Покш Игнатбуень Андрелесь – эрзянь кезэрень веле. Сонзэ пек сюпав историязо. Веленть эйстэ аволь васоло ашти кезэрень эрзятнень археологической содавикс памятникесь – Андреевской курганось.
Андрелесь – Советской Союзонь Геройтнень Ф.Г. Шунеевень ды П.М. Куманевонь тиринь велест. Тесэ чачсть-кассть истят содавикс ломантне, кода Федерациянь Советэнь сенаторось В.В. Литюшкин, художникесь А.Н. Баргов, эрзянь сермадыцясь Т.С. Баргова.
Аволь умок минь содавтынек те веленть ды вастовинек Андрелень администрациянь прявтонь тевтнень топавтыцянть Татьяна Александровна Куманева марто. Татьяна Александровна евтнесь веленть неень шкадонзо, тесэ эриця ломантнеде, эрямонть вадрялгавтомга од мельтнеде-арсематнеде.
Андрелесь ашти аволь васоло райононь куншкакуронть эйстэ. Покшолмань коряс – омбоце таркасо, эрицятнеде лововить 520 ломанть. Весе важодемань вечкицят, малав эрьва кудораськесь три-касты ракшат, улить истяткак, кить кирдить кавто скалт. Неень шкасто велетнесэ те вастневи пек чуросто.
– Тесэнь эрицянок аволь нузякс ломанть, пек ламо важодить, – евтни Татьяна Куманева. – Эрьва кудонть саик, весень кардазост пешксеть ракшадо, пиресэст озавтозь эрьва-кодат эмежть. Ды трить-кастыть аволь ансяк эсест туртов, ламо миемскак. Тесэ эрьвась парсте содасы велесэ эрямонть танстензэ, секскак тевсэть кизэнек-теленек.
Ды ламова, кода тешксты прявтось, теить тень сень коряс, што важодема таркатнеде велесэнть аволь ламо. Эрямось сынст тонавтынзе важодемантень. Эдь нузякс ломаненть зепензэяк, кудопотмозояк чавот. Андрелень ломантне истя эзть тонадо, истя а вечкить.
– Важодемань апак вечке велесэ кодаяк а эряват. Истя ульнесь свал. Минек велесэ ули крестьянско-фермерской хозяйства – «ИП Фролова Т. И.» Эрицятнестэ зярыя ломанть тосо важодить. Шабра Ташто Чамза велесэ – «8-ое Марта» ООО-со ламот роботыть, Игнатовав ардтнить. Тевтеме а аштить, – тешксты Татьяна Александровна. – Пек паро, велесэнть минек улить од семият, од ломанть. Кенярдовты, улить эйкакшт. Эсенек велесэ школась основной, 9 классонь. 10-це ды 11-це классос эйкакштне якить Покш Игнатовав. Улить ламо эйкакшонь триця семиянокак. Невтемга, Зинаида Станиславовна Кутуровань – кото эйкакшонзо, Елена Петровна Мамаевань – колмо, монь эсень истя жо колмо. Зярдо улить од семият, эйкакшт – велесь эри. Сынь минек неженек, вандынь чинек. Сынст туртов бажатано велентькак седе вадрялгавтомс. Истя, 2024 иестэ «Комплексное развитие сельских территорий» программанть лувсо вадрялгавтозель Ине Отечественной войнасо чавовозтненень кеврунгось ды перьканзо таркась. Икеле иетнестэ педе-пес витнезель Культурань кудось, теезель неень шкань од ФАП, блочно-модульной котельной, конанть вельде телень шкасто уштовить весе социальной объекттнэ.
Зярыя иеде икеле велень эрицятнень ярмакост лангс витнезель-вадрялгавтозель калмолангонь пирявксось.
– Тедеде тесэ теить эйкакшонь спортивной площадка. Роботатне ветявить аволь кодамояк программань коряс, лезкс максы минек велесэ чачозь од церась Станислав Горин. Сон ней эри ды роботы Московсо, ансяк пек вечксы тиринь велензэ ды эсь вийсэ снартни вадрялгавтомс сонзэ, – евтни Татьяна Куманева.
Истя, маласо шкастонть Андрелень куншкакурось вадрялгавтови-мазылгавтови. Тесэ кармить марявомо эйкакшонь шалт, кенярксов вайгельть, пейдемат ды эрзянь велесь, паряк, вельми ды одкстоми.
Татьяна Куманева велень администрациянь прявтонь тевтнень топавты зярыя иеть, сельсоветсэ жо важоди 2008 иестэ саезь.
– Велень администрациянь прявтокс важодеме пек кияк а бажи самс, ломань марто эдь роботамс а шожда. Эрьванть эсензэ обуцязо, ломантне эрьва кодат, – корты Татьяна Александровна. – Бути кортамс минек велень ломантнеде, эрицятне тесэ а берянть, важодеме вечкицят, тевде а пелицят. Ды вейсэ сынст марто минь бажатано теемс эсь веленть седе парокс, седе мазыекс.
Кизэнь перть жо велесэнть улиця учреждениятнень весе важодицятне эсь вийсэ снартнить седе вадрялгавтомс общественной таркатнень – ледить тикшенть, кода маштыть мазылгавтыть.
– Монь койсэ, эрьва велесэнть улить истят ломанть, кить весе седейсэ мелявтыть тиринь енксонть кисэ ды бажить лездамс куш мейсэ. Седе сеедьстэ те сыре ломантне. Сынь пенсиясояк явить мель велень общественной эрямонтень. Андрелесэ истяттнэнь ютксо Вера Степановна Кутурова, Раиса Яковлевна Шунеева, Наталья Ивановна Мамаева, администрациянь икелень прявтось Галина Ивановна Учаева ды лиятне. Сынь ансамблясояк морсить, лия тевсэяк лездыть.
А вана веленть культурной весе эрямозо сюлмавозь Культурань кудонть марто. Тосонь важодицятне пек ероковт, эрязат, свалшкане анокстыть мельстуиця мероприятият, вастовомат, ютавтнить концертт, ули народной театра, конась анокстакшны вадря путовкст.
Течи республикасонть арась вейкеяк веле, косо бу эрицятне авольть лезда СВО-нь таркатнесэ служиця цератненень. Андрелень эрицятне истя жо пурныть гуманитарной лезкс, кодыть носкат, стыть оршамот. Ды весе марто вейсэ малавгавтыть изнямонть.
– Нама, эсь тиринь веленть вадрялгавтомга арсематнеде минек улить. Ламо мезе теевлинек бу, ансяк аволь весемес улить ярмакт, – корты Татьяна Александровна. – Ламот велетнесэ течи прявт мелявксокс аштить китне. Андрелень ламот куротнесэ арась асфальтонь ки, те тевенть пек бу эряволь витемс. Ульцятнень валдомтоманть коряс истя жо улить мелявкст. Велень весе куротнева палмантнень прясо палыть ансяк 28 лампочкат. Сынст ламолгавтомга велень администрациянть ярмаконзо арасть, секс што роботатне стить пек питнейстэ. Секскак покш кемема неень шкане важодиця программатнень ды проекттнэнь лангс, конатне алкукс пек лездыть велетнесэ ды оштнесэ эрямонть вадрялгавтомга.
Татьяна Куманева чачсь-кассь Покш Игнатбуень Протасова велесэ. Школадо мейле прядызе Н.П. Огарев лемсэ МГУ-нь филологиянь факультетэнть. Лиссь мирденень ды сась эрямо Андрелев. 2008 иестэ Татьяна Александровна кармась роботамо велень администрациясо прявтонь полавтыцякс, 2022 иестэ саезь топавты прявтонь тевтнень.
Куманевтне трить колмо эйкакшт. Вишкине церынькаст прядсь нилеце класс, омбоце тейтерькаст студентка, покш цераст тедеде прядызе Санкт-Петербургонь военной академиянть.
Юлия Еремина
Фототне Егор Горинэнь