Суббота, апреля 20, 2024
Важное

 

2023 иень апрелень 3-це чистэ Российской Федерациянь Президентэсь Владимир Путин сёрмадстсь Указ «Защитники Отечества» специальной военной операциянь участниктненень лездамга государственной фондонть теемадо. Маень 12-це чистэ те фондось ютась регистрация, маень 31-це чистэ сонзэ филиалось панжовсь Мордовия Республикасо.


Организациясь ашти Саранск ошонь куншкакуросо. «Защитники Отечества» фондонь отделениянь прявтокс Мордовиясо кармась Алексей Валентинович Герасименко, кона комсь иеде ламо макссь здравоохранениянь ёнкссонть важодемантень.

Кода мерсь Алексей Валентинович, фондонть прявт аравтлувось – боевой действиянь демобилизованной ветерантнэнень, истя жо Луганской ды Донецкой народной республикатнень милициянть юрс совицятненень (2014 иестэ саезь) государственной эрьва ёндонь лезксэнь максомась. Эштё вейке категориясь – чавовозь боецтнэнь семиятне. Тезэ кандовить нись эли мирдесь, кемгавксово иеде седе вишкине эйкакштне ды эйкакштне-инвалидтнэ, истя жо тетятне-аватне, конатне тиринь масторонь ванстыцянть чавовома шкантень эрясть мартонзо.

– Фондонть бажамось – «вейке вальмань» лувсо государственной эрьва ёндонь лезксэнь максомась, – тешксты Алексей Герасименко. – Лиякс меремс, ве таркасо важодить малав весе социальной министерстватне ды ведомстватне, теке марто Мордовия Республикава Россиянь Социальной фондось. Лезксэнть получамга а эряви ардтнемс ошонть келес ды вешнемс эрявикс учреждениянть. Весе эрявиксэсь максови минек фондсонть. Теке марто ломантненень аволь эстест весементь якавтома, эрьванть мельга кемекстазь социальной координатор – те сеть ломантне, конатне васенцекс вастовить боецтнэнь, сынст семиятнень марто, анокстыть эрявикс паспортонть ды теде мейле ушодыть важодеме вейсэ пшкадицятнень марто эли сынсь.

Нама, васняяк боецэнть улезэ боевой тевтнень ветеранонь лемесь. Фондось тень лангсо важоди. Эрявикс документтнэнь пурнамонть-анокстамонть коряс роботы государственной юридической бюрось. Бути боецэсь бажи муемс важодема тарка эли ютамс одс тонавтома, лезды Трудонь ды занятостень центрась. Бути пшкадицянть, седе пек боевой таркатнестэ велявтомадо мейле, улить посттравматической мелявкст, важоди психологонь, психотерапевтической лезксэнь кабинет. Инвалидностень кемекстамга, важоди медико-социальной экспертизань бюрось. Весе неть эрявикс ведомстватне важодить вейке таркасо – Мордовия Республикава «Защитники Отечества» фондонь региональной филиалсонть.

– Целанек жо кеме сюлмот минек улить од ломанень политикань ёнксонть, волонтёронь вейсэндявкстнэнь, «Комитет семей воинов Отечества» штабонть марто. Важодтяно республикань Культурань, Образованиянь ды Спортонь министерстватнень марто, – корты Алексей Герасименко.

«Защитники Отечества» фондонь региональной филиалсонть важодицятне явовить кавто покш пельксэс: фондонь эсест специалисттнэ ды социальной министерстватнень специалисттнэ. Омбоцетне важодеманть топавтыть эсь министерстватнесэ ды ведомстватнесэ. Фондонь важодицятне: прявт, кото полавтыцят (эрьва ёнксонть коряс) ды социальной координаторт. Кода мерсь Алексей Герасименко, неень шкасто истят координатортнэде зярс кемень, маласо шкастонть кармить комсьветее. Республикань эрьва районсонть карми социальной эсь координатор.

– Ансяк штобу примамс истямо специалист, сонензэ эряви ютамс тонавтнема Народной хозяйствань российской академиясонть, минек туртов те Нижней Новгородось, максомс экзамент, ютамс тестирования. Лиякс меремс, ютамс колмо этапт, ды ансяк теде мейле специалистэсь примави кода социальной координатор. Маласо шкасто минь учотано эштё кеветее истят важодицят, – ёвтни Алексей Валентинович. – Арсематнень коряс, социальной координатортнэ кармить саевеме седе товгак, секс што арсеви ладямс вейке социальной координатор боевой тевтнень сядо ветеранс, эли ниленьгемень инвалидтнэс. Сень лангс ванозь, зяро кармить само боецт, кармить ламолгавтовомо важодицятнеяк. Ней жо районсонть улезэ эсь соцкоординатор, конась, бути эряви, пшкадицятненень лездамга пачкоди куш кодамо велес. Теке марто ламо услугатне топавтовить дистанционна.

«Защитники Отечества» фондонь важодемань эштё вейке ёнксось – лецямопельтнесэ ды медицинань кедьёнкстнэсэ топавтомась, истят, кода высокотехнологичной протезтнэ, конатне а совить течинь государственной программатнень юрс. Истя жо лецямопельтнень коряс. Улить препаратт, конатне, паряк, эрявить боецэнтень, а сынь апак регистрирова Российской Федерациясо. Истят лецямопельтнень Фондось карми рамамо эрьва ломаненть туртов башка.

Медицинань ёнкссонть лия важодемась – минек стационартнэсэ ды санаториятнесэ лецямось, госпитальтнесэ реабилитациясь. Тесэ уш важодеманть ветить зярыя министерстватне ды ведомстватне: Минздравоськак, Социальной фондоськак, арсеви роботамс военной реабилитационной центратнень мартояк.

Важодемань эштё вейке ёнксось – Геройтнень лемест ледстнемга мемориальной лазтнэнь, Героень партатнень панжомась, мезень коряс роботась уш ветяви. Истя жо ветерантнэнь ине подвигест невтемась, штобу эрьва школасонть улевель эсь Герой, конась свалшкане важодевель эйкакштнень марто патриотической ёнкссонть – ёвтневель эсь ялгатнень ине тевдест.

– Ломантне пшкадить мелявтовтыця кевкстематнень коряс. Кие сонсь сы, кие гайневти телефононь пачк. Улить кевкстемат, конатне решавить куроксто. Невтемга, юристтнэнь лезксэст вельде сёрмадомс кодамояк яволявтома. Кой-конатне куроксто а топавтовить. Бути боецэсь кувать мартонок а сюлмави, сонзэ эряви муемс, лездамс тензэ кемекстамс боевой тевтнень ветеранонь лементь. Мейле уш ладямс мартонзо важодеманть. Ёнкстнэ эрьва кодат, важодтяно весементь коряс, – тешксты Алексей Валентинович.

Семиянек сыцятнень туртов Фондсонть ули налксемань нупаль, козонь мереви кадомс эйкакшонть ды сон карми вановт ало семс, зярс авась (семиясь) теи эсь тевтнень.
Боевой действиянь демобилизованной ветерантнэнень (кинь прядовсь контрактост Миноборонанть марто) лездамодонть башка, Фондось кеместэ важоди СВО-нь участниктнень ды сынст семиятнень марто. Ды истят пшкадицятнеде течинь чине седе ламо.

– Теезь фондось – те од ёнкс, конась вейсэндинзе эсь юрсо министерстватнень ды ведомстватнень тевтеемаст. Весе те теезь сень туртов, штобу, тей сазь, тиринь масторонь ванстыцятне ды сынст семиятне ве таркасо решавлизь весе кевкстемаст ды мелявксост. Минек икеле аштить покш тевть, конатнень топавтсынек! – кемекстызе Алексей Герасименко.

Мордовиясо «Защитники Отечества» фондонь региональной филиалонь аштема таркась: Саранск ош, Полежаевень куро, 113 кудо. Телефонось: 8(8342) 39-28-82.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».