Суббота, апреля 13, 2024
Важное

Ютазь номерсэ минь пачтинек, кода Ульяновск ошсо келейстэ тешкстызь просветителенть А. Ф. Юртовонь чачома чистэнзэ саезь 170 иетнень. Те вастовомантень сакшность эрзят ды мокшот областень эрьва кодамо районсто: тонавтыцят, эйдень кужонь воспитательть, морсицят. Минь паро мельсэ теевинек содавиксэкс инжетнень марто.
Течи содавтадызь Димитровград ошонь «Автошка» 6 № эйдень кужонь важодицятнень марто. Сынь эсь тевест топавтомсто ламо мель явить раськень культурань койтненень. Лиякс а кода. Эдь эйдень кужосонть важодить зярыя эрзянь ават.

– Монь родсон-раськесэнь весе эрзят. Чачинь Димитровградсо, ансяк ундоксон Новомалыклинской райононь Ташто Велестэ. Школанть прядомадо мейле тонавтнинь поварокс, библиотекарекс, седе тов – воспитателекс. Ды уш кавксо иеть роботан эйдень кужосо. Пек тукшны мелезэнь. Эйдень кужосонть эйкакштнеде ламо – 300. Весемезэ 11 группа, эрьвасонть малав 30 эйдеть. Эрьва кодамо раськень: рузт, татарт, ветькеть, эрзят, мокшот. Сынст марто невтяно прянок эрьва кодамо этнокультурной пелькстамосо, тетятне-аватне каршо а молить, сынь чарькодить – весе те эряви, теньсэ мезеяк берянесь арась, – ёвтни Наталья Николаевна Князькина.

Сонзэ марто вейсэ воспитателекс важоди Наталья Ильинична Сударева.
– Эйдень кужосо важодян умок. Васня ульнинь нянечкакс, мейле тонавтнинь воспитателекс. Минек кужосо ветяви эрзянь келень коряс кружок, косо морыть эрзянь морот, ёвтнить стихть, киштить. Эйкакштне пелькстыть «Сиянь баягине», «Эрьгине» эрзянь ды мокшонь культурань областной конкурстнэсэ. Вейкесэнть сайсть васенце тарка. Кужосонть ставтынек тенст эрзянь мазый оршамопельть. Пек вечкить наряжамост ды лиснеме сцена лангс. Эйдетнень тердтнить ошонь ламо кенярксчитнес. Кужосонок паро коекс теевсь ёвксонь артомась. Ульнесь «Эрзянь ды мокшонь ёвкстнэнь геройть» артовксонь пелькстамо. Сынь васня ловность ёвкст, теде мейле артызь геройтнень. Эйкакштнень тетяст-аваст ютксо улить эрзяткак. Ошонь эрицятне уш содыть, тесэ явови мель эрзянь культурантень ды лемдить эрзянь кужокс. Кой-кить самай тень кисэ ускситькак эйдест миненек, – пачтясь Наталья Ильинична.

Эряви меремс, эйдень кужосонть панжсть вишка музей. Сынсь воспитательтне велестэ усксть эрьва кодат ташто ули-парот. Тесэ невтеви прялка, карть, пивтемпарь, нардамот, викшневкст, пацят, эрзянь оршамопельсэ ламо някат, книгат. Эйдетне вечкить ванкшномост.

Теде башка, аватне морсить «Вастома» самодеятельной ансамблясо. Сынь пурнызь сонзэ Димитровград ошонь эрзянь ды мокшонь раськень культурань автономиянть юрсо. Сонзэ вети вейсэндявксонь ды эйдень кужонь прявтось Анна Петровна Нуянзина. Аватнень ютксто ламотне вейке велень – Новомалыклинской райононь Александровкасто.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».