Вторник, марта 19, 2024
Важное
Истя эсь стихотворениясонзо сёрмадсь ялгадонзо, содавикс гармонисттэнть, поэттэнть, композитордонть Александр Петрович Аверкиндэ сонзэ малавикс ялгазо – Александр Бобров сёрмадеесь. «Как стамеской вырезали, без особенной молвы, сразу видно: сын Рязани, а по деду – внук мордвы».


Александр Петрович тусь юткстонок 1995 иестэ, ансяк сонзэ произведениянзо те шкас весень мельсэ-превсэ. «На побывку едет молодой моряк», «Милая мама», «Мне березка дарила сережки» ды эштё 500 ламо морот, содавикс фильматнес ды спектаклятнес музыка сёрмадсь те композиторось ды поэтэсь 60 иензэ перть. Александр Петрович Аверкин – Россиянь ды Мордовиянь искусствань заслуженной деятель, тиринь Рязанень областень Почетонь гражданин, сонзэ лемсэ Сасова ошсо лемдезь ульця, эйкакшонь музыкальной школа ды рузонь моронь музей. Рязанень ёнкссо сонзэ лемесь пек содавикс, тосонь эрицятне покш каштанчисэть землякост кувалма, ды 1997 иестэ саезь Аверкинэнь нинзэ Галина Васильевнань мелензэ-бажамонзо кувалма Сасовасо эрьва иестэ ютавтневи Александр Аверкин лемсэ раськень творчествань весероссиянь фестиваль. Ютась сон тедедеяк, аволь умок, медьковонь омбоце недлястонть. Ды аволь ансяк, фестиваленть юрсо ютасть «Земля моя красивая» художественной конкурсось, «Сасово. Аверкин. Фестиваль» концертэсь ды Александр Петровичень Шафторка тиринь велесэнзэ вастовомась, косо чачома кудосонзо панжозь музей. Фестивалентень сакшность Сасова ошонь администрациянь прявтось Е.И. Рубцова, композиторонть низэ Галина Васильевна, ламо содавикс морыцят ды А.П. Аверкинэнь талантонзо вечкицят, конатнень ютксо – Мордовиянь заслуженной артисткась, Московонь филармониянь «Садко» моронь ды киштемань государственной ансамблянь солисткась Вера Каяцкая. Вера Ивановна ламо иеть сови фестиваленть жюрис. Сонсь мероприятиясь ютась Сасова ошонь муниципальной культурной центрасо, ды ютубсо ветявсь видеотрансляция сетненень, кить эзть пачкоде эли эзть кельге залонтень.

Вера Каяцкая панжизе фестивальсэнть Мордовиянь пельксэнть, эдь Александр Петрович пек вечкилизе минек ёнксонть. Сонзэ Шафторка велезэ ашти Зубова-Полянань райононть марто границясо, ды поэтэсь свал тешкстылизе, келя, сонзэ улить эрзянь раськень ундоксонзо, кадык ловильгак прянзо рузокс. Эрямонзо перть Аверкин сёрмадсь 50 ламо композицият Мордовиянь эрзянь ды мокшонь сёрмадейтнень стихотворенияст лангс. Сынь ютавтозельть рузонь кельс ды неть моротнень содасызь Краснослободскоень, Отяжелень, Торбеевань, Покш Игнатовань ды лия районтнэсэ, эдь сонзэ музыкась кармась тосонь гимнакс. А вана эрзянь ды мокшонь кельтнесэ неть моротне а пек марсевить, секскак Вера Каяцкаянь ули энялдомазо сёрмадейтненень, кинень Аверкин зярдо-бути казинзе моронзо, сюлмавомс мартонзо. Вера Ивановнань ули мелезэ морсемс сынст эрзянь ды мокшонь кельсэ покш сцена лангсто. Вера Каяцкая ёвтнесь эштё зярыя мероприятиядо, конатне сюлмавозельть Аверкинэнь лементь марто.

«Шумбрат, Аверкин!»

Истя лемдезель тедеде эштё вейке фестивалесь, конась анокстазель Московсо Россиянь Президентэнть юрсо Мордовия Республикань Представительствань Мордовиянь культурань центрань прявтонть Лидия Кругловань, Мордовиянь землячестванть, «Эрзянь вайгель» вейсэндявксонть ды сонзэ эряза участницанть Вера Каяцкаянь вийсэ. Фестивалесь коронавирусонь кезовонть кувалма ютась февральстэ онлайн-форматсо ды алтазель А.П. Аверкинэнь Мордовиядо моротненень.

Мелят жо, эштё пандемиядонть икеле, Московонь раськень кудосонть Мордовиянь представительствась кенерсь ютавтомо композиторонть 85 иетнень топодемантень алтазь ледстнемань чокшне, козонь сакшность ламо содавикс морыцят ды ансамблят Мордовиястояк.

Зыкина ды Аверкин – мезе сынст сюлмась?

Людмила Зыкина морыцясь ды Александр Аверкин композиторось вастовсть од порасто. Аверкинэнь ней лемдевлизь бу сонзэ гражданской мирдекс, сынь эрясть вейсэ, ансяк Александр Петровичень экшс сон эзь лисе. Ялатеке сынст вечкемась мольсь малав кемень иеть ды, нама, сюлминзе вейс Рузонь морось. Аверкинэнь ялгазо Виктор Боков максызе Таманень дивизиянь солдатонтень «На побывку едет молодой моряк» стихензэ ды пеедькшнезь мерсь сёрмадомс моро. Ды 17 иесэ Аверкин дивавтызе! Морось лиссь ды эштё кодамо! Те шкастонть Композиторонь союзонь секциянь прявтонтень Абрамскойнень (тозонь яксесь Аверкин) сась Людмила Зыкина, сестэ уш весесоюзонь радионь хоронь морыцясь. 1957 иестэ те вастовомась кармась уцяскавокс: Аверкин казизе Зыкинанень од моронзо, Зыкина жо тердизе од вечкеманзо мартонзо. Морякто морось кармась васенцекс, конась сёрмадозель ансяк Зыкинань туртов ды пек вечкевсь кунсолыцятненень. Мейле Аверкин сёрмадсь эштё кавто морот – И. Лашковонь стихензэ лангс: «Милая мама» ды «Отрастил солдат усы».

Седе тов ульнесть эштё ламо морот, конатнень од композиторось сёрмадынзе ансяк вечкевиксэнзэ туртов.
Зыкина жо сёрмалесь Аверкиннэнь сёрмат армияв, мейле кувать кирдсь вакссонзо, ансяк свадьба сынь эзть налксе. Александр Петровичень низэ, Галина Васильевна, композиторонть куломадо мейле мусь сёрмань цела пусмо, косо Зыкина пачтясь эсь ёжомарямодонзо. Ансяк шкань ютазь Зыкина полавтызе Аверкинэнь лия алуж лангс. Теке марто сынст творческой сюлмавксось эрясь ламо иеть, теде кортыть Аверкинэнь пельде казезь моротне, конатнень Рузонь моронь инязоравась морсесь пингензэ перть.

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».