С.Д. Эрьзя лемсэ изобразительной искусствань музейсэ невтезель раськень костюмонь коряс теезь коллекциянь презентация.
«Центр социокультурных инициатив «Вместе» АНО-сь вейсэ Ф.В. Сычков лемсэ художественной училищанть ды «Умарина» моронь ды киштемань Мордовиянь государственной ансамблянть марто невтизь «Ладава» Арт-студиянь презентациянь программанть, конань юрсо эрзятнень ды мокшотнень раськень койтнень марто костюмтнень творческой коллекциясь.
1740 эскизтнэстэ, конатнень артызь Ф.В. Сычков лемсэ Саранскоень художественной училищань ды ошонь художественной школатнень тонавтницятне, кочказельть ансяк 25. Сынст коряс стазельть-теезельть раськень викшневкс марто эйкакшонь ды од ломанень оршамот, конат мазылгавтозельть човалясо, кшнинь ярмаксо, каурисэ. Оршамопельтне анокстазь модельерэнть Н.В. Морозовань проектэнзэ лувсо. Костюмтнень жо пельиень перть стась Светлана Гинина технологось.
Весе те мазычинть невтизе «Яблонька» эйкакшонь киштемань студиясь. Эйкакштне явозельть колмо курова (вишкине, средней ды покш группатне), сцена лангс лиснесть «Образ Ладавы-женщины» валморонть ловноманзо марто, конань арсизе грантовой заявкань авторось Юлия Бурова. Валморось сермадозь эрзя-мокшонь мифологиянть коряс. Сонзэ прявт героинясь – Ладава тейтересь, конань налксизе МР-нь заслуженной артисткась Анна Барабошкина. Весе 25 модельтненень ды эскизэнь артыцятненень явшезельть Сюконямонь коневт ды апокш казнеть.
Философиянь наукань докторось, профессорось, МР-нь культурань заслуженной деятелесь Н.Г. Юрченкова тешкстызе, келя, эрзянь ды мокшонь оршамотне сехте мазыйть весе лия финнэнь-угрань раськетнестэ, ды поладсь: «Течи минь тынк марто ультяно Мордовиянь эрямосо исторической тевсэ: васенцеде раськень оршамопеленть невтить истят вишка модельть, конат казить пек паро ежомарямот…» Ды Нина Георгиевна те шкастонть саизе кедьс сехте вишка моделенть – 6 иесэ Лиана Мельниковань. Кода карминек содамо, тейтерькась яки 112-це № эйдень кужов. «Яблонька» ансамблясо кишти 4 иестэ саезь. Тейтерькась пек ероков, теде башка, сон яки «Карусельки» вокальной студияв, эйкакшонь модельной агентствав ды спортонь киштемас.
«Ладава» Арт-студиянь проектэсь топавтовсь Культурань инициативань Президентэнь фондонть лезксэнзэ вельде. Проектэнь руководителесь Нина Любишкина явшесь Благодарностть Орданьбуень беряньстэ неиця школань-интернатонь эйкакштненень, конат кармасть проектэнть активной участникекс. Тостонь чувтонь пенчсэ налксиця эйкакштне невтсть зярыя номерт.
Валерия Вергизова «Яблонька» киштемань ансамбляс яки 4 иеть. Тонавтни Саранск ошонь 11-це № школасо 5-це классо. Тетянзо-аванзо Отяжбуень. Тейтерькась сась Мария Геннадьевна аванзо марто. Сонгак важоди 11-це школасо воспитаниянь коряс директоронь советникекс. Валериядо кортамсто авазо евтнесь, кода тейтерькась ушодсь киштеме: «Сонензэ уш вишка пингестэ вечкевсь те тевесь. Мейле Интернетстэ неинь яволявтома – эрявить киштиця эйкакшт «Яблонькав». Молинек, сеске саимизь. Тензэ пек вечкевсть преподавательтне. Теде мейле тейтерем эрямонзояк а неи киштемавтомо» (мизолды).
Модельерэнть Наталья Морозовань вановтонзо ало эйкакштне тейсть артовкст. Кода весемесь ушодовсь, евтнесь тенек сонсь Наталья Владимировна: «Проектэсь тевс нолдавсь истямо мельстэ – раськень оршамотнень лангс нежедезь, теемс покш ды мазый коллекция. Тевесь ушодовсь Саранскоень художественной училищасто, косо тонавтнинь монськак ды ней 10 иеть уш кода тосо важодян. Дипломонь важодемам лемезэль «Мордовский народный костюм». Свал лакинь се мельсэнть – анокстамс ды келейстэ невтемс раськень оршамопеленть мазычинзэ, ды те проектэсь топавтызе мелем. Художественной училищань студенттнэ лездасть те покш тевенть таркасто сыргавтомо. Мейле лия художественной школатнеяк совасть те важодемантень – Саранскоень ды Орданьбуень школась-интернатось. Грантонь получамга яволявтома макснинек аволь весть, ансяк аволь сеске понгинек изницятнень юткс. Эйкакштнень марто кувать артынек эскизт, ды вана минек редимизь. Нама, покш командавтомо мезеяк аволь лисе. Покш сюкпря весенень – эйкакштнестэ саезь проектэнь топавтыцятнень видьс!»
Миньгак евтатано сюкпря истямо покш важодеманть кис! Арсетяно, истямо мазычись карми невтезь седеяк покш аудитория икеле ды солавты седеяк ламо седейть.
Марина Агафонова