2025 иень кото ковтнень перть Мордовиянь ветесядто ламо эрицятне понгсть манчицятнень кедьс ды емавтсть 160 миллиондо ламо целковойть.
Ансяк июнь ковсто Мордовиянь внутренней тевень органтнэс ярмаконь саламонь коряс яволявтома марто пшкалесть 100 ломанть. Аферисттнэ манизь малав 25 млн целковоест.
Кода икелеяк, манчемань прявт енксокс ашти эсь картатнесэ ярмактнень ванстомга кредитэнь саемась ды буто резервной счетс сынст ютавтомань лувось. Истя жо эрицятне казизь эсь ярмакост манчицятненень яволявтомань сайтсто, социальной сеттнесэ, маркетплейстнэнь платформатнесэ товартнэнь рамамсто эли миемстэ. Меельце шкастонть ламо гайневтемат эрицятненень сакшность буто сотовой компаниянь сотрудниктнень пельде, конатне пачтильть сынст сим-картатнень важодемань шкаст прядовомадонть.
Манчицятненень понгонесть эрьва кодамо категориянь ломантне: промышленностень важодицятне, пенсионертнэ, студенттнэ, индивидуальной предпринимательтне, тонавтыцятне ды воспитательтне, здравоохранениянь енкссо важодицятне, государственной ды муниципальной служащейтне, важодемавтомотне.
Мордовия Республикава МВД-сь ледсти эрицятненень: бути тыненк гайневтить а содавикс ломанть ды евтыть пряст полициянь эли банконь важодицякс, гайгстадо одс финансовой организациянь эли правоохранительной органтнэнь официальной номертнэнь коряс. Илядо пандо икелепелев Интернэтсэ рамазь товаронть кисэ ды киненьгак илядо евта эсь банконь картань реквизиттнэнь – пин-кодонть ды лия даннойтнень. Тыненк ярмактнень ютавтоманть туртов саты картань номерэськак.