Аволь умок Мордовия Республикань Государственной Собраниянтень топодсть 30 иеть. Те датантень алтавсть ламо мероприятият, конат ютавтовсть высшей законодательной органонть ушодксонзо коряс.
Январень 24-це чистэ МР-нь Госсобраниянь Вишка залонтень пурнавкшность СМИ-тнень представительтне – «Закон и власть» журналистэнь конкурсонь изницятне. Те чистэнть тов састь республиканской ды районной газетатнень, теле- ды радиоканалтнэнь, информагентстватнень журналисттнэ ды прявт редактортнэ. 2024 иестэ весе сынь сёрмадсть, анокстасть передачат высшей законодательной органтнэнь представительтнеде.
МР-нь Госсобраниянь Председателесь Владимир Чибиркин тешкстась, кодамо социальной покш лезкс теить журналисттнэ законодательствасо полавтоматнеде сёрмадомсто, депутаттнэнь кочкицятнень марто важодемстэ.
– Ютазь 30 иетнень перть минек регионсонть кемекстазь 2800-то ламо законт, конатнень покш путовксост республиканть виевгавтомасо, – мерсь Владимир Васильевич. – Кемекстазь нормативной базась икелепелев экономиканть виевгавтомга ды ломантнень эрямост паролгавтомга. Весе теде тынь аволь ансяк сёрмадтадо ды пачтятадо эсь материалтнэсэ, истя жо кепедтядо ломантненень эрявикс кевкстемат.
Неень шкане кода Мордовиясо, истя масторонь келескак талновтыця кевкстематнестэ вейкесь – специальной военной операциясь.
Кода мерсь Владимир Васильевич, те ёнксонть Мордовиянь СМИ-тне панжить домкасто. Тень коряс Госсобраниянь Председателесь мерсь кемекстамс журналистэнь пелькстамонь «На службе Отечеству» од номинация, конась алтави республикань эрицятнень ёндо государстванть ванстомасо путовксонтень ды исторической тевтнень астувтомантень.
Вастовомасонть Владимир Васильевич ёвтась сюкпрянь валт СМИ-тнесэ важодицятненень эсь профессиональной долгост парсте топавтоманть кисэ.
Седе тов МР-нь Госсобраниянь Председателесь Владимир Чибиркин вейсэ полавтыцянзо Наталья Долматова марто явшесть казнеть сеть журналисттнэнень, кить 2024 иестэ сёрмадсть ды тейсть передачат высшей законодательной органонь депутаттнэде. Мелят яволявтозельть сисем номинацият, конат алтазельть МР-нь Госсобраниянтень 30 иетнень топодемантень, истя жо сынст ютксо ульнесь пелькстамо Семиянь иень ды Трудовой династиянь иень тешкстамонтень. Сынст коряс итогтнень теемадо мейле ёвтазельть сехте партнэ.
Казнеть максозельть «Республиканские газеты», «Районные газеты», «Лучшая журналистская газета», «Электронные СМИ», «Освещение работы депутатов в Год семьи и Год трудовых династий», «Лучшая работа фотокорреспондента/ видеооператора» номинациятнесэ.
«Эрзянь правда» газетань коллективесь лиссь изницякс «Республиканские газеты» номинациясонть, миненек максозь омбоце таркась.
Валентина Юдина