Н. П. Огарёв лемсэ МГУ-нь филологиянь факультетэнь студенттнэ мартонь 12-це чистэ пачколесть Покш Березникень райононь кезэрень Парынзэлев, косо наукантень алтазь мероприятиясь теевсь сынст туртов алкуксонь кенярксчикс.
Ладязь коенть коряс, Парынзэлень аватне вастызь инжетнень кши-сал марто. Теде башка, Мастянзо кисэ панезельть тантей пачалгсеть ды кургс солыця оришкат. Орта лангсо «Парынза» ансамблясь гармония марто морась ёжонь кепедстиця нурька морынеть, а вана «Коень кудонь» азорось Евгений Ледяйкин ютавтсь эрзянь кезэрень кудованть мельстуиця экскурсия. Студенттнэ кармасть содамо, кода сядодо ламо иесэ чувтонь кудось те шкас истя парсте ванстовсь – тенень, келя, лезды пичеоесь, конасо сотавтозель эрьва чувтось. Кудонть потс совамсто весе маризь лембе каштомонть ёжонзо, конавтомо кезэрень ломантне ве чияк эзть эря. Ды лиякс а кодаль, эдь каштомось аволь ансяк андыцяль-симдицяль, сонзэ калязь кирпецтнень лангсо пансесть орматкак. Вете валдо вальмас икельце кудосонть аштить столь, чевте удома тарка, чувтонь келей эземть. Потолоконтень кечказ вельде понгавтозь лавсь. Те нупальсэнть сыретнеде башка, удсесь весе семиясь, валдоне аватне викшнесть, стасть-кодасть …
Омбоце кудось, кона невтезель инжетненень, ульнесь «Артыцянь кудось». Тесэ кудыкелев совамсто уш весень вастыть мазый артовкстнэ, эскизтнэ, пейзажтне ды лия важодевкстнэ. Ютазь кизэстэ тей тердезельть од артыцят Пензасто, Ульяновскойстэ ды Саранскоень Ф. Сычков лемсэ училищасто. Евгений Ледяйкин эсь сельмсэнзэ неизе, кодамо те а шожда роботась – артомс картина. Артыцятне якасть велеванть, паксява, вешнесть эстест мельстуиця таркат, кувать арсесть сюжеттнэнь лангсо ды ансяк теде мейле ушодыльть артомо. Эрьва картинанть лангсо важодемась моли кувать. Те шкасто эряви ламо цидярдомачи ды эсь тевень вечкема. Артыцятненень весемесь удалась. Ды вана ней сынст картинатне мазылгавтыть Культурань кудонть.
«Артыцянь кудосто» студенттнэ паро мельсэ напустясть Сактей лемсэ ашо алашанть вадяшамо. Эрьвась тейсь мазыйканть марто ледстнемань фото. Совсесть «Лишме мельга якицянь кудынентеньгак».
Мельстуиця экскурсиядонть мейле весе тердезельть Культурань кудов. Тесэ, Людмила Петровна Храмова тейтертненень, васняяк, ютавтсь викшнемань коряс мастер-класс. Невтинзе эсь кедьсэ кодазь носкатнень, конатнень лангсо мазылгалесть Мордовиянь тешкстнэ. Людмила Петровна ёвтнесь, артельсэнть важодить 12 ават. Мелят СВО-нь боецтнэнь туртов сынь кодасть 200 парат носкат. Аватне важодить апак лотксе. Ломантне кедьстэст секе тев рамсить понань сурестэ кодазь неть лембе мазыйкатнень. Тешкстама, лався лангсо аштицят веенсткак арасть – весе миевкшныть.
Теде мейле инжетне тердезельть актовой залов, косо «Новое село» велень виевгавтомань эрзянь-мокшонь региональной общественной организациянь, Н. П. Огарëв лемсэ филологиянь факультетэнь ды А. С. Пушкин лемсэ библиотекань важодицятне ютавтсть В. С. Брыжинскиень шкинеманзо коряс научно-педагогической ловномат. Василий Сергеевичнень тедеде топодсть 90 иеть, путовксозо минек культурантень а онкставикс, секс ульнесь мезде кортамс. Ловноматне ютавтовсть «Иероглифы мордвы. Символы древней письменности в орнаментах и родовых знаках, языковые особенности формирования образов в литературном слове и устно-поэтическом наследии» теварсевксэнть лувсо, кона топавтови Культурань инициативатнень Президентэнь фондонть лезксэнзэ вельде.
А. С. Пушкин лемсэ библиотекань важодицятне анокстасть «Эрзянь ойме, валдо прев» В. С. Брыжинскиень книганзо коряс выставка, ëвтнесть эрямодонзо ды шкинемадонзо. Василий Сергеевич – РФ-нь заслуженной роботник, РФ-нь Театральной деятелень союзс совиця, РФ-нь Журналистэнь союзс совиця, Н. П. Огарёв лемсэ трудонь ветеран, искусствоведениянь кандидат, профессор, содавикс театральной критик, эрзятнень-мокшотнень раськень театрань койтнень-кирдатнень ванкшныця-тонавтниця, режисёр, педагог. Башка кортазель «Каргонь кинь ломанть» колмо томсо сагадонзо, конантень «кельгстязь» историястонок кавто пингень шкань пельксэсь: Емельян Пугачевонь восстаниясто саезь Ине Отечественной войнас. Тиринь масторонь кис тюрематне сагасонть невтевить Кочкуровтнень кудораськест вельде.
Мордовиянь Культурань, национальной политикань ды архивень тевень министерстванть пельде кортась А. М. Кочеваткин, Эрзянь-мокшонь исполкомонть пельде – Т. И. Ларина. Ю. Г. Антонов ды филологиянь факультетэнь студенттнэ ловнызь научной важодевксэст, конат алкукс явовтыть мель. Истя, 3-це курсонь студентканть Екатерина Кабаевань ванномазо алтазель образной тешкстнэнень (символикантень) – тундонь койтненень-кирдатненень – те норовжорчкень пидематне-панематне, тундонь сеерематне ды седе тов, конат те шкас ванстовсть ламо велетнева. «Парынза» ансамблясь морась тундонь морынеть, мейсэ кемекстызе ёвтазенть. Ковкерьксэнь коень ютавтоматнень вельде ломантне кармить содамо эсь раськень историядо.
Омбоце курсонь студентканть Александра Сидоровань «Символико-содержательная классификация детских и молодёжных игр книги В. С. Брыжинского «Мордовские народные игры» важодевкссэнзэ башка тешкстазь эйкакшонь ды од ломанень эрзянь-мокшонь раськень налксематне, конат кадовсть покштятнень-бабатнень пельде. Раськень налксематне тонавтыть эрямос, эйсэст неяви пингень перть таштавозь сюпавчись, секскак сынст эрявить ванстомс ды ёвтнемс эйстэдест шабра раськетнененьгак.
Филологиянь факультетэнь 2-це курсонь студенткась Анастасия Колесникова кортась «Детская драматургия В. С. Брыжинского: синтез этнического начала и авторского вымысла» теманть коряс. Эйсэнзэ домкасто ваннозельть эйкакштнень туртов сёрмадозь раськень пьесатнесэ койтне-кирдатне. «Мифо-фольклорный контекст драматической саги В. С. Брыжинского «Каргонь кинь ломанть» («Люди журавлиной дороги») лементь ало докладонть ловнызе 4-це курсонь студенткась Юлия Веретенникова. Тешкстама, «Каргонь ки» валтнэнь ёвтамсто эрзятнень мельс сеске сы космоссо минек галактикась, конадо рузтнэ мерить «Млечный путь». Ансяк рузокс валдо валс сагань лементь ютавтомсто лиси – «люди журавлиной дороги». Ды тесэ смустесь калады. Рузонь ломаненть мельсэ-превсэ сти допрок лия картина – менельга каргтнень мельга ливтямо «кись». Самай истямо лемтнесэ неявияк «Иероглифы мордвы. Символы древней письменности в орнаментах и родовых знаках, языковые особенности формирования образов в литературном слове и устно-поэтическом наследии» теварсевксэнть зэмезэ – панжомс лия раськень ломантненень эрзянь валтнэнь алкуксонь смустест. А зяро истят смусттне кадовить кекшезь?
Истят лиятнень ёнов а молиця устно-поэтической образтнэнь вельде неяви ломанесь, сонзэ эрямозо ды арсеманзо. Кода содамс эрзянь ломаненть оймензэ, бути истямокс эзить чачо? Мезекс эряви ванстомс культуранть ды тонавтнемс эрзянь келенть? Неть кевкстематнень лангс вешнияк каршо валт вере ёвтазь теварсевксэсь.
Паряк, тесэ лезды театраськак? Апрелень 5-це, 7-це ды маень 3-це читнестэ Рузонь драмань театрасо В. С. Брыжинскоень саганзо коряс невтеви «Люди журавлиной дороги» спектаклясь.
«Иероглифы мордвы» теварсевксэнть туртов научно-педагогической ловноматне ульнесть васенце эскельксэкс прявт тевентень, кона ашти литературной келенек ды фольклоронок башкачинзэ тонавтнемасо. Теварсевксэнть прядовомсто сехте паро важодевкстнэнь арсеви нолдамс башка книгасо.
Марина Агафонова