег Анатольевич Наумкин «Ремезенское» ООО-со роботы уш зярыя иеть, сась сеске школанть прядомадо мейле.
– Минек од шкасто руль экшсэ важодеманть туртов праватнень максыльть школасо тонавтнемстэ. Сестэ меельце классо весе церынькатнень туртов ветясть тракторонь коряс урокт, косо тонавтсть велень хозяйствань техникасо важодемантень. Тевесь ульнесь паро ды эрявикс, – корты Олег Наумкин. – Трактористэкс анокольть уш школань парта экшстэ.
Секскак колхозсо важодема кинть Олег Анатольевич ушодызе механизаторокс. Ды аволь школасо тонавтнемась лездась тенень. Церанть туртов те енксось ульнесь малавикс вишка шкасто саезь. Велень хозяйстванть марто сюлмавозель весе семияст – тетязо эрямонзо перть ульнесь механизаторокс, авазо роботась ветврачокс. Те коесь эзь колаво нейгак. Наумкинтнэнь семиясь – велень алкуксонь трудий ломанть. Олег Анатольевичень церазо – Дмитрий, теке хозяйствасонть роботы механикекс, техникантень вечкемась сонензэ ютась тетянзо ды покштянзо пельде. Теке марто од ломанесь ероков аволь ансяк тракторонь ды комбайнань руль экшсэ, витнемасосткак весементь пек парсте чарькоди.
Комбайна алдо сюронь усксицятнень ютксо Филипп Васильевич Наумкин. «Ремезенское» ООО-со механизаторокс роботы уш малав 45 иеть. Весе те шканть перть варчнесь эрьва кодамо техника. Роботась ГАЗ-53 автомашинасо, КамАЗ-со, эрьва кодамо тракторсо ды седе тов. Ней механизаторонть техниказо – «Кировец» тракторось. Истя жо сеедьстэ ойси КамАЗ автомашинань руль экшс, конасонть ней ускси сюронть.
Велень хозяйствань важодицятнень свал ламо тевест ды мелявксост. Ансяк кенерть топавтомс мельтнень-бажамотнень. Сюронь пивсэмадо мейле кенерить кукурузась, ламбамо якстерькаесь. Весементь эряви кенеремс урядамс шкастонзо. Ды тенень сынь путыть весе виест.
Юлия Еремина