Суббота, сентября 18, 2021
Важное

Валске рана, важодеме сыргамсто, ламот эйстэнек нолдыть телевизор. Зярыя иень перть уш Васенце каналонть ваномсто «Доброе утро» передачасонть минек васты мизолдыця, мазый тейтересь – ветицясь Ирина Муромцева.

Ирина аволь ансяк журналист, сон эряза блогер, инстаграмсо вети эсензэ лопине, косо ёвтни эсензэ эрямодо-аштемадо, семиядо, минек масторганть якамодо-пакамодо. Муромцева овсе а лови прянзо «тештекс», сон а покшкавтниця, паронь арсиця, вейкеяк сёрмадовкс а кады мельтеме, свал эли кучи «седейне», эли сёрмады каршо валт.

Ирина Муромцева чачсь 1978 иестэ Ленинградсо военнослужащеень семиясо. Школанзо прядызе Брянск ошсо, тонавтнесь Воронежень госуниверситетэнь журналистикань факультетсэ. Васенце каналс пачкодемадо икеле роботась ламо таркава: радиосо, НТВ-сэ, «Россия» телеканалсо. Ульнесь программань ветицякс, продюсерэкс, сон кавксть лиснесь мирденень, ней явозь, касты кавто тейтерть.

Ирина марто минь теевинек седе парсте содавиксэкс инстаграмсо, сон невтсь фотография, косо тешкстызе эсензэ роднянзо-раськензэ, покштянзо-бабанзо тиринь веленть – Ульяновской областень Покш Кувай веленть. Мон кучинь тензэ кевкстема: кие сон ундоксонзо коряс: руз эли эрзя, эдь Кувай веленть лемесь саезь эрзянь «кувака» валонть эйстэ. Теде кортави И.К. Инжеватовонь «Мордовской АССР-нь топонимической валкссонть». Тосо сёрмадозь: «Кувай лемесь саезь «кувака лей» валрисьменть эйстэ. Истят лемтне вастневить аволь ансяк Мордовиясо, шабра ёнкстнэсэяк, косо эрить эрзят ды мокшот. Невтемакс, Ульяновской областьсэ улить Покш ды Вишка Кувай велеть, Кувай лисьмапря ды латко, Кувайка лейне. Иринань сырькаезэ ды покштязо эрясть Сурской райононь Покш Кувай велесэ, икеле сонзэ лемдсть Старой Кувай, нетядо, лемеськак ёвтави эрзянь кортавксонть ладсо, аволь Старый. Те велесэнть, 2010 иень ловоматнень коряс, эрить 600 ломанть, эйстэст 87 проценттнэ – рузт, лиятне – эрзят ды аламошка чуважт. Нама, ютазь пингестэ тосонь эрицятнеде, конатне ловсть пряст эрзякс, ульнесть седе ламо, чарькодеви, ней сынь тосо весе рузыясть. Сестэ неть таркатне совасть Алатырень уездэнтень ды веленть маласо пек ламо эрзянь велеть. Кувайсэ, кода лия эрзянь велетнесэ, кезэрень пингетнестэ свал яксильть Кувай лисьмапряв пиземень вешеме, нетядо, эштё вейке тешкс эрзянь раськенть ёнов.
Иринань сырькаезэ ды покштязо кандтнесть Зюзюкинт ды Белянинт фамилиятнень, а содави корязост – рузт эли эрзят, эдь Ульяновской ёнксонь фамилиятнень коряс (аволь кода Мордовиясо) раськесь а неяви. Тосо уш весе човорявсть вейс. Ирина корты, сонзэ ули вейке ванстовозь фотографиязо, косо сырькаезэ ды покштязо оршазь кезэрень сокицянь-видицянь оршамопельсэ, чамань коряс сынь молить эрзя ёнов, ансяк сон зярдояк эзизе марсе бабанзо эрзякс кортамсто. Теке марто сон неизеяк сонзэ ансяк зярыяксть ды эйкакшпорасто. Бабазо ды покштязо од порасто тусть Покш Кувайсто паро эрямонь вешнеме, сынь эрясть тесэ вачочисэ ды эйкакшост уш чачтызь Сахалин усиясонть. Сырькаесь мирдензэ куломадо мейле велявтсь Ульяновск ошов ды эрясь тосо куломазонзо. Иринань авазо мезеяк а соды тетянзо-аванзо ундокстнэде. Сон одсто лиссь мирденень ды, кода офицерэнь ни, ардтнесь весе Союзонть келес, вастневемс аванзо марто шка пек арасель.

Иринань ули пек покш мелезэ содамс эсь малавикстнэде, сынст раськедест, койдест-кирдадост, сон кеми, родось ломаненть туртов максы покш вий. Муромцева ней вешни-аноксты «семиянь чувто» ды сонензэ пек эрявить раськедензэ од кулят. «Ули мелем эрямс аволь кода тетям-авам, роднянь-раськень апак сода», – корты ветицясь. Ирина пек кеми, верде покштятне-бабатне лездыть тензэ муемс ундоксонзо, ды кие соды, паряк, сынь кармить эрзянь?

Марина Девятова.
фотось саезь Яндекс.Дзен интернет-сайтстэнть

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».