«Эрзянь правда» газетась кармась изницякс велень тематикань коряс Национальной премиясонть – «Моя Земля – Россия» весероссиянь информационной проекттнэнь конкурссонть. Прявт редакторось Марина Девятова сайсь III-це тарка «Спорт для всех» номинациясонть «TAVLA TRAIL» – фестиваль бега с национальным колоритом» статьянть кис! Конкурсонть анокстыцясь – Россиянь Велень хозяйствань министерствась. Марина Девятованень казненть максызе Александр Швыдкой кинопродюсерэсь.
Истя жо I-це тарка «Территория жизни» номинациясонть сайсь Теньгушевань райононь Шокша велестэ Марина Перфильева блогерэсь – сеянь ловсосто сырань теицясь, «Мардарика – страна добра» блогонть ветицясь.
Тедеде конкурсонтень кучозельть 1562 яволявтомат СМИ-тнень, блогертнэнь ды башка автортнэнь пельде Россиянь 79 регионсто. Организатортнэ яволявтокшность кавксо номинацият, колмотне эйстэст алтазельть Семиянь иентень. Весе сынь ёвтнесть седе, кода эрить Россиянь велетнесэ ломантне – мейсэ дивавтызь дока жюринть. Изницякс кочказельть 28 авторт ды СМИ-ть, конатне тердезельть Московов каземань торжественной церемонияс. Сон ютась Тимирязевень сельхозакадемиянь Кудосо-лабораториясо. Промксонтень сакшность Владимир Трухачёв – Россиянь государственной аграрной университетэнь – К. А. Тимирязев лемсэ МСХА-нь ректорось, РФ-нь Минсельхозонь, «Россия сегодня» медиагруппань представительтне, жюринь члентнэ. Васняяк ёроков журналисттнэ, блогертнэ ютавтсть мастер-класст, ёвтнесть эсь важодевкстэст, мейле казевсть изницятне. Эрьвантень максозель Диплом, ледстнемань апокшке казнеть ды алтазель ярмаконь премия. Вастовомась ютась мельспаросо, весе изницятне ды инжетне парсте каванязельть ды кенярдовтозельть кавер-группань морамосо. Ламот мусть эсь туртов паро ялгат.
Марина Тикшайкина