Маень меельце читнестэ тиринь газетань корреспонденттнэ якасть инжекс Ицялонь райононь Оброчное велев ды тосонь «Агропромсервис» ООО-нтень. Кода уш содыть минек ловныцятне, предприятиянть прявтокс ламо иень перть важоди эсь тевензэ вадрясто содыця, виев аграрникесь ды эрзянь церась Владимир Ильич Нужнов. Коень коряс, минек командась васняяк совась хозяйствань азоронть содавтомо. Владимир Ильич кортась мартонок, кода свал, седейшкава. Сонзэ валонзо коряс чарькодинек, предприятиянть тевензэ молить вадрясто.
Тундонть самонзо марто хозяйствасо важодиця ломантне а содыть оймамо. Паксятне лажныть чинек-венек, эдь кода кортыльть минек покштятне-бабатне: «Моданть вийсэ эрятано…». Ды штобу модась чачтоволь ламо ды сюпав норов, сонзэ лангсо важодемантень эряви путомс ойме ды ламо вийть. Истя, виень апак жаля трудить «Агропромсервис» ООО-нь важодицятне. Тевтне улить свал. Саемга, неень шкасто паксятнесэ моли касовкстнэнь гербицидсэ пургсемась. Седе тов ушодыть тикшетнень ледеме, сенажонь анокстамо. Ломантне, прок коткудавт, важодить сиземань апак сода. Ансяк, роботадо башка, предприятиясонть важодиця ломантне, прявтост марто вейсэ, маштыть седейшкава ютавтомо оймсема шкасткак.
Кияк апак стувто, мезеяк апак стувто!
Маень 9-це чистэ Ицялонь райононь эрицятне келейстэ тешкстызь Изнямонь чинть, мельстуиця программа анокстакшность «Мордовский» лишмень заводонь важодицятнеяк. Инжетнень каванясть раськень ярсамопельде ды невтсть мельстуиця концерт. Мероприятиянть анокстыцясь-ютавтыцясь – «Агропромсервис» ООО-сь. Теке жо чистэнть, Владимир Нужновонь превс путоманзо коряс, ютавтозель Ине Изнямонь 80 иетненень алтазь автопробегесь. Ицялонь районсо те патриотической акциясь тевс нолдави уш омбоце ие. Ды омбоцеде сон вейсэнди сеть ломантнень, конатнень седейсэ палы патриотизмань толнэсь. Весемезэ автопробегсэнть примасть участия малав 80 машинат. Ютксост ульнесь Владимир Ильичень ГАЗ-69 раритетной машиназояк. Колоннась ардсь Ульянки, Рождествено, Смольный, Ичалки ды Кемля велетнева. Лиякс меремс, сеть таркатнева, косо ванстовить Ине Отечественной войнасо чавовозтненень алтазь кеврунготне. Эрьва машинанть вальмасо ладязель ветеранонь фото ды гувность якстере флагт. Лиссь алкуксонь «А кулыця полк».
Владимир Нужновонь валонзо коряс, те акциясь вейсэнди весе поколениятнень. Тедеде автопробегень участникекс кармасть эйкакштнеяк. Те корты ламодо. Кемтяно, те вадря коесь поладови седе товгак.
Ёрокчист невтить аволь ансяк важодицятне, ракшатнеяк
«Агропромсервисэкс» хозяйствась лемдезель 2005 иестэ. Те ней сон республиканть келес гайгиця велень хозяйствань виев предприятия, косо важодить сюронь, ламбамо якстерькаень кастоманть енкссо, трить ракшат. Ютазь пингень 30-це иетнестэ жо «Начало» совхозонть юрсо сон панжозель кода Мордовиянь 27-це № лишмень завод. Сонзэ важодема таркакс явозельть икелень помещикенть моданзо. Мекс лишмень завод? Неть таркатнесэ алашатне трявсть-кастовсть 1778 иестэ саезь, помещиктнень туртов лишметне ульнесть аволь ансяк ардомапелекс, сынст сеедьстэ миильть масторонть томбалевгак. Советской шкасто жо лишметне ульнесть васенце лездыцякс сокицятнень-видицятнень туртов, колхозтнэсэ арасельть зяро тракторт-мезть, секскак саезель мель нолдамс истят алашат, конатне а пелевельть стака важодемадонть ды покш сталмотнеде. Истя, Оброчное веленть маласо кармасть кастомо васня бельгийской алашат, мейле жо тесэнь специалисттнэ Коневодствань ВНИИ-нть марто путсть ламо вийть «советский тяжеловоз» од породанть нолдамга, конась кармась содавиксэкс весе масторлангонть келес. Хозяйствась кармась лововомо племенной заводокс, те тевенть топавтыяк весе 90 иетнень перть, ялатеке «племенной завод» лемесь максовсь тензэ ансяк 2020 иестэ. Заводось гайгсь масторонть келес, важодеманть кис тешкстазель советской шкань ламо покш казнесэ.
Эряви меремс, неень шкастояк лишмень заводось – весероссиянь эрьва кодамо пелькстамонь ды выставкань свалшкань участник, сеедьстэ лисни изницякс.
«Мордовский» лишмень заводось три-касты лишмень истят породат, кода: советский тяжеловоз, русская рысистая, французская рысистая, тракененская, арабский скакун ды эйкакштненень вечкевикс понить.
Кортамсто Владимир Ильич евтызе эште вейке мельспаронзо. Тедеде Ине Изнямонь чистэ Московсо Кремлянть вакссо «Мордовский» лишмень заводонь кавто эряза ракшатне невтизь эсь ерокчист военной парадсонть. Те вадря кулянть тиринь енксов пачтизе Кремлянь полксо служицясь, авась-кавалеристэсь Ирина Мамаева. Ульнесть шкат, сон важодсь Ицялонь лишмень заводсо. Лиссь истя, од ломанесь тусь эрямо Московов. Ды тосояк эзизе кадо вечкевикс тевензэ. Кода-бути гайгстась Владимир Ильичнень энялдома марто: Президентэнь лишмень полкс важодеме эрявить зярыя вадря лишметь. Кавто-колмо чинь ютазь эрзянь мода лангсо трязь-кастозь валаня ды виде рунго вете лишметнень пачтизь Московов. Ды шкань ютазь Аперон ды Отважный лемсэ лишметне невтизь эсь ерокчист минек масторонь прявт ошсо.
Лишметне марто важодить эсь тевень содыця ломанть
Истят кулятнеде мейле минь уш эзинек аштеве ве таркасо. Ульнесь покш меленек эсенек сельмесэ варштамс, кода молить тевтне лишмень заводсонть. Зярдо пачкодинек эрявикс таркантень, кувака конюшнянть икеле эйсэнек учось эрзянь ундокс марто од церась, «Мордовский» лишмень заводонь зоотехникесь Данил Беззубов. Сонензэ весемезэ 20 иеть. Ансяк одчинть лангс апак вано, сон алкуксонь профессионал. Кенери важодемеяк, вузсо тонавтнемеяк. Вана мезе евтнесь эсензэ ланга сонсь церась:
– Велесэ эрямось монь а тандавтни. Маряса, ламот кортыть, велетне чамить, од ломантне бажить ошов, мон жо, мекевлангт, велев. Эдь Оброчное велесь эште эри. Тесэ ули весе эрявикс инфраструктурась, улить важодема таркаткак. Арсян, неень шкань од ломантнень бажамост важодемс мода лангсо арась, стака маряви. Мезесь жо а стака? Саемга, бути аштемс чинь-чоп телефонсо, сестэяк прят ушоды лакамо.
Церась чачсь Оброчное велесэ. Сонензэ топодсть кавто иеть, кода тетязо-авазо тусть эрямо Московов. Кармасть важодеме МВД-нь органтнэсэ ды нейгак роботыть тосо жо. Данилэнь ледстнемас кадовсь, кода эйкакшокс оймсема читнестэ тетянзо марто сакшныль тиринь велев покштянзо-бабанзо содавтомо. Се шкане велень эйкакштнень вечкевикс налксема таркакс ульнесь лишмень заводось. Нама, ракшатнень ваксс сынст нолдтнилизь пек чуросто, а бути истямо шка прыль, Данил марясь прянзо сехте уцяскавокс. Сонензэ вечкевсть лишметне, сынст мельга якамось. Ледстни, кода вишка шкасто мартонзо лиссь тюнихань тев. Весть валске марто ялгацек мольсть лишмень заводов. Ялгась час-кавто аштесь, тусь кудов, Данил овсе эзизе маря шканть, кадовсь талай чокшнес. Кудосо тень коряс, нама, кияк ды мезеяк эзь сода, вешнесть эйсэнзэ весе веленек. Кода муизь емазькенть, ковонь перть эмежпиреде васов эзизь нолдтне, мелявтсть, таго оргоди лишмень заводов. А тосо эйкакшонтень покштнень пильге алга тапсевемс а мезть. Кие бу содаволь, кодашка ризкс тень кувалма кирдсь церынькась.
Шкань ютазь, кода ялганзо седе кассть, церабайтне лоткасть явомо мель лишмень заводов чийнемантень, Данилэнь жо те бажамось чиде-чис ансяк кассь. Истя, церынькась эште вишка порасто ладизе прянзо лишмень марто важодицякс. Теевсь содавиксэкс заводонь ломантнень марто, сынст пельде тонавтнесь, кода ветямс прянть лишме марто, вансь сынст эрьва чинь тевест лангс ды сонськак эзизе маря, кода ушодсь лакамо те тевсэнть. Ды истя ульнесь кизэстэ кизэс. Школань прядомадо мейле бажась молемс тонавтнеме К.А. Тимирязев лемсэ Московонь Велень хозяйствань академияв, ансяк кода арсезевсь, тиринь велень лишметнень карми содавтомо иезэнзэ весть-кавксть, тандадсь. Ды те тандадомась панжсь эрямосонзо од ды уцяскав ки. Церась велявтсь тиринь Мордовияв. Ней тонавтни Н.П. Огарев лемсэ университетсэ, чарькодеви, индивидуальной формасо, секс мекс весе шканзо алты важодемантень. Хозяйствасонть од специалистэнть вастызь кенярдозь. Васень шкастонть сон важодсь экскурсоводокс ды лишме мельга якицякс, шкань ютазь прявтось ладизе зоотехникекс. Данилэнь важодемань тевензэ ламолгадсть, ансяк те сонзэ а тандавтни, эдь сон вечксы эсь роботанзо.
– Койсэнь, лишмесь – ломанень ежонь витиця ракша. Сон веши мартонзо свалшкань важодема. Аволь умок минек лишмень заводов сакшнось Мордовия Республикань Прявтось Артем Здунов. Минь ветинек экскурсия, конань шкасто мон апак сепо евтнинь тензэ, кода вечксынь неть эряза ракшатнень. Ды мезе илязо уле, а туян тестэ ошов. Прявтось шнымим, мерсь, истят специалистт пек эрявить минек региононтень, – евтни минек героесь.
Данил марто кортазь, чарькодеви, ломанесь палы эсь важодемань тевсэнзэ. Чиде-чис бажи кастомс эсь содамочинзэ, ловны ламо эрявикс литература, мезесь а чарькодеви тевсэ, кевкстьсынзе седе умок важодицятнень эли жо Интернетэнть. Бажи мезеяк а нолдамс. Важодема таркав сакшны чинь лисезь, тукшны чоподане, зярдо уш кияк а кадови конюшнятнес. Сон эрьва чокшне ютасынзе весе лишметнень ды ансяк мейле шожда седей марто туи кудов. Нама, од церантень а весть савкшнось важодемс веть, эдь ракшатне, кода ломантне, ормалгалить, вашиямо шкасто лиснить стакачить.
– Важодема таркасо мон куш кие – зоотехник, ветеринар, лишме мельга якиця ды ломань, конась яви мель неть вадря ракшатненень. Те важодемасонть прявтось – вечкемс лишметнень. Сынь жо кармить вечкеме тонь. Содатадо-арась, весе ракшатнестэ ансяк лишмесь – кежень кирдиця. Бути уш кежензэ савты мекскак, сон тень теть а стувтсы, кода бу илянзат вечке, ялатеке кежензэ пандсынзе. Арсян, теке сонзэ пежетезэяк, свалшкане жо те ракшась – алкуксонь ялга, – корты церась.
Истя жо Данил евтнесь вишка ялакстонзо, конась эште тонавтни школасо, ансяк эрьва ие покш мельсэ учи кизэнь каникулатнень. Сонгак сы ялаксонзо ваксс велев. Церынькась яви мель велень хозяйствань техникантень. Кода евтни Данил, а кенери самс Московсто, чии озамо тракторс. Косто саевсь неть кавто церынькатнесэ истямо покш вечкема велень хозяйствантень, евтамс астака, сынь вишка шкасто саезь тиринь модань патриотт!
Маласо шкасто Данил Беззубов арси вадрясто прядомс Институтонть. Од ломанесь зярс эри покштянзо-бабанзо марто, ансяк мельсэнзэ кирди «Агропромсервис» ООО-нть лезксэнзэ вельде мода лангс кудонь стявтоманть. Тень коряс предприятиясонть од специалисттнэнь туртов улить эрявикс программат. Арсетяно, сы шкасто Данилэнь бажамонзо топавтовить. Эдь истямо ероков церантень эряви лездамс.
Те предприятиясонть, Данил Беззубовдо башка, важодить эште кавто од ломанть: Максим Филимонов ды Сергей Петайкин – Ицялонь велень хозяйствань колледжень студентт. Кавонест церынькатнень вишкапорасто саезь ульнесь покш мелест важодемс тракторсо. Секскак, кода марясть, мереви ютамс практика маласо предприятиясо, апак кавтолдо сермадстызь пряст трактористтнэнь юткс. Неень шкане студенттнэ важодить фермань перька. Усксить ракшатненень андомапеленть, лездыть лия тевсэ. Од ломантненень техникасо важодемс вечкеви, ерокчист ули. Арсетяно, маласо шкасто, тонавтнеманть прядомадо мейле, сынь сыть важодеме те предприятиянтень. Эдь тесэ истят специалисттнэ сырнень питнень сталмосо!
Алена Артемьева