Вторник, марта 19, 2024
Важное


А.С.Пушкин лемсэ Национальной библиотекасо ютась «Мезе кадынь мон тезэнь…» лементь ало творческой чокшне. Сон алтавсь МР-нь заслуженной поэтэнть Александр Араповонь чачома чистэнзэ 60 иетненень. Поэтэсь апак учне тусь эрямосто 2011 иестэ. Те ульнесь а ёвтавикс ризксэкс весенень, кие сонзэ содылизе кода ломаненть, кода поэтэнть. Авторось кадынзе мельганзо валонзо, конат эждить ды талновтыть ловныцятнень стихень строчкатнесэ, моротнесэ…
Те вастовоманть пурнызь «Сятко» журналось, сонзэ юрсо панжозь «Вал» эрзянь од автортнэнь курось, библиотекась, Эрзянь ды мокшонь раськень регионъютконь общественной вейсэндявксонь исполкомось. Ютась сон «Раськень каштанчи» проектэнть лувсо. Библиотекань важодицятне анокстасть книгань сюпав выставка. Тесэ невтевсть поэтэнть валморонь пусмонзо, стихензэ, конат лиснесть эрьва кодамо изданиясо.


Александр Араповонь ледстямо сакшность аволь аламо ломанть. Сынст ютксо поэтэнть тейтерензэ – Анна ды Александра. Сынь ёвтасть сюкпрянь валт те чокшненть ютавтоманть кисэ. Валост коряс, тетяст эрямонь кизэ нурькинель, ансяк сон кадсь мельганзо покш тевть. Исполкомонть пельде Араповтнень семиянтень максозь Благодарность.

 


Поэтэнть лембе валсо ледстнесть ламот: Эрзянь ды мокшонь раськень регионъютконь общественной вейсэндявксонь исполкомонь прявтось А.С.Лузгин, «Сятко» журналонь редакторось Т.В.Разгуляева, МР-нь Писателень союзонь прявтонь тевтнень топавтыцясь, «Чилисема» журналонь редакторось Н.И.Ишуткин, МР-нь заслуженной поэтэсь А.А.Громыхин, «Эрьмезь» чувтосто керсицянь вейсэндявксонь прявтось П.В.Рябов ды лият.
Теде мейле казевсть сеть ломантне, конат пелькстасть «Сятконь» акциясонть: эрявсь ловномс Араповонь стихть, теемс видеоролик. Истя, васенце тарканть саизе Марина Слугина, омбоценть – Валентина Комендантова, колмоценть – Раиса Щанкина.
Лембе валтнэде башка, невтезель концерт. Сонзэ анокстызе Николай Карпов. Од цёрась седейшкава, ёжомарязь ловнось Араповонь стихензэ ды, гитарасо седязь, морась моронзо. Ламонь эзть кирдеве сельведест. Кодат виев валт ёвтась поэтэсь, кода токасть эрьванть оймензэ!
Поэтэнть кабинетэсь чуросто эрсесь чаво. Тесэ литературадо ды эрьва мезде лиядо кортамотне мольсть чокшнес. Александр Васильевич макснесь эрявикс превс путомат од ломантнененьгак.
Вана кода Александр Араповдо ледстни эрзянь поэтэсь, Оренбург ёнксонь Бугуруслан ошонь эрицясь Дмитрий Таганов, конанень Арапов макссь литературань тевтнесэ ламо превс путомат:
«Эрзянь литературанть марто седе парсте содавтомась монь туртов ушодовсь кеветее иесэ. Сестэ эринек Оренбург ёнксонь Северной райононь Боризвелесэ. Минь карминек сёрмадстнеме «Сятко» журналонть, ды мон «нилезь нильнинь» весе сёрмадозенть, апак кочксе. Ды кодамо мельспаро тень ульнесь, зярдо карминь панжомо эсень туртов эрзянь литературань мазый ды паро лемть, конатнеде теде икеле эзинь марсе вестькак. Нама, седе пек мелем явсть валморотне ды сынст сёрмадыцятнень арсемаст.
Ламо астувтовикс валрисьметь пезнасть удемс-оймес се номерстэнть, конасонть мон васенцеде вастовинь Александр Араповонь стихензэ марто, се шкастонть ушодовсь тунь лия марямосо эрямо. Сонзэ стихтне истя явовсть лиятнеде, истя совасть оймес-ёжос, ульнесть эрямосто саезь, малавикст, усксть-таргасть ойменть менельс! Эйсэст пелесь шождаль – «теке валнэ», ловось ваньксэль – «прок одирьвань онт», эйсэст кортамось мольсь малавикс ломанде ды истя, потмаксос валгозь, седеень панжозь, кода монень маряви, кияк теде икеле мартон истя эзь корта: чарькодевиксстэ ды седейшкава…
Теде икелеяк терявтнинь стихень сёрмадомо, куш а пек парсте содылинь сёрмадомань койтнень. Теде мейле, зярыя иень сёрмадовксон таштазь, кучинь сынст «Сятко» журналонь редакцияв, видьстэ меремс, тунь паро валонь апак учо. Ансяк курок сась тень сёрма, ды сон ульнесь аволь киньгак – эсензэ Александр Араповонь пельде! Зяро паро валт, кемевтема ульнесь эйсэнзэ… – теде мейле а кодаль а поладомс сёрмадома тевенть.
Сёрма марто конвертэнтень Саша путызе эсензэ «Вайгель» книганзо. Минь ловнынек сонзэ семиянек, ды эрьвантень токась се эли тона стихесь. Тетянь мельс, нама, сехте пек тусь «Сезян куяр» содавикс валморось. Oмбоце чистэ сон ловнось эйсэнзэ верьга вайгельть велень колхозонь правлениясо весе пурнавозтнень икеле! Кить кунсолость – энялдсть ловномс лия стихтькак, ды эрьвась мукшнось эйстэст седеензэ туртов эрявикс валт…
Теде мейле, кавтошка ковонь ютазь, монень савсь васенцеде понгомс Саранскоев. Якшамковонь потмура чистэ, талнозь, кузинь ташто Печатень кудонь нилеце этажов крута кузтематнева. Пряпотсонть мельтне чаразь чарасть. Эдь неть кузтематнева аволь весть кузсть-валгсть сеть ломантне, конатнеде арсинь теке менелень эрицядо! Ды вана сон, нилеце этажсо редакциянь коридорось. Тесэ эри, токны, чави, киторды минек литературань седеесь, сонзэ ванстыця лавсесь! Пелезь совинь се нупалентень, косо ульнесь поэзиянь отделэсь. Монь ёнов варштась панжадо сельме, сэрей коня цёра ломань, кода-бути сеске чамасонзо налксезевсь чевтедеяк чевте мизолкс, ды истямо жо чевте вайгельсэ сон пшкадсь:
– А, те Дима Таганов сась! Шумбрат! Ютак!
Минь кутмордынек прок умок содавикс ялгат, конатнень кие соды, мекс эрямонь вармась кандтнесь ве ёнга ды вана, окойники, вастовсть. Сон мерсь монень сеске меремс тензэ Саша, ды тусь кортамось. Кортынек-басинек весемеде, седе пек, нама, сёрмадома тевденть. Мон учинь превс путомат, кардамот, паряк, кува-кува сялдомаяк. Ансяк мезеяк истямо эзь ульне вестькак, сон маштсь тонавтомо апак тонавто, шнась вадрянть ды кортась а пек вадрядонть истямо лувсо – эстеть сеске кода-бути теевкшнесь а ён теезенть кувалма ды уш анок ульнить чиемс витеме апаро теевкстнэнь… Се чистэнть саезь монь кармась улеме од ялгам. Ды те ялгаксчинть мейсэяк эзинек колакшно.
Пародояк паро поэтэкс улезь, Саша зярдояк эзизе кадно од сёрмадыцянь вешнеманть. Пек ванстозь, мельспаросо, сон вастнесь истят ломантнень, пек пельсь коламо ушодыця сёрмадыцянть мелензэ. Сонзэ те педагогикань ванстыця лувось кастсь минек поэзиясонть зярыя паро лемть. Те сонзэ шкинема пизэстэнть лиссть, морыця нармунекс ливтясть Любовь Дергачёва, Людмила Рябова, Марина Слугина, Мария Ерёмина ды зярыя лият, кить ней муизь таркаст эрзянь литературасонть. Ламова сынст изнявкстнэ аштить сонзэ вановттонть, лездамодонть, тонавтомадонть.
Зярдо сась шка теевемс «Сятко» журналонь прявтокс, кие ёвты, зярошка стакачи марто вастовсь сон. Ливтиця ойме, келес панжадо седей поэтэнтень пек стака ульнесь топавтомс администраторонь тевтнень. Творческой коллективесь, теке мазый цецясто кодазь кумбо, паролкссто невти вечкевикс викшневкст, а ингелькссэнть – сядот-сядот сюлмот, путлявомат… Эрьванть марто эрявсь муемс кель-вал, чарькодема, покордамовтомо чарькодема, лиясто ёжовчиськак эрявсь, лиясто казямочиськак. Тень содасак ансяк те таркасонть улемстэ, ды ве ёндо лиясто а пек чарькодеви се эли тона сонзэ арсевксэсь. Минь сеедьстэ кортнинек мартонзо тень коряс – сонензэ алкукс стакаль кандомс те канстонть. Теке марто а кода ульнесь а редямс журналонть паролгадома ёнкстнэнь, од жанратнень совамонть, ламо од лемтнень чачоманть, зярыя стувтозь лемтнень вельмевтемаст. «Сятконь» школась апак лотксе тейсь тевензэ.
Меельце вастовоманок ульнесь 2011 иень тунда. Мон тевень коряс сынь Саранскоев, икелепелев апак ёвта, муия Сашань редакциянь кабинетстэ, косо сон важодсь од номерэнть лангсо Андрей Алёшкин художникенть марто. Кода свал, вастовинек пек мельспаросо. Кортынек ламодо. Саша ёвтнесь содавикс бардонть Олег Митяев марто кортнемадонть, невтнесь сонзэ моронь ютавтовкстнэнь, од авторонь сёрмадовкстнэнь… Чись ульнесь манейде маней ды истя ламонь алтыцякс… Мейле туинь тевень коряс. Туемадо икеле вастовомс тенек эзь удала, истяк телефонга простнинекак. Кортынек теде мейле весть телефонга… Кавто таргонь ютазь мария сонзэ апак учонь куломадо кивень сталмосо кулянть… Вере Паз! Кодамо вачкодьксэкс те тень ульнесь!
Пек аламо шка ютась сонзэ туема чистэнть! Пек аламо се шкадонть, кона састыне-састыне вельтясы, таргасы керявксонть, оймавтсы седей сэредьксэнть: «Ютыть стака шкатне, ютыть зярдояк…». Вейкесь ёвтави апак кавтолдо – свалшкас минек литературантень кадови а мадиця сонзэ валдозо, сонзэ вадрядояк вадря поэзиязо, седейлембезэ…»

Анокстызе
Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».