Ноябрянь 4-це чистэ тешкстави Раськетнень вейсэндявомань чись. Неень шкане Россиясо эрить малав 200 раськеть. Ды эрьва раськенть питнейчизэ – ламо эйкакшонь триця семиятне, конат, стакачитнень лангс апак вано, важодить, ули вечкевикс тевест, ули кудост, ков бажить куроксто самс. Кудосонть лембе ды свал улить сетне, кие учи тонь. Покш семиятнесэ ванстовить паро койтне, духовно-нравственной питнейчитне, ули вейкень-вейкень чарькодема. Истят семиятнестэ лисить алкуксонь ломанть: тевде апелицят, ламос бажицят, коень-кирдань ванстыцят, икелев молицят ды прявтось – кудораськень питнейчитнень поладыцят.
Зубово-Полянань районсто Лодыревтнень ламо эйкакшонь триця семиясь лиссь изницякс «Иень семия» Весероссиянь пелькстамосо. Сынь казевсть «Велень семия» номинациясо. Кенярксчись ютась «Россия» Национальной центрасо. Лодыревтне трить-кастыть вете эйкакшт. Вейсэ сынь 25 иеть!
Кудазорось Николай Николаевич Лодырев прядызе Н.П. Огарев лемсэ МГУ-нть «Радиотехник» специальностень коряс. 23 иеть важодсь Од Потьмань средней школасо физикань ды астрономиянь тонавтыцякс. Ламо иень перть парсте важодеманть кисэ аволь весть тешкставсь покш казнесэ. 2011 иестэ саезь кармась индивидуальной предпринимателекс – крестьянско-фермерской хозяйствань прявтокс. Васня кирдсь сывелекс КРС, мейле потявтовиця скалт. Николай Николаевичнень животноводческой фермань виевгавтомга максозельть колмо грантт: 2013 иестэ – 3 млн целковойть, 2020 иестэ – 3 млн 900 тежат целковойть, 2024 иестэ – 10 млн целковойть.
Низэ, Наталья Ивановна, прядызе М.Е. Евсевьев лемсэ МГПИ-нть (ней – МГПУ) «История» ды «Юриспруденция» специальносттнень коряс. Сон вана уш 26 иеть важоди школасо историянь ды обществознаниянь тонавтыцякс.
Оксана тейтерест сырнень медаль марто прядызе школанзо. Сон тонавтнесь ПГУ-нь Медицинской институтсо «Лечебное дело» специальностень коряс. Неень шкане важоди Зубово-Полянань райононь больницясо врачокс-терапевтэкс. Омбоце тейтерест – Анастасия, истя жо «ветес» прядызе школанзо. Ней тонавтни К.И. Скрябин лемсэ Ветеринарной медицинань ды биотехнологиянь Московонь государственной академиясо ветеринарокс. Седе вишкинетне – Елизавета, Егор ды Ульяна Лодыревтне, якить школав. Сынь истя жо тонавтнить парсте. Вечкить налксеме шахматсо. Эрьва ие изнякшныть шахматонь коряс райононь турнирсэ.
Вана кода евтнить Лодыревтне Московов якамодонть.
– Минь ульнинек раськень оршамопельсэ. Весе мельспаросо вансть лангозонок! Сцена лангсо киштинек профессиональной киштицятнень марто. Теде башка, тенек ютавтсть вадря фотосессия. Фотографиянок нолдасызь журналонь васенце лопасо. Кудов велявтынек паро ежосо, кадовсть а стувтовикс ледстнемат, – пачтясь авась Наталья Ивановна.
– Аштинек ваныцятнень ютксо залсо, мейле лисинек сцена лангс награданть мельга – те эрямосонок сехте талновтыця ды кенярксов минутат! Те изнявксось – велесэ эрямодонок, мода лангсо важодемадо, сырькаень моротне, – мерсь Елизавета тейтерест.
– Весе покш семиянок пельде сюкпря евтавлинек Артем Алексеевич Здуновнень, кона редизе минек тевенек ды эрямонок. Минек туртов семиясь – кеме неже, ламо виень лисьмапря. Тыньгак ламо мель явтадо республикань весе семиятненень, велень эрицятненень. Тынк лездамонк максы вийть седеяк ламо важодемс, кастомс эйкакштнень, виевгавтомс хозяйстванть, кепедемс минек республиканть валдо лемензэ, – истямо вал марто пшкадсть Лодыревтне МР-нь Прявтонтень.