Суббота, июля 13, 2024
Важное

 

Июлень 4-5-це читнестэ Саранск ошсо ютась «Национальная школа лидерства» форумось. Мордовияв сакшность од ломанть Россиянь 26 регионсто, весемезэ ульнесть малав 200 участникть. Форумонть ютавтыцятне: раськетнень тевтнень коряс Федеральной агентствась ды РФ-нь финнэнь-угрань раськетнень Ассоциациясь.

Вастовомась ютась Эрзянь ды мокшонь национальной драматической театрасо. Инжетне ульнесть раськень оршамопельсэ, сынь мельспаросо ёвтнесть, косто састь ды кодат мелест-арсемаст кельтнень ванстомань коряс.

Лембе вал марто пурнавозтненень пшкадсть РФ-нь финнэнь-угрань раськетнень Ассоциациянь прявтось, РФ-нь сенаторось Пётр Тултаев, МР-нь Государственной Собраниянь Председателесь Владимир Чибиркин (сон ёвтась валт МР-нь Прявтонть Артём Здуновонь пельде), МР-нь культурань, национальной политикань ды архивень тевень министрась Светлана Баулина.


– Минек масторось лия ёнов а молиця – тесэ эрить 194 раськеть, конат кортыть малав 250 кельсэ ды диалектсэ. Чарькодеви, эряви ванстомс тенек раськень ёжонть, идентичностенть, теде башка, эряви виевгавтомс раськетнень вейсэндявоманть. Раськень кевкстематнень коряс важодемась покш ды келей. «Национальная школа лидерства» форумось лезды вастовомс од ломантненень, конатнень седеест пии-палы кельтнень ды койтнень-кирдатнень кисэ, ванстомаст кисэ. Тесэ кемекставить управленческой содамочитне. Арсян ды кеман, ламот эйстэнк шкань ютазь сюлмасызь эрямост раськень политиканть марто. Весе кельтненень ней аволь шожда, улить ламо стакачить ванстомаст коряс. Од ломантне лоткить кортамодо тиринь кельсэ – мезеяк а лияды. Эряви тенек анокстамс ломанть, конат седе тов кармить важодеме властьсэ келень кевкстематнень коряс, – кортась РФ-нь финнэнь-угрань раськетнень Ассоциациянь прявтось Пётр Тултаев.
– Мон сакшнан Мордовияв теке малавикс ломантненень инжекс. Тесэ видестэ ветяви раськень политикась, тесэ маштыть инжень вастомо. Весе кельтненень эряви мелень явома. Эйсэст кортавольть, сынь гайгевельть аволь ансяк кудосо – ламо лия таркасояк, – ушодызе кортамонзо Удмуртиянь Государственной Советэнь Председателень полавтыцясь – наукань, образованиянь, культурань, туризмань ды раськень политикань коряс свалшкань комиссиянь председателесь Татьяна Ишматова. Сон пачтясь, Удмуртиясо кемекстазь патриотической воспитаниядо закон. Кельтнень коряс стакачитне малав истят жо, кодат лия таркатнесэ: тиринь келень уроктнес а явовить сатышка част, уроктнень таркас сеедьстэ ютавтовить башка занятият, школатнесэ а сатныть кадрат. Теке марто Удмуртиясо важоди Кузебай Герд лемсэ государственной национальной гимназиясь – республикань этнокультурной образованиянь центрась, ули национальной образованиянь Научно-исследовательской институт, удмуртонь кельсэ лиснить 7 изданият. Сёрмадстыцятне киртявить ды те сюлмавозь почтанть аволь паро важодеманзо марто. Мезе парось – 2020 иестэ ушодсь важодеме «Даур ТВ» од ломанень интернет-телеканалось. Общественной таркатнесэ тевс нолдавить кавто кельсэ сёрмадовкст, рузонь ды удмуртонь. «Весемесь минек кедьсэ, эряви ансяк важодемс», – кортась Татьяна Витальевна.


Истя жо кортась РФ-нь Образовательной организациятнесэ религиозной ды этнической экстремизмань профилактикань центрань прявт специалистэсь Марина Малафеева. Сон пачтясь, кода од ломантнень тердить радикальной группатнес ды деструктивной вейсэндявкстнэс. Н. П. Огарёв лемсэ МГУ-нь Координационной центрась прявтось Сергей Гладышев кортась Интернетсэ террористической тандавтнематнень каршо бороцямодонть. Эряви меремс, истят координационной центрат панжозь Россиянь 83 вузсо.
Башка кортамо алтавсь «IT-технологии в продвижении культуры народов России» темантень. Вал сайнесть «Яндекс» ООО-нь важодицятне, конат явить мель РФ-нь раськень кельтнень Интернетсэ тевс нолдамонтень.

Кавто чинь перть од ломантнень туртов ютавтовсть семинарт ды мастер-класст: «Влияние на молодёжь. Красные линии», «Лидеры общественного движения новой волны», «Многоязычие в условиях современных вызовов» ды лият.

Саемга, «РУВИКИ» интернет-энциклопедиянь Россиянь раськень кельтнесэ региональной пелькстнэнь ветямост коряс отделэнь прявтось Рустам Гатауллин кортась од проектэнть коряс. «РУВИКИ» интернет-энциклопедиясь ушодсь важодеме 2023 иень июньстэ. Те волонтёронь проектэсь ды эрявить тов сёрмадыцят-ютавтыцят. Тексттнэнь теема нурькасто ды чарькодевиксстэ. Мезде? Эрьва мезде – эсь веледе, ломантнеде, раськень кенярксчитнеде. Ней тосо невтезь комсь кельть. Юткстост вейксэ – финнэнь-угрань. Эрзянь ды мокшонь кельтнень рузокс ютавтыть Александр Данильчев ды Валентина Гришунина.

– Уледе алкуксонь патриотокс, тиринь келень ды культурань вечкицякс. Кить, бути аволь минь карматано ванстомо келень сюпавчинть? Чарькодеви, муевить сеть, кить кармить сялдомонок, паряк, маряви тенст, аволь истя ютавтынек валтнэнь. Садо юткозонок! – кортась Валентина Гришунина.


Форумонтень инжеть сакшность Россиянь эрьва кодамо ёнкссто. Алёна Фёдорова ды Юлия Новаковская пачкодсть Саратовань областьстэ. Сынь – «Шумбрат» эрзянь ды мокшонь раськень культурань центра» Саратовань общественной вейсэндявксонь члент. Од тейтертне оршазельть раськень оршамопельсэ, пек мазыйть. Алёна чачсь Татищевской райононь Ягодная Поляна велесэ, ундоксонзо – Петровской райононь Оркина эрзянь велестэ. Самай тосо чачсть покштянзо-бабанзо. Од тейтересь прядызе П. А. Столыпин лемсэ Поволжской управлениянь институтонть, ней важоди Саратова ошонь 4№ гимназиясо воспитаниянь коряс прявтонь советникекс. Юлия ялгазо важоди фитнес-тренерэкс ды эсензэ студиясо англань келень тонавтыцякс. Тейтертне видькстасть, сынь аволь умок совасть «Шумбрат» эрзянь ды мокшонь раськень культурань центрантень, ули покш мелест содамс тиринь культуранть ды историянть, эсь ундокстнэнь. Мелят сынь сакшность Саранскоев од ломанень форумов. Алёна кармась тонавтнеме эрзянь келенть репетитор марто.
– «Национальная школа лидерства» форумсонть пек мельстуиця программа. Кемтяно пурнамс од содамочить, теевемс содавиксэкс ламо паро ломань марто, паряк, арсетяно вейсэнь од тевть. Саранскоесь пек тукшны мелезэнек: мазый, аволь покш, куш эрямо тей самс, – мизолдозь корты Алёна.

Комистэ сакшнось покш делегация, вейксэ инжеть. Те – од ломанень сферасо важодицят ды культурань колледжень студентт, конат састь гармошка марто ды кецявтызь весень седямосост.

Анастасия Кузнецова пачкодсь тенек Красноярской краень Партизанской райононь Хайдак велестэ. Сон – сету раськень. Сынст веленть лемдить Сибирьсэ сету раськень прявт ошокс. Кода содатано, те раськесь эри Россиянь ды Эстониянь границясо, Прибалтикасо.
– Сибирев покштянок-бабанок састь эрямо 1900 иестэ. Тесэ ульнесть ламо модат. Сетунь келесь ютась монень сырькаень ды тетянь-авань пельде. Важодян велень Культурань кудонь прявтокс ды ветян «Лиль» фольклорной ансамблянть. Тедеде сонензэ топодсть 32 иеть. Морсетяно сетунь морот. Икеле ульнесть 12 морсицят, ней кадовсть 8. Ютксонок ламо од ломанть. Теке марто сыретне тонавтыть эйсэнек, кода видестэ морамс, максыть превть культурань койтнень коряс. Веленек вишка, эрить малав 150 ломанть. Ули сибирень сетутнень музеенек, сонзэ вети библиотекаресь, кона сонсь пурнась тов пек ламо ули-парот. Инжетненень ули мезе тенек ёвтнемс ды невтемс. Кизна тешкстатано сибирень сетутнень кенярксчи, – корты Анастасия Кузнецова. Сонзэ лангсо сетунь паля, мештесэнзэ сиясто теезь ванстомань тешкс – лемезэ «сэльг». Авась уш омбоцеде Мордовиясо, мелят сакшнось «Минь вейсэ!» форумонтень.

Форумонь омбоце чистэнть тагояк поладовсть семинарт ды вастовомат. Яволявтозельть важодемань цётамотне ды икелепелев арсематне. Прядовсь вастовомась вейсэнь киштемасо Нацтеатранть икеле.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».