Аволь умок, февралень 8-це чистэ, тешкставсь Россиянь Наукань чись. Тенень Н. П. Огарев лемсэ МГУ-со алтавсь «Человек года-2024» пелькстамось. Конкурсось ютавтови эрьва ие ды сонзэ прявтсо ашти профессорско-преподавательской составонть образовательной, научной ды внеучебной важодеманть кирдемась. Пелькстамосонть эсь ерокчинть мереви невтемс университетэнь профессортнэнень-преподавательтненень «Профессор года» (ванновить сетне, кинь ули наукань докторонь ученой степенезэ, профессор званиязо), «Доцент года» (ули наукань докторонь эли кандидатонь ученой степень, доцент звания) ды «Преподаватель года» (ули наукань кандидатонь ученой степень эли ученой степентеме, ученой звания арась) номинациятнесэ.
Истя, «Человек года-2024» конкурсонь «Профессор года» номинациясонть инженерной енкссо изницякс кармась прикладной механикань кафедрань прявтось Василий Черкасов, а вана гуманитарной енкссо – историянь наукатнень докторось, Юридической институтонь теориянь, государствань ды раськеютконь правань кафедрань профессорось Юлия Сушкова.
Неть читнестэ минь вастовинек Юлия Николаевна марто ды кортынек те пелькстамонтень анокстамодонть ды ютазь 2024 иенть перть важодемадонть. Кода тешкстызе профессорось, конкурсось университетсэ ютавтови уш умок ды сонзэ изницякс Юлия Николаевна кармась аволь васенцеде.
– Пелькстамосонть эсь прям невтнинь зярыяксть. Кавксть лиснинь изницякс «Доцент года» номинациясонть, васенцеде – 2009 иестэ. Ней карминь «Иень профессорокс», – евтни Юлия Сушкова. – Эряви меремс, эсь шкасто те номинациясонть изницякс лиснесь монь тетям – историкесь, этнографось, историянь наукань докторось, профессорось Николай Федорович Мокшин. Сон монь туртов ламот тевтнень коряс свалшкане ульнесь ды кадови невтемакс.
Эряви тешкстамс, «Человек года» пелькстамось университетэнь профессортнэнь ды преподавательтнень ютксо пек престижной. Теке марто сонзэ участниктненень эряви пек ламо ды парсте важодемс иензэ перть. Пелькстыцятнень кочки эрьва кафедрась, седе тов ученой советсэ эрьва факультетэсь ды институтось кочкить седе ероковтнень. Мейле кандидатуратнень лемест ды сынст портфолиотнень максыть вузонь научной управленияв. Тосо управлениянь важодицятне ванныть сонзэ ды ловить таштазь баллтнэнь.
Мезе совавтови портфолионтень ды мезень кисэ максовить баллтнэ? Тесэ ваннови иень перть весе важодемась. Башка мель явови анокстазь ды нолдазь книгатненень, монографиятненень, публикациятненень. Седе ламо баллт максовить, бути сынь лиссть центральной печатьсэ ды покш рейтинг марто журналтнэсэ. Вадрясто тешкстави раськеютконь ды весероссиянь научно-практической конференциятнесэ улемась.
– Ютазь иенть перть важодемась покшоль. Ды, монь койсэ, минек важодемась истямо свал, аволь ансяк пелькстамонтень анокстамсто, – тешксты Юлия Николаевна. – 2024 иестэ минь вейсэ историянь наукань кандидатонть Е. А. Ванькинань марто нолдынек «Мировая юстиция Мордовии в зеркале истории» книганть. Истя жо вете покш статьян лиссть центральной содавикс журналтнэсэ. Неть: «История государства и права», «Мировой судья», «Социально-политические науки», «Российские исследования» журналтнэ. Приминь участия научно-практической ламот мероприятиятнесэ, косо ловнозь малав 20 докладт. Ютксост ульнесть раськеютконь, весероссиянь, эсенек университетэнь конференциятне. Нама, весе неть мероприятиятнес анокстамось саи ламо шка ды вийть.
Истя жо Юлия Сушкова университетэнь диссертационной советэнь член, редакционной 7 коллегиятнень участник. Пелькстамонь изницятнень кочкамсто ванновсь те енксоськак. Баллт максовсть экспертной важодемантеньгак. Ю. Н. Сушкова – Россиянь юристтнэнь ассоциациянь член, профессиональной аккредитациянь коряс эксперт, МР-ва Россиянь МВД-нь Общественной советэнь член, сови МР-ва РФ-нь Юстициянь министерствань управлениянть юрсо государственной религиоведческой экспертизань ютавтомань коряс экспертной советс. Истя жо зярыя иеть сови Эрзянь-мокшонь раськень регионъютконь общественной вейсэндявксонь исполкомонть юрс. Теде башка, сынст кафедрась тонавтнемань планонтень совавтсь программа, конанть лувсо медицинань специальностень коряс тонавтниця омбо масторонь студенттнэнь туртов правоведениянь дисциплинанть ветить англань кельсэ. Самай тень топавты Юлия Николаевна.
– Весе енкстнэнь кирдезь, монь таштавсть 1,5 тежат баллт. Те сехте вадря невтевкс пелькстыцятнень ютксо, секс гуманитарной енкссо «Иень профессор» лементь максызь монень, – корты Юлия Сушкова. – Кода уш тешкставсь седе вере, пелькстамонть лувсо ванновсь иень перть минек важодемась. Ансяк ученоесь а ашти ве таркасо, важоди свал, арси мезе-бути од ды ламолгавты эсь содамочитнень. Эсь мельтнень-арсематнень минь истя жо ванкшнотано студенттнэнь марто важодемстэ ды сыненст те вечкеви. Саема раськень кевкстематнень. Секс, мекс мон сован Эрзянь-мокшонь раськень регионъютконь общественной вейсэндявксонь исполкомонтень, мон яла мартост ванкшнан сеть кевкстематнень, конатне кортавить промкссо. Ды сынь евтыть эсь арсемаст те эли тона тевенть коряс, муить кемекстамо эрьва мелентень. Теде башка, конкурссо эсь прянь невтемась теи минек седе вадря профессионалокс.
Конкурсось весе номинациятнесэ ютавтови колмо енксонь коряс: инженерной (Механикань ды энергетикань, Электроникань ды светотехникань, Архитектурань ды строительствань институттнэ, Рузаевкань Машиностроениянь институтось), естественнонаучной (Медицинань институтось, биотехнологиянь ды биологиянь факультетэсь, Геоинформационной технологиянь ды географиянь институтось, математикань ды информационной технологиянь факультетэсь, Аграрной ды Наукоемкой технологиятнень ды од материалтнэнь институттнэ) ды гуманитарной (Историко-социологической, Экономической, Юридической, Омбо масторонь кельтнень институттнэ ды филологиянь факультетэсь).
Юлия Еремина
Фотось Н. П. Огарев лемсэ МГУ-нь пресс-службанть.