Вторник, марта 19, 2024
Важное

 

Ней уш аламо вастат алкуксонь тонавтыцят, конат весе седеест максыть эйкакштненень. Сынь ризныть ды мелявтыть тонавтницятнень кис, лездыть, максыть домка содамочить аволь ансяк тонавтомасо, эрямонь тевтнесэяк. Ды кадык тонавтницяст умок уш прядызь тонавтнемаст, теевсть покш ломанекс, кой-кить сынсь кармасть педагогокс, ялатеке кирдить кеме сюлмот превс путыцяст марто.

Истят ломантнеде, кода Валентина Михайловна Прокаева, кортыть – Тонавтыця покш буквасто. Сон 42 иень перть важоди Республикань музыкальной школасо-интернатсо, тосо, косо сонсь зярдо-бути тонавтнесь.

– Валентина Михайловна, ёвтнеде, косо тынь чачиде-касыде?

– Мон чачинь Орданьбуень Чукало велесэ. Кавксо эйкакштнень ютксо ульнинь сисемецекс. Авам, Екатерина Ивановна Стенькина, чачсь 1920 иестэ. Прядсь колмо класст. Пек превеель, ламо мезе кирдиль мельсэнзэ ды а стувтыль. Сестэ минь яла радио вельде кунсолынек передачат, спектаклят. Сон весе содылинзе, чарькодиль, мезе-кода. Муиль вейкетьксчить ломантнень ды литературань геройтнень ютксо. Мериль яла: «Тон – теке футлярсо ломанесь!» (Чеховонь). Кадык эзь прядо вуз, сон ульнесь превде валозь, рузтнэ мерить, мудрой. Нейгак авань валонзо ледстнян, цитатакс эйсэст ёвтнян. Пек ризныль, бути косояк лисиль зыян: велесэнек эли масторсонок. Авам пек эрязаль. Од шкане лишме лангсо ласте ардтнесь.

Тетям – Михаил Васильевич Князев, чачсь 1922 иестэ. Авань марто эрясть ве ульцясо кудонь трокс. Ансяк урьвакстсть, эрямояк вейсэ эзть кенере – ушодовсь Ине Отечественной войнась. Авам кадовсь солдаткакс. Тетям кудов велявтсь 1947 иестэ. Вейке-омбоце мельга чачсть эйкакшост. Сон ламо ёвтнесь войнадо, ансяк киньгак превс эзь са сёрмалемс ледстнеманзо. Фронтсо вастовсь минек Чукало велень ломань марто, те ульнесь Пётр Фомич Кучаев, сынь вейсэ тюрсть ятонть каршо. Мейлеяк эрясть покш ялгаксчисэ!


Тетям пингензэ перть роботась колхозсо трактористэкс. Ледстнян, кода колхозонь важодицятненень тетям-авам пидсесть обед. Кудо вакссо лисьма маласо кавонест ватксильть модамарть, чурькат, пидильть сывельям. Эстест зярдояк сывелень палнэ эзть сайне, монень маряви, натой мельсэсткак истямо арасель! Пельсть чалгамс шабрань межас, шабрань пирес. Авам зярдояк кидеяк беряньстэ эзь корта, эзь сёвнокшно шабратнень марто. Минекак тонавтсть роботамо, зярдояк эзинек аште тевтеме. Кирдинек скал, реветь, тувот, дигат, саразт… Анокстынек тикше, олгот, сюват. Тетям-авам 72 иес трясть скал.
Стака ризксэсь эзь юта кудонок вакска. Вишка шкане колмо иесэ оспадо кулось Коля ялакскенек. Тетям лишмесэ ускизе больницяв, тосо эзизь сае – карантин. Тетям янксесь: эрявсь кадомс эйденть больницянь кузтемпес, паряк, идевлизь… Велявтсь Чукалов, чинь-кавтонь ютазь эйкакшось кулось. Авам мериль: «Вай, кодамо апаро тень ульнесь, марявсь, мондень пайстомо масторлангсонть кияк арась». Мейле, 1984 иестэ, таго вачкодькс. 20 иесэ авариясо чавовсь Юра ялаксонок. Пек мазый ульнесь, ансяк-ансяк велявтсь армиясто, ушодокшнось тонавтнеме Саранскойсэ подготовительной курссо. Сонзэ ледстнемга зярыя малавиксэнек цёраст лемдизь Юракс. Авам эрясь 82 иеть. Тетям кулось 2012 иестэ 90 иесэ. Велесэ кудонок апак кадо, сакшнотано тов свал.

– Кода понгиде тонавтнеме Саранскоев?

– Авам пек бажась минек тонавтомс. Малав весень улить образованиянок. 1969 иестэ школазонок сакшнось Саранскоень музыкальной школасто-интернатсто комиссия. Тосо ульнесь Пиксяськань авась Зинаида Яковлевна Фомина, сон важодсь интернатсо воспитателекс ды сольфеджионь педагогокс. Весе эйкакштнень пурнымизь вейс, кунсолымизь, кинь кодамо музыкань марямозо, морамозо. Мон морыя «Огромное небо» моронть. Эряви меремс, интернатсонть уш тонавтнесь Тоня сазором ды зярыя минек велень эйкакшт. Истя, колмонек Чукалосто саимизь. Мон прядынь 3-це класс, вейксэ иеть тень ульнесть, пиже эйкакш! Минек туртов те ульнесь покштояк покш тевекс. Интернатсо тагояк весень ванкшнымизь: макссть заданият, сёрмадынек диктант. Кото иеть тонавтнинь музыкальной школасо-интернатсо домра классонь коряс. Мон ёвтан покш сюкпря школантень. Сестэ тесэ ульнесь лия система ды пек паро условият. Пек вадряль хоронок, оркестранок. Рамсесть тенек натой оршамопельть-карсемапельть, концертэнь костюмт. Весе эйкакшпингенек ютась концертсэ. Апак лотксе морсинек-сединек Саранскоень весе сценатнень лангсо, содылинек ламо артисттнэнь. Эрьва ие ульнесть экскурсият масторонок келес. Кода а ледстямс тонавтыцянок! Неть: МР-нь культурань заслуженной роботникесь Лидия Фокеевна Кильдюшкина, ветясь хоронок, воспитателесь Фаина Филипповна Кижеваткина. Весе лембест тенек макссть. Те шкас кирдтяно ялгаксчи кинь марто вейсэ тонавтнинек, вете иес весть свал вастневтяно. Монень маряви, 99 % минек школань прядыцятнеде ансяк лембестэ ледстнить интернатонть, кона кармась тенек, велень ды ошонь эйкакштненень, омбоце кудокс.


Музыкальной школанть-интернатонть прядомадо мейле (1976 иестэ) Валентина Михайловна поладызе тонавтнеманзо Л. П. Кирюков лемсэ музыкальной училищасо. Тонавтнесь народной отделениясо домрань коряс. Сон эзь менстя вейкеяк урок. Эрьва косо бажась варчнемс виензэ. Ульнесь профкомонь председателекс, невтсь прянзо спортонь пелькстамотнесэ. Тесэ ниле иетне ливтязь ливтясть. Училищадо мейле ульнесь распределениянь коряс важодема таркатнень явшема. Сон бажась седе тов тонавтнемс вузсо. Ансяк интернатонь прявтось И. А. Адаев, кона парсте содылизе эряза тейтеренть, яволявтсь: сайсы важодеме эстензэ школав. Истя, Валентина Михайловна сась мекев школав-интернатов, косо весементь парсте содылизе. Колмо иеть роботась воспитателекс, педагогокс, мейле – домрань коряс тонавтыцякс. Прядызе Московонь культурань государственной институтонь Рязанень филиалонь оркестровой дирижированиянь факультетэнть (1986). В.М. Прокаевань кедьсэ тонавтнесть Вера Кунаева, Василий Родионов, Иван Сургаев, Людмила Шумкина ды ламо лият – весе сынь сюлмизь эрямост музыканть марто, важодить культурасо.

Неень шкане Саранскоень музыкальной школасо-интернатсо «Культура» нацпроектэнть лувсо ютыть покш витнемат-петнемат. Вальматне полавтозь, путыть лия лато. Карми пек вадря. Тесэ тонавтнить малав 60 эйкакшт, кода районтнэстэ, истя жо ошоньгак. Весе сынь пшти вановт ало. Чизэнзэ зярыяксть андовить. Валентина Михайловна тонавтницянзо свал ускси пелькстамо. Сынь ардтнесть музыкальной конкурсов Пензав, Кузнецкоев, Саратовав, Сызранев, Казанев, Санкт-Петербургов, косо лиснесть изницякс весероссиянь ды раськеютконь пелькстамотнесэ. В. М. Прокаева яви покш мель эйкакштненень. Сон мартост свал кортни, кевкстни, лезды, максы превть эрямонь аволь шожда килангсо. Васоло таркав ардтнемстэ кавани эйкакштнень эсензэ кедьсэ пидезь-панезь тантей ярсамопельде. Выпускникензэ малав весе поладыть тонавтнемаст музыкальной училищасо, мейле – консерваториясояк. Весе сынь а стувтнить сонзэ: гайневтнить, сёрмалить, сакшныть инжекс.

– Пек кецнян тонавтницян кисэ, зярдо ули касомаст, улить изнявксост, тевест моли. Аштян кувалмаст каштанчисэ. Ледстявлия васенце тонавтницям Вера Кунаевань, сон – МР-нь культурань заслуженной роботник, седи домрасо, гитарасо, фортепианасо, вети кружокт, морси Кочкуровань ансамблясо. Марат Хайров – Президентэнь оркестрасо. Вера Ледяйкина – Татарстансо рузонь народной инструментэнь оркестрасо артистка. Алина Гусева важоди тонавтыцякс Казаньсэ. Галина Атласова седи минек ошсо рузонь народной инструментэнь оркестрасо. Юлия Денисова – Отяжбуень музыкальной школасо. Ирина Девяткина Тверень – музыкальной школасо… Ды ламо лият! Минек интернатось – теке башка мастор, мон тензэ мерян – оазис. Секскак пшкадян тетятненень-аватненень: нолдынк эйкакшонк миненек тонавтнеме, – ёвтни В. М. Прокаева.

Валентина Михайловнань тевензэ поладызе Анна тейтерезэяк. Сон прядызе школанть-интернатонть, музыкальной училищанть. Тонавтнесь Саратовань консерваториясо. Ават-тейтерть вейсэ важодстькак. Ней Анна важоди Московонь А. А. Алябьев лемсэ эйкакшонь искусствань школасо. Юрий цёразояк кавто иеть тонавтнесь музыкальной школасо, седясь баянсо. Якась художественной школав, явсь мель спортонтень. Тонавтнесь Саранскоень электроникань, экономикань ды правань техникумсо. Прядызе Россиянь МВД-нь Воронежень институтонть. Важоди МР-нь МВД-сэ.

Мирдезэ Николай Яковлевич эрямонзо перть важодсь «Орбита» заводсо, ней пенсиясо. Прокаевтнень покш мельспарост – колмо нуцькаст, весе цёрынеть.

Башка валт эряви ёвтамс Валентина Михайловнань малавикстнэде – Князевтнень семиядонть. Татьяна Михайловна прядызе Н. П. Огарёв лемсэ МГУ-нь филологиянь факультетэнть, роботась Казахстанонь Караганда ошсо рузонь келень ды литературань учителекс. Ней семиянзо марто эри Мордовиясо.
Антонина Михайловна сазорост прядсь Ленинградонь Н. Крупскаянь лемсэ культурань институт. Тоско кадовсь эрямояк. Важодсь театрасо хоронь артисткакс, роботась оперань театрасо, консерваториянь оперной студиясо, Михайловской театрасо. Косо ансяк арасель, гастрольтнень марто ардтнизе весе масторлангонть. Тейтерезэ кармась пианисткакс.
Анастасия Михайловна – филологиянь наукань кандидат, эрямонзо перть важодсь Н. П. Огарёв лемсэ МГУ-нь филологиянь факультетсэ, анокстась эрзянь келень тонавтыцят.
Николай ды Василий ялаксост тонавтнесть Ицялбуень Кемлянь велень хозяйствань техникумсо.
Князевтнень семиясто лиссть тонавтыцят, врачт, ламо музыкантт. Музыкантень вечкемась ютась тенст аваст Екатерина Ивановнань пельде, конань ульнесь виев вайгелезэ, пек вечксь морсеме. Тетясткак сеедьстэ морсиль «Катюшанть». Весе сынь эрить покш ялгаксчисэ, вейке-вейкенень лездазь, мелень ванозь. Кадык истя ули свал!

Ламо иень перть паро важодеманзо кисэ В. М. Прокаева казезь «Лучший по профессии» дипломсо (2007); «МР-нь культурань заслуженной роботник» лемсэ (2008); лиснесь «Молодые дарования России и лучший преподаватель детской школы искусств» Общероссийской конкурсонь лауреатокс (2010); МР-нь Прявтонь премиянь лауреат (2016); казезь МР-нь Государственной Собраниянь Благодарностьсэ (2021).

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».