С. Д. Эрьзя лемсэ музеень Выставочной залсо ульнесь «Переложения, инструментовки мордовских народных песен в репертуаре оркестра русских народных инструментов» мастер-класс, конань анокстыцякс кармась РДНТ-сь. Мероприятиянть юрсо ютась Мордовия Республикань искусствань заслуженной деятеленть, тонавтыцянть, фольклоронь пурныцянть, аранжировщикенть, самодеятельной композиторонть Василий Сергеевич Родионовонь «Сире морось одонь вайгяльса» («Ташто морось одонь вайгельсэ») мокшонь ды эрзянь раськень моротнень пусмонь презентациясь.
Рузаевкань райононь мокшонь церась Василий Родионов – содавикс ломань минек республикасо. Сон пурны ды морси кода мокшонь, истя эрзянь моротнесэяк. Низэ Отяжелень Таразбуе велестэ. Секскак, моротнень, конатнень тосто маринзе, сермадынзе ды совавтынзе од моронь пусмонтень. Весе моротненень кочказель инстументальной оркестрань башка налксемань лув. Пурназь моротнесэ диалектэнь валтнэнь литературань норматнень коряс сермадомсто лездасть университетэнь филологтне.
Василий Родионов пек вечксы тиринь келензэ ды культуранзо. Натой книгань презентациянтень пурнась-тейсь цела концерт. А эдь те пек а шожда тевесь. «Штобу теемс моро, эряви покш ки ютамс: муемадонзо мейле сонензэ эряви теемс вадря аранжировка, муемс морыця, ды штобу моравлизь оркестранть марто эрявикс лувсо…», – евтнесь эсь тевдензэ Василий Сергеевич.
Од моронь пусмонтень совасть 11 морот, конатне алтазь фольклорной коллективтнень прявттнэнень. Презентациянть шкасто сынст морызь Мордовиянь содавикс артисттнэ ды творческой коллективтне. Налксесь тенст – Саранск ошонь округонь Культурань кудонь народной инструментэнь раськень оркестрась, конань ветицязо МР-нь культурань заслуженной важодицясь Игорь Петрович Шутов. «Кодамо моро минь моратано?» моронть морызе МР-нь народной артисткась Анна Атласова. Седе тов морасть Рузаевкань Палаевка велень мокшонь коллективесь ды Г. И. Сураев-Королев лемсэ «Келу» фольклорной ансамблясь. Весенень явшезельть сюкпрянь сермат.
Теде мейле Республикань раськень культурань кудонь важодицятне ютавтсть «Этнокультурное наследие как средство патриотического воспитания молодежи» лем ало семинар-практикум, конань анокстыцязо МР-нь культурань заслуженной важодицясь, «Мерема» фолк-группань, од ломанень ды эйкакшонь фольклорной коллективтнень ветицясь Екатерина Модина.
Теке жо чистэнть Республикань Культурань кудосо ульнесь киштемань коряс «Народный танец. Традиции и перспективы развития» мастер-класс. Ветицязо – МР-нь культурань заслуженной важодицясь, «Лейне» раськень киштемань ансамблянь ветицясь, С. В. Балабан лемсэ «Разгуляй» казаконь моронь ды киштемань ансамблянь прявт балетмейстерэсь Галина Хмаренко.
Мероприятиятнень инжекс кармасть Мордовиянь зярыя райононь Культурань кудонь важодицятне, конатне эсест творчестваст вельде тиринь велесэст ванстыть ды сюпалгавтыть раськень культуранть.
Марина Агафонова