Понедельник, июля 22, 2024
Важное

Людмила Анатольевна Ледяйкина а умок тешкстынзе, ловт, кавто юбилеензэ: сонензэ топодсть 55 иеть ды эрямосонзо колоньгемень иетнень алтынзе школантень. Ней важоди 8-це № школасо эрзянь ды рузонь келень ды литературань тонавтыцякс. Часонзо весемезэ – 35. Нама, те пек ламо. Эдь ёроков авась а пели стакачитнеде.


Людмила Анатольевна чачсь Отяжбуень Цёлпан (Челпанова) велесэ. Тетязо-авазо трясть-кастсть ниле эйкакшт. Вишка пингезэ ульнесь аволь шождатнеде. Тетязо усксесь колхозонь председатель, шофёроль. Роботасто сеедьстэ сакшныль веньберть, кавто часонь малава. Авазо пенькозаводсо чокшнень 7 часос примсесь мушко. Кудов яксесь ялго, пачкодиль талай чокшне, 9 чассто. Секскак весе кудонь тевтне ульнесть эйкакштнень лангсо. Вана кода ледстни эйкакшчидензэ Людмила Анатольевна:

– Семиясонок эйкакштнеде – колмо тейтерть ды вейке цёра. Ялаксом сельмень коряс инвалид, беряньстэ неи. Тетям-авам, кода туильть важодеме, зярдояк эзть кевкстне, теинек-эзинек школасо кудов максозенть. Те уш минек эсенек тевесь ульнесь, кода ней мерить, «по умолчанию». Валскестэ стязь, максыльть конёв, косо сёрмадозельть тевтне, конатнень миненек эрявсь топавтомс чинь перть: брикетт кандтнемс, каштомонть уштомс, скалонть симдемс ды седе тов. Эйкакштнестэ мон ульнинь сехте покшокс. Тевтнень теинек чиполасо. Вана, саемс, течинь тевтнень мон топавтынь, ванды – Оля сазором, мейле Елена марто Сергеень читне сыльть...

Кода седе касынек, кундынек покшонь тевтнескак. Якинек авань марто вейсэ роботамо. Ней а мереви мушко виднемс, а сестэ минь, эйкакштне, кизэнь каникулатнестэ истя жо важодинек пенькозаводсо. Мушконть вачкилинек машинань кузовас, конань мейле усксесть заводов. Пулесь певтемель, мезде уш тосо лексинек, ве Паз соды.
Школадо мейле Людмилань ульнесь покш мелезэ тонавтнемс М. Е. Евсевьев лемсэ пединститутсо (ней – университет). Ды те меленть эйзэнзэ сыремтизе Михаил Тихонович Бибин, Целпан велень содавикс ломанесь, кона 1972–1992 иетнестэ важодсь пединститутонь ректорокс. Вишка пингестэ тейтернесь сеедьстэ сакшнось тенст инжекс. Людмила Анатольевнань седейс кадовсть учёноенть превей ды питней валонзо: «Зярдо тенст сылинек, сон свал кортнесь: «Несынк, эрзятне виздить эсест кельдест, а те пек берянь. Эсенк келенк эряви кепедемс ды кандомс верьга, ломантне неест, тынь сонзэ вечксынк, кортатадо те кельсэнть, ды сестэ сон а ёми, сестэ раськеськак а ёми. А бути а кармить кортамо кельсэнть, сестэ ёматано истя жо, кода ёмасть ламо раськетне, конат эсест келест эзизь вансто…»
Институтсо тонавтнемстэ Людмиланень прась уцяска тонавтнемс истят содавикс ломантнень кедьсэ, кода эрзянь лингвистэсь, педагогось, филологиянь наукань докторось, профессорось Д. Т. Надькин, филологиянь наукань кандидатось, доцентэсь Р. С. Ширманкина ды лиятнень. Сындест лембе ледстнематне аванть прясо кадовсть свалшкас:

– Пейдезь ледстнян Дмитрий Тимофеевич марто васень вастовомам. Истя лиссь, ловныя тензэ эсензэ валморонзо. Зярдо тензэ васенцеде сынь занятияс (мон чамас а содылия, портретэнзэяк вестькак эзия некшне), сон монень мери: «Эрьга, эрзянь мазый тейтерь, кодамо валморо эрзякс содат, ёвтнекая?» Мон каршонзо меринь: «Монень пек вечкеви Д. Т. Надькинэнь творчествазо, ловноса «Вейке чувтонь кавто тарадт» валморонзо». Сон мизолдозь кунсолымим ды ансяк мейле ёвтызе лемензэ.

Кода-бути 80-це иетнестэ ульнесь шка, зярдо эрзянь келенть кардакшнызь допрок. Ледстяви, школасо минь вейке ие тонавтнинек эрзякс, а мейле весе предметтнэнь коряс тонавтсть эйсэнек ансяк рузонь кельсэ. А теде икеле предметтнэнь эрзякс тонавтсть… Ды, ловт, ансяк институтсо, сюкпря Д. Т. Надькиннэнь, карминь парсте содамо келенть.

Валморонзо ловномадо мейле мон тензэ вечкевикс тонавтницякс теевинь. Ледстнян, та-кода весть эзинь саво занятиязонзо. Ульнесь тундо, чадыведь, эзинь лисеве велестэ. А сестэ телефонт арасельть. Ды мейле, недлянь ютазь, зярдо пачкодинь, сон а мельсэ мерекшнесь: «Вана кода шождасто ёмавтови кемемась лия ломаньс. Тон ульнить истямо паро тонавтницям, а тесэ занятиям менстнят…» Карминь прям идеме, мерян, минек велесэ чадыведесь покшоль, сэдьганть пелинь ютамс, сон аволь нардев, лыки, секень вант, пры, савсь велявтомс мекев кудов. Сестэ сон седе чевтемсь: «Чарькодинь, паро, ансяк вант, седе тов иля менстне тонавтнемат».

Истя жо эйсэнь тонавтсь Р.С. Ширманкина, кона марто минь пек паро ялгат ульнинек. Якилинек инжекс вейке-вейкенень. Больницяскак зярдо понгокшнось, мон молинь варштамонзо. Больницясонть койкатне пешксельть, секскак сонензэ тарка явсть коридорс. Мернинь тензэ: «Раиса Семёновна, эряви кортнемс, кадык путтадызь вадря палатас. Тынь истямо содавикс ломань, нать, арась кияк содавиксэнк?» Сон мери: «А эряви, мон тесэ кавтошка чить аштян ды туян». Тусь… Ансяк аволь кудов. Чинь ютазь гайгстынь, сон уш кулось… Истямо вадряль ломанесь. Валт арасть. Сюкпря тенст, сынст вельде карминь келенть вечкеме.

Тонавтнемань ветеце курссо Людмила лиссь мирденень, чачтсь эйкакш ды колмо иеть аштесь кудосо. Ды зярдо 1994 иестэ лиссь важодема тарка 41-це № школасо, сонензэ сеске макссть ветямс 9-це классо рузонь кель ды литература. Стакачись ульнесь сеньсэ – те нолдавиця класс, эрявсь ламо ды домкасто анокстамс. Нама, эштё бути од тонавтыцят, тонь зярс мезетькак арась. Ансяк тесэяк таго вастовсь паро ломань марто.

– Сюкпря, тосо ульнесь Т. В. Тюрина, кона пек тень лездась уроконь анокстамсто. Покш мельспаросан, те ломанесь понгонесь эрямонь ким лангс. Ловт, наставникем ульнесь, тонавтыцям-ветицям. Одолинь, ламос савсь тонавтнемс, сотазь сотынь валонзо-кармавтоманзо. Кортась састо, апак ацирьгале, ёжонь апак кола. Свал тешкстась уроконь паро ёнкстнэнь ды чевтестэ кортась асатыкстнэде.

– Людмила Анатольевна, кода неень шкань эйкакштне тонавтнить эрзянь келенть: паро мельсэ эли аволь?

– Эсь прянь а шнамга ёвтнесынь лия ломантнень мелест. А умок урокозон сакшнось НТМ-стэ Лина Буянкина, сон абунгадозь мерсь тень урокто мейле: «Людмила Анатольевна, мон дивсинь весе уроконь перть, абунгадынь мик – весе эйкакштне тонавтнесть валморот. Лиясо-косо колмо-ниле эйкакшт ансяк ёвтневельть, а тесэ састь мик 50 эйкакшт. Абунгадомань тевть! Натой, маряви, эйкакштне алкукс вечксызь тиринь келенть…»

Мейле Т. И. Ларина сакшнось юбилеезэнь, ульнесь уроксонгак ды мерекшнесь: «Людмила Анатольевна, мон истямо тансть уроконь перть маринь! Ванынь ды арсинь: арази рузонь келень школатнесэ улить эштё истят эйкакшт, конат ваныть лангозот ды сельмесэст вечкема, аволь нувсема. Дивсинь, лисни, истяяк эрси? Неяви, кода пек вечкить эйсэть!»

Тонавтыцянь важодемасо покш невтевксэкс аштить эйкакштнень изнямост эрьва кодамо пелькстамосо ды олимпиадасо. Людмила Анатольевнань тонавтницянзо эрьва ие кецявтыть эйсэнзэ призёронь ды изницянь таркатнесэ. Теде башка, эрьва тевсэ покш лезкс важодемань пингстэ максы тензэ 8-це № школань прявтось Ольга Ветвинская, кона свал паро мельсэ кунсолосы эрьва тонавтыцянть мелензэ-арсеманзо.

Эряви тешкстамс, Людмила Анатольевна бажи оймензэ путомс эрьва эйкакшонтень ды важодемазонзо: кабинетэнть пурнызе-теизе весе сонсь. Эйкакштнень мартояк мезе ансяк а ютавтни: вастовомат, экскурсият, мероприятият ды ламо лия тевть. Тетятненьгак-аватненьгак сеедьстэ тердтни эйзэст. Секскак мельтемечи пельдест а неи. Паряк, сонсь Вере Пазось тензэ лезды – эрямозонзо свал кучни паро ломанть…

– Людмила Анатольевна, ёвтатано поздоровт ютазь юбилеенк кувалма! Шумбрачи тенк ды важодемасо ламо кеняркст! Свал мартонк улест малавиксэнк ды кинк лангс вастовост седеяк ламо паро ломанть!

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».