Вторник, марта 19, 2024
Важное



Якшамковонь 17-це чистэ Республикань Кудосо пурназель торжественной вастовома, кона алтавсь Россиянь Печатень чинтень. Республикань журналисттнэнень поздоровт ёвтась Мордовиянь Прявтось Владимир Волков.

Региононь Прявтось тешкстызе СМИ-нть эрявиксчинзэ обществанть эрямосо ды кемекстызе, журналисттнэнь профессиональной важодемаст лезды властентень эрязасто редямс ды решамс пшти кевкстематнень, лезды республиканть касомасо-виензамосо.

Кемекстазь коень коряс, СМИ-нть марто вастовомасонть Владимир Волков ёвтнесь важодемасо прявт ёнкстнэде. Ды кода мерсь республикань Прявтось, васняяк сынь кармить сюлмавозь сеть кевкстематнень марто, конат кемекстазь Россиянь Президентэнть Федеральной Собраниянтень Кучомасонть.

– Президентэсь кемекстызе вановтонть эсь масторонь мелявкстнэнь лангс. Сехте прявтсо – ломантнень эрямост вадрялгавтомась, – мерсь Владимир Волков. – Покш мель государствань Прявтось явсь демографиянь тевтненень. Республиканть туртов те истя жо прявт кевкстема. Миненек эряви эскельдямс 90-це иень демографиянь прамонь мелявкстнэнь, теемс весементь Мордовиянь эрицятнень ламолгавтомга.

Тешкстасынек, Россиянь Президентэсь ёвтась зярыя ёнкст кажовсто эрицятнень аламолгавтомга, аватненень-эйкакштненень лезксэнть явомга, авань капиталонь программанть домкалгавтомга, од ды ламо эйкакшонь триця семиятнень доходост кастомга. Демографиянь тевтнень покш мелявксокс Владимир Путин ёвтызе ломантнень доходтнэнь аламочинть.

– Маласо вете иетнень перть минь весе вийтнень путсынек ломантнень доходост кастомантень, – тешкстызе Владимир Волков. – В.В.Путин кармавты келейгавтомс роботанть социальной контракттнэнь лувсо лезксэнь максоманть коряс. Тесэ башка мель карми явовомо вишка доход марто ломантненень. Мордовиясь сови сеть регионтнэнь юткс, косо истямо робота уш ветяви. Те иестэнть неть тевтнес республикантень явовить 317 миллионт целковойть. Социальной контрактонть вельде миненек эряви вадрялгавтомс малав 3 тёжат ломантнень эрямост. Истя жо Президентэсь ёвтась совавтомс эрьва ковонь пандомат 3 иестэ саезь 7 иес эйкакштненень. Сынст кармить получамо семиятне, кинь доходост эрьванть лангс эрямонь минимумдонть седе аламо. Мордовиясо истят семиятнеде лововить малав 5,5 тёжат, косо трявить-кастовить малав 15 тёжат 3-7 иесэ эйкакшт.

Кучомасонть государствань Прявтось тешкстызе регионтнэсэ эйдень кужотнесэ яслянь таркатнень теемань коряс берянь роботанть. Кода мерсь Мордовиянь Прявтось, минек республикасо истямо мелявкс арась.

– 2019 иестэ Мордовиясо стявтозь эйдень кавксо од кужот, теезь яслянь 915 таркат, – кемекстызе Владимир Волков. – 2021 иенть прядовомс минек а кармить очередть эйдень кужотнес 3 иес эйкакштнень коряс. Тень туртов республикасонть кармить теезь эйдень кемголмово кужот.
Семиятнень туртов покш лезксэкс кармась авань капиталонь программась, кона тевс нолдави 2007 иестэ саезь. Те шканть перть Мордовиясо максозь 44 тёжадо ламо сертификатт.
– Президентэнть арсемазо авань капиталонть покшолманзо кастоманть ды уш васенце эйкакшонть кисэ пандоманть коряс пек паро. Кеман, те пек лезды демографиянь тевтнень паролгавтомасо. Теке марто эйкакш марто семиятненень те седе шождалгавтсы эрямо таркань рамамонть, – мерсь Владимир Волков.
Мордовиясо малав 90 % семиятне, кить авань капиталонь ярмактнень уш нолдызь тевс, ютавтызь сынст эрямонь условиятнень вадрялгавтомантень. Те малав 11,5 миллиардт целковойть.
– Рамавиця эрямо таркатнень теемась – прявт ёнкс маласо иетненень минек туртов, – мерсь республикань Прявтось. – Башка ёнкс тесэ саить ипотекань программатне. Невтемга, велетнень касомань-виевгавтомань од программанть ды велень льготной ипотеканть вельде минь арсетяно 2-3-ксть ламолгавтомс велесэ эрямо кудотнень строямонть. Ды те сехте вадря ёнкс врачтнень, фельдшертнэнь, тонавтыцятнень ды велесэ эрявикс лия специалисттнэнь эрямо таркань коряс мелявксост решамосо.

Бути кортамс здравоохранениядонть, тесэ Мордовиясь ушодсь покш робота первичной звенанть вадрялгавтоманзо коряс.
– Минь малав васенцекс анокстынек здравоохранениянь первичной звенань вадрялгавтомань коряс региональной программанть. Ютавтозь «первичкань» инвентаризациясь – зяро минек объектэнек, кодамо вадрячист, кодамо оборудования а саты, улить-арасть кадрат, – мерсь Владимир Волков. – Ламо арсеви теемс тедеде. Бути ютазь иестэ минь панжинек фельдшерэнь-акушерэнь колмо пунктт, тедеде эряви панжомс 72 ФАП-т ды врачебной амбулатория Ковылкина ёнксонь Троицкое велесэ. Тенень явовить малав 350 миллионт целковойть. Теде башка, медицинань лезксэнь максоманть туртов рамавить 33 мобильной комплекст – мобильной ФАП-т, маммографт ды мобильной стоматологиянь установкат. Нацпроектэнть юрсо мобильной ФАП-тнень рамамс арсеви ютавтомс 280 миллиондо ламо целковойть.
Кучомасонть Президентэсь башка кортась тонавтоманть вадрячинзэ кастомадо, тонавтыцятнень социальной статусонть кемекстамодо. Классной руководительтнень зарплатаст кастомась, кода мерсь Владимир Волков, токасы малав 60% региононь весе тонавтыцятнень эйстэ.

Кучомань эштё вейке ёнксось – начальной школань тонавтницятнень туртов стякодонь ярсамось. Республикань Прявтось мерсь, те кевкстемась пек эрявикс.

Истя жо Кучомасонть кортавсь вузтнэсэ бюджетэнь таркатнень ламолгавтомадо. Ды тесэ башка мель явови регионтнэнень.
– Президентэсь мерсь уш тонавтнемань од иестэнть полавтомс примамонь лувонть медицинань специальносттнень коряс, – пачтясь республикань Прявтось. – «Лечебное дело» специальностенть коряс бюджетэнь 70 % таркатне кармить целевойть, «Педиатрия» специальностенть коряс – 75 %. Целевой примамонь коряс квотатне кармить теевеме регионтнэнь яволявтомаст коряс. Кеман, весе арсематне ды тешкстамотне, конатнень Россиянь Президентэсь ёвтынзе Кучомасонть, эрямос совавтовить уш маласо шкастонть ды максыть вадря невтевкст. Мордовиясь жо тенень путсынзе весе вийтнень.
Президентэнь кармавтоматнень топавтомасо прявтокс жо аштить вадря экономикась ды финансонь кеме системась.
– Ярмаконь стакачитнень лангс апак вано, 2019 иестэ минь теинек экономикасо истят касовкст, кодат республикасонть эштё арасельть, – мерсь Владимир Волков. – Ютазь иенть коряс малав весе отраслятнесэ минь редятано вадря динамика, теке марто промышленностьсэнть, строительствасо, велень хозяйствасо.
Теде башка, 2019 иестэ васенцеде удалась вишкалгавтомс Мордовиянь госдолконть (сеске 10 %, пандозь 5 миллиардт целковойть).
Седе тов республиканть касомазо-виензамозо карми ламосо аштеме нацпроекттнэнь тевс нолдамонть эйстэ. Ансяк ютазь иестэнть национальной проекттнэнь лангс явозельть 11 миллиардто ламо целковойть. Ды весе ярмактне ютавтозь социальной эрявикс кевкстематнень решамонть лангс, конат седе пек мелявтовтыть эрицятнень.

– Национальной проекттнэ Мордовиянть туртов – ёнкс талновтыця мелявкстнэнь решамосо, федеральной ярмактнень получамс сеть проекттнэнь лангс, конат эрявикст республикань весе эрицятнень туртов. Секскак СМИ-нть пельде минь учотано седе покш робота нацпроекттнэнь ланга эрицятненень ёвтнеманть-пачтямонть коряс, – кемекстызе республикань Прявтось.

Профессиональной кенярксчинть коряс журналисттнэнень максовсть государственной казнеть ды истя жо тешкставсть Мордовия Республикань Прявтонь журналистэнь конкурсонь изницятне. Истя, «ИнтоНАЦИЯ» пелькстамосонть минек «Эрзянь правда» газетань прявт редакторонтень Марина Николаевна Девятованень максовсь омбоце таркась. Кенярдтано минек ялгатнень, раськень СМИ-сэ важодиця журналисттнэнь кисэяк, конатнень ютксо «Мордовия» ГТРК-нь «Сияжар» куронь шеф-редакторось Ольга Чернова, «Народное телевидение Мордовии» каналонь специальной корреспондентэсь Лина Буянкина, «Вайгель» радиопрограммань редакторось Светлана Пивкина, «Мокшень правда» газетань корреспондентэсь Татьяна Альшина, «Юлдаш» газетань редакторось Камиль Тангалычев. Теке марто Мордовия Республикань Почётонь грамотасо тешкставсь «Мордовия» ГТРК-нь «Сияжар» куросо важодицясь Елена Полшкова. А вана «Лауреат литературной премии Главы Республики Мордовия для молодых авторов» лемесь максозь эрзянь кельсэ од сёрмадыцянтень, Н.П.Огарёв лемсэ МГУ-нь филологиянь факультетэнь тонавтницянтень Алеся Клементьеванень.

«Эрзянь правда» газетань важодицятне ёвтыть весе изницятненень поздоровт, «пшти» пера ды седе ламо од сёрмадовкст.

Юлия ЕРЕМИНА
Фотось Э.Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».