Сермас содамодонть икеле кезэрень эрзятне-мокшотне, кода лия раськетнеяк, кудоюртонь курмост-кармост тешкстылизь башка тешкссэ. Истя сынь невтсть, кие сынст азорось ды ванстсть родонь-раськень а пек сюпав таштавксост. Сехте кезэрень тешкстнэ редязельть «бортной знаменатнесэ», конатнеде улить сермадовкст «Книга письма и меры писцов Дмитрия Юрьевича Пушечникова да подъячего Афонасия Костяева мордовских и буртасских земель 132 и 133 и 134 году» книгасонть ды лия писцовой книгатнесэ.
Азоронь тешкст
Неть тешкстнэнь кирдицякс ульнесть эрзянь-мокшонь модатнень-вотчинатнень азортнэ, конатнень коряс сынст содылизь сестэнь государенть туртов оброконь пурныцятне. Тешксэсь невтсь, тесэ эриця ломантне оброконь пандыцят. Невтемакс, Лукштан Малковонь Пахмустова велестэ ульнесть а пек ламо моданзо, сынь ушодовильть Раужо селтонть эйстэ ды молильть Вотрашку ды Бездна лейтнень чирева. Лукштанонь ульнесь вейке знамязо ды эйсэнзэ тешкстазельть нумолонь пилеть ды кавто сельметь. Малкин пандсь тешксэнть ды вотчинанть кис оброк – пель пондо медь. Шабранзо Степан Кученяев ды Бутуш Телчкин, нать, седе сюпавольть, сынь кавто «знаменань» кис пандыльть малав комсь алтынт ды ниле деньгат, пельпуд медь ды пошлина кавто деньгат полушка марто, ды гривнянь-гривня оброк калонь кундамонь ды миянь (бобер) кис. Евтазь писцовой книгатнесэ тешкстазельть 613 «знаменат».
Неть книгатнестэ весе «знаменатнень» таргакшнынзе ды пурнакшнынзе вейс ученоесь А.А. Гераклитов. Эрьва тешксэнть ало улить азортнэнь лемтне-фамилиятне, эрямо таркатне ды ухожайтнень лемтне. Невтемакс, 1624 иестэ Алатырень уездэнь Баевасто Кемай Учесевень тешксэзэль – дуга ды ниле сельметь, Дубенкасто Тотка Сиюшевень – дуга, кавто гужт ды кавто сельметь, Шугурова велестэ Чиндяс Мамуровонь – колмо сельметь ды кавто каркст, Орданьбуестэ Костя Тегоняевень – нумолонь пилеть ды каркс, Таразбуестэ Батуш Течниковонь – лопатка ды кавто сельметь, Ламбаське велестэ Сарай Учеватовонь – баранонь сюрот ды кавто сельметь…
«Знаменатнень» бортной чувттнэнь лангс керсилизь узересэ ды пелемасо. Чувтось тешкставиль верде эли вить эли керш ендо. Кода кортыть ученойтне, васняяк азортнэ истя тешкстылизь модань ды вирень межаст. Кудоюртсо жо тешкстнэде мерильть «метат» (метка). Неть тешкстнэ ульнесть эрьва семиянть ды сынь ульнесть малав весе кудонь стявтома чувтнэнь, наличниктнень, чакштнень, пенчтнень, ортатнень, кудолатотнень, кардаз кенкштнень, ракшатнень, оршамотнень, пряс путоматнень лангсо… Ломаненть куломадо мейле сынь тешкставильть калмо лангс стявтовиця «сюруй чувтотнес», зярдо жо эрзятне-мокшотне примасть православия – кресттнэнь лангс. Нейгак кой-кона велетнень ташто калмоланготнестэ минь нетяно истят тешкст. Те коесь стувтозель ютазь пингень 70-це–80-це иетнестэ, ансяк ней кармась вельмеме. Зярыя велесэ од калмонь крестнэнь эли кеврунготнень лангс кармасть керямо родонь-юртонь тешкскеть.
Кудоюртонь тешкст
Зярыя эрзянь велетнесэ ютазь пингень 80-це иетнес ванстовкшность кудораськень модань-тингень метат. Сынь аштесть чувтонь столбатнесэ, лиясто тарказост стявтыльть кавто-колмо кевть эли модань межанть тешкстылизь сокасо ютамосо.
Башка тешкст тейнильть чувтонь керямсто, колхозттнэс совамодо мейле сюронь получамсто тешкставильть кескавтнеяк – кие артылинзе уголиясо, кие карандашсо, лият жо сюлмсилизь мазый суресэ, кабу а емавтомс.
Кудо ракшатненьгак Инечиденть икеле цетьверькстэ тешкстылизь башка тешксэ. Сон керсевиль лишметнень, сеятнень, реветнень пилетнес. Лиясто те ульнесь аволь кудораськень тешкс – седе шождыне керявкс.
Кода кортыть исследовательтне, тешкстнэ ванстовкшность сеть велетнесэ, конатне аштить васоло покш оштнень эйстэ. Кода уш сермадынек вере, сынь неень шкане ванстовсть ансяк калмолангонь кресттнэсэ эли музейсэ ванстовиця экспонаттнэсэ. Чуросто кудораськетнесэ вастневить башка курмот-кармот, конатне ванстовить прок семиянь реликвият.
Одирьвань парь
Эрзятнень кудопотсо ванстовильть ламо теевкст, конатне тешкставильть. Ютксост башка тарка саи одирьвань паресь, конась теевиль пекшестэ ды эрявиль эрьва тейтерентень аволь ансяк кода оршамопелень ванстома, истя жо сон кандсь сакральной смусть. А стяко партне мазылгавтовильть эрьва-кодамо тешксэ, роднянь-раськень сермасо, конатне арсильть мирденень лисицянтень парочи. Чувтонть лангс керсевильть треугольникть, квадратт, кругт, сюлгамот, сурсеметь, ломанень фигуркат, чипайть… Лововиль, одирьвась те паренть марто саилинзе тиринь тетянь-авань кудостонть мелявкстомо ледстнематнень ды авань уцясканть, паресь ванстыль кудораськенть берянь сельмеде, апаро ломанде. Секскак тейтеренть оршамотне пурнавильть ванстозь, састыне, весе эрявикс койтнень-кирдатнень топавтозь. Паресь пурнавиль кудыкеле, эдь кудосо потолоконть прясо аштиль мода, кавто мода ютксо жо эрзятне пурныльть ансяк кулыцятнень.
Кудоюртонь тешкстнэ тейневильть лия курмотнес-кармотнескак азоронть невтемань туртов: тешкставильть пенчтне, ваканттнэ, сурсематне, штеретне, кодамо стантнэ, пелюматне…
Ванстыця викшневкст
Эрзянь аватне эсь оршамопелест викшнемстэ аволь ансяк мазылгавтсть палятнень, сынь бажасть сынст вельде ванстомс эсь прянть, секскак тешкстнэ-узорттнэ аштильть сеть таркатнесэ, кува, арсемаст коряс, седе куроксто совавить апаро вийтне: кирьгасо, алга ды ожатнесэ. Башка викшневиль тейтерень панарсо мештесь, кода эрямонь максыцясь. Эрьва викшневксэнтень, тешксэнтень эрзятне макссть башка лемть, сынь, васняяк, сюлмавозь нармунтнень-ракшатнень, пертьпельксэнть марто. Невтемакс: нумолонь пиле, мацеень пильге, дигань камакшке, нармунень сельметь, тештине, умарь…
Узортнэ викшневильть аволь кода понгсь, эрьванть ульнесь эсензэ тарказо ды толковамозо, ды васняяк неть тешкстнэсэ ломантне бажильть ванстомс рунгонь пельксэнть, аволь мазылгавтомс. Секскак эрьва тейтерь-авась снартнесь киненьгак а макснемс эсь панаронзо, эдь икелень шкань койтнень коряс, панаронть ульнесь эсензэ виезэ ды сон кирдевсь неть салавань викшневкстнэсэ, конатне чарькодевильть пек аламонень. Неть ульнесть, кода ней бу меревельть, кодт, ванстомат-оберегт.
Башка тешкстама «пангонть» викшневксэнзэ. Сонсь пряс путомкась явовиль кавто пельксэв, козонь совавтовильть чувтонь, кудонь тешкст, зигзагт, верев кепедезь кедь марто фигурат. Ловови, эйсэст улить кезэрень мифологиясто саевкст. Нама, шкань ютазь сынст смустест емась, чарькодицяст пек аламо ды ней минь нейтяно эйстэст ансяк художественной мазычи. Эрьва панаронть, руцянть, икельга пацянть, пулаенть, карксонть, пангонть тейтертне ды аватне викшнилизь эсест кедьсэ ды те тевентень максылизь весе оймест, виест, мелест-арсемаст… Евксонь кондямо мазычи ды сюпавчи лисиль кедест алдо, кода сон явовиль кажовсто ды пельсвачосто эрямонть эйстэ!
(Пезэ сыця номерсэнть)
Анокстызе Марина ДЕВЯТОВА,
«Кодификационно-семиотическая система мордовского этноса: прошлая и настоящая жизнь знака» монографиянть коряс.