Отяжелень райононь «Сабанчеевское» ООО-сь – велень хозяйствань виев предприятия. Тесэ роботыть аволь ансяк Сабанцелень эрицятне, истя жо шабра Таразбуень, Дюрькинань, Аловелень ломантне. Хозяйствась кеместэ важоди сюротнень видемаст-кастомаст коряс, улить сюракшов ракшань трямонь фермат, важодемасо нолдавить неень шкань од технологиятне.
Ламо иень перть предприятиянь прявтокс важодсь содавикс аграрникесь, Мордовиянь велень хозяйствань заслуженной роботникесь, Славань орденэнь кавто степентнень кавалерэсь Дмитрий Николаевич Игушкин. Тедеде сон тусь эрямосто. Весе мелявтсть, мезе жо карми предприятиянть марто? Кие кунды те аволь шожда тевентень? Кода карминек содамо, Дмитрий Николаевич арсизе те тевенть икелепелев ды мусь тарказонзо ломань. Те – фермерэсь Александр Ефимович Палькин. Неть читнестэ минь вастневинек сонзэ марто ды кортынек мельдензэ-бажамодонзо.
Александр Ефимович чачсь Сабанцелесэ. Тетязо – Ефим Ефимович, ниленьгеменде ламо иеть важоди школасо физкультурань тонавтыцякс. Авазо, Любовь Дмитриевна, важодсь школань столовойсэ поварокс. Сон тусь эрямосто 2020 иестэ.
– Монь эйкакш пингем ютась тевсэ ды важодемасо. Арсян, велень эрицятнень весень истя. Тринек кавто скалт, кирдинек вете-кото тувот ды эште тулякат. Минсь озавтнинек зярыя тингеть модамарть. Колхозось явиль кавто-колмо гектарт якстерькай, конань эрявсь мотыжамс ды таргамс. Школасо тонавтнемстэ якинек вирев чувтынень озавтомо, кевть пурнынек, – ледстни Александр Ефимович.
Школань прядомадо мейле сон мольсь тонавтнеме М.Е. Евсевьев лемсэ МГПИ-нь (ней МГПУ) физвоспитаниянь факультетэв. Ансяк тонавтыцякс, кода тетязо, эзь саво улемс. Од церась кочкизе предпринимателень тевенть. Колмо иеть важодсь «Колорит» ООО-нь прявтокс, кирдсь Сабанцелесэ, Таразбуесэ, Ботужелесэ микшнемань лавкат. Седе тов, 2006 иестэ, кочкась лия ки – панжсь крестьянонь-фермерэнь хозяйства. 55 гектарт модатнесэ виднесь сюро. Мейле, 2010 иестэ саезь, Надежда Михайловна нинзэ марто ушодсть трямо-кастомо куркат. Истямо енкссо маласо кияк эзь важоде. Те ульнесь семиянь бизнес. 2012 иестэ тенст максозель 1,5 млн целковоень покшолмасо грант. Неть ярмактне пек лездасть. Тейсть эсест комбикоромонь цех. Куркань сывеленть микшнесть республикань районтнэва, Чувашиясо ды натой усксесть Московов. Трясть вете тежадо ламо нармунть. Ды савкшны ансяк дивсемс, кода мирдть-нить кавонест кенерсть эрьва ков. Меельце вете иетнестэ трясть-кастсть саразт-бройлерт. Нама, лездасть Данила ды Виктория эйкакшосткак. Александр Ефимович велень тевсэ чарькодиця, секскак сонензэ аволь весть превс путома мельга пшкалесть лия фермертнэ.
Зярдо Д. Н. Игушкин васенцеде пшкадсь Александр Ефимовичнень важодемань коряс, улемс «Сабанчеевское» ООО-нь прявтокс, сон аволь сеске макссь каршо вал. Кавтолдсь. Ульнесь эсензэ бизнесэзэ. Савсь парсте арсемс тень лангсо. Паряк, Д. Н. Игушкин умок уш редизе те эряза, тевде а пелиця ломаненть?
Ды вана уш нилеце ков Александр Палькин вети велень хозяйствань предприятиянть. Эсензэ тевензэ савсь кадомс, ИП-нть пекстамс. Сон видькстась, васенце ковтне ютасть аволь шождасто. Эрявсь весементь педе-пес ванномс. Истя, сон полавтызе скалтнэнь андомань рациононть. Кармасть тевс нолдамо соянть. Мелят чизэнзэ ловсодонть потявтсть 13 087 кг, ней – 17 959 кг. Ловсонть ускить Ицялонь сыродельной комбинатов, Саранскоень консервной заводов. Скалонь ферматне важодить Сабанцелесэ, Аловасо ды Алашеевкасо. Тедеде варчамонь кисэ видсть 100 гектарт соя. Бути тевесь туи, андомапелесь скалтнэнь туртов карми усковомо эсест паксясто.
Течи «Сабанчеевское» ООО-со важодить 225 ломанть. Кой-конатне ламо иеть алтасть велень хозяйствантень. Аволь умок састь роботамо вете механизаторт-трактористт. Те пек кецявты.
– Александр Ефимович, кодат меленк-бажамонк икелепелев?
– Ушодынек витнеме-петнеме ферматнень. Ней вана витневи Аловасо фермась (тов кельгить 200 скалт). Арсетяно стявтомс од ферма Сабанцелесэ (300 скалс). Раминек комбикоромонь завод, конась ашти Дюрькинасо. Тосто карматано усксеме комбикоромонть весе отделениятнева, ладятано шнек, конась пешти самосвал ды тонась уски ков эряви. Алашеевкасо ды Сабанцелесэ тейтяно комбикоромонь ванстомань таркат. Теде башка, минек предприятиясь свал лезды велентень, снартнетяно теемс тень эрьва мезень коряс. Аволь умок, саемга, ветявтынек Ине Отечественной войнасо чавовозтненень кеврунгонтень газ. Ней тосо ули Свалшкань тол. Зярдояк арасель мелем туемс велестэ ды эрямс ошсо. Кинь ули мелезэ, се муи эстензэ тев велесэяк. Эряви кочкамс оймень коряс тев, эсеть енкс ды важодемс. А чарькодян сетнень, кить сялдыть велесэ эрямонть.
Кода ютась предприятиясонть тундонь видемась, теде тенек пачтясь «Сабанчеевское» ООО-нь растениеводствань коряс прявтонь полавтыцясь Вера Кочурина:
– Тундонь видематне ютасть парсте. Сень лангс апак вано, ловось пек аламоль, тунда шкастонзо ютасть пиземеть. Мелявтынек озимойтнень кисэ: сексня лавшосто кассть. Ней жо, тундось сась куроксто ды сыненст сатотсь летькесь, касыть вадрясто. Тедеде сюротнень алов явинек 7,5 тежат гектарт мода. Видинек 2 тежат гектарт озимой товзюро, 261 гектар – кснав, истя жо яровой товзюро ды шуж, 131 гектар – сюрокс кукуруза, 336 гектарт – силосокс кукуруза, 100 гектарт – соя, 65 гектарт – рапс, 1850 гектарт – ламбамо якстерькай, ламо иень тикшетнеде видезь 1335 гектарт.
Неень шкане видьмекстнэнь пургсетяно гербицидсэ: илязо касо ютковаст зыянов тикше. Озимой товзюронть ушодынек пургсеме ормадо ды порицядо. Кой-кона таркатнесэ товзюросонть уш улить колозт. Ушодынек тикшетнень ледеманть, анокстатано сенаж. Тевесь моли. Кадранок улить. Техникась весе шкастонзо анокстазь, весе те лезды виень путозь роботамс. Кода нетядо, эрьва минутась минек ловозь.
Татьяна Маторкина