Неень шкане масторлангсонть эрицятнеде 8 миллиардто ламо ломанть. Ды, паряк, арась истямо ломань, конась чачсь кодамояк таланттомо, сонзэ Пазось эрьвантень кази чачомсто. Саемга, кие парсте арты, кие моры, лиясь машты налксеме куш кодамо музыкальной инструментсэ, мазыйстэ викшни-сты, а Орданьбуень райононь Кеченьбие велень эрицясь Елена Петровна Головина тейни салов чапакссто паннот.
Теде башка эрзянь авась важоди велень клубонь прявтокс ды топавты библиотекарень тевенть. Ды кода велень весе эрицятне, Николай Иванович мирдензэ марто кирдить покш хозяйства: трить ракшат, кастыть эмежть. Головинтнэнь вальмало сравтовсь покш ды мазый садпиресь. Умаринань кодат сортт тосо ансяк арасть! Сельметь кадовить. Ютак Кеченьбие веленть кувалт ды костояк истямо садпире а неят. Те корты азортнэнь тевень вечкиця обуцядост.
Елена Головинань чачома енксозо Кочкуровань райононь эрзянь кезэрень Давыдвелесь. Тетязо-авазо весе эрямост перть роботасть колхозсо. Кудораськест покшоль. Семиясонть, Еленадо башка, касть-кепететсть кавто сазорт ды вейке ялакс. Эйкакштне эсь ютковаст эрясть ояксчисэ, тонавтнесть школасо, лездасть тятяст-аваст туртов кудоютконь тевсэ. Кода евтни минек героинясь, школасо тонавтнемстэ сонензэ ламоксть савкшнось валске марто чийнемс аванзо таркас фермав, косо Любовь Ивановна пингень перть важодсь скалонь потявтыцякс. Елена Петровна ледстни, кода потявтозь ловсонть савкшнось кандтнемс лия таркав курсясо-ведрасо. Те эдь ансяк шкань ютазь весемесь полавтовсь, хозяйстватнесэ ютавтовсь модернизациясь, усксть потявтомань туртов аппарат. А сепови, Елена сазорканзо марто эште пиже тейтерькакс чарькодизь, кодамо те кедьвийсэ роботамось.
Советской шкань эйкакштне эзть пеле стака важодемадо, трудясть тетяст-аваст марто вейсэ виень апак жаля ды тиринь масторонь вандынь чинзэ кисэ мелявтозь. Эряви меремс, сеть шкань од ломантнень ютксто ламот школань прядомадо мейле кадовкшность эрямо чачома велес. Колхозонь тевтне сатыльть весенень. Истя, 10-це классонть прядомадо мейле, Елена ды сонзэ ниле ялганзо кармасть важодеме эсь велень колхозонь фермасо. Кинь аравтызь скалонь потявтомо, минек героинясь жо кармась ведрекшень ды племань бука мельга якамо. Тевесь ульнесь аволь шождынетнестэ. Еленань важодемань ялгакс ульнесь 60 иесэ ава, конась од тейтеренть туртов макссь важодемань коряс ламо содамочить.
– Ведрекштнень марто важодеманть а эрьвась цидярдсы. Васенце вазыямодо мейле неть ракшатнень марто моли покш важодема. Сехте покш стакачись, нама, тонавтомс сынст а пелемс потявтомадонть. Сынь тунь а кунсолыть, а содыть ков теемс пряст. Ве таркасо пельминутаяк а кирдевить. Савиль содсемс эйсэст пикссэ. Пшти сюро марто букатнеде кортамскак а мезть. Ансяк стакачитнень лангс апак вано, весе тевтнесэ апак капша теилинек, – евтни Елена Петровна.
Седе тов од тейтересь пельиешка важодсь учетчицакс. Шкась ютась, Еленань седейсэ чачсь мель туемс тонавтнеме Саранскоев. Тетязо-авазо эзть моле каршо. Мекевлангт, аштесть каштанчисэ тейтерест кувалма. Елена кочкизе Н. П. Огарев лемсэ МГУ-нь Аграрной институтонть. Васняяк тейтерентень савсь ютамс анокстамонь курсат. Сынст шкасто сон теевсь содавиксэкс Николай Головин церанть марто. Од ломантне сеске редизь вейкест-вейкест, ютксост кирвазсь вечкемась. Омбоце курссо тонавтнемстэ сынь налксесть свадьба. Колмоце курссо чачсь Саша цераст. Нама, вишка эйкакшонть марто тонавтнемс ульнесь пек стака. Ансяк мирдть-нить Головинтнэ эзть бажа кадомс тонавтнемаст.
– Эринек студентэнь общежитиясо ды секе-тев эйкакшонть туртов вешнинек ваныцят. Сюкпря мирдень однокурсникензэ туртов. Ламот лездасть тенек. Мельсэнь кирдян Наиль Кремчеевень, татаронь церанть: саилизе эйденть кедезэнзэ, тапардылизе эсензэ фуфайка потс ды прянь шназь кортыль: «Азедо, мирдть-нить, тонавтнеде, мон маштан истямо вишкинька марто прянь ветямо. Минек семиясо истят эйдинеть сядошка…». Ансяк истя эрямс цидярдынек а кувать, ускинек церанок Кеченьбиев. Тесэ эйкакшонть марто лездасть мирдень ендо малавиксэнзэ. Шкань ютазь сонськак Николай Иванович сась велев практикань ютамо ды кадовсь важодеме агрономокс. Монгак сынь мельганзо. Карминь важодеме ветеринарной врачокс, – корты Елена Петровна.
Шкань ютазь Головинтнэнь чачсь Катя тейтерест, мейльганзо – Ваня цераст. Вишка эйкакш марто аштемадонть мейле Елена Петровна лиссь важодеме велень клубонь прявтокс. Тедеде топодить 25 иеть, кода ероков авась топавты те тевенть. Тешксты, васенце шкастонть ськамонзо ульнесь стака, ней жо весемесь тонадовсь. Важодемань иетнень перть Елена Петровна ветясь тежат мельстуиця мероприятият, анокстакшнось сядошка выставкат. Ютазь иетнестэ эрицятнеде велесэнть ульнесть ков седе ламо. Ней жо од ломантнеде овсе эзть кадово, важодемс а кинь кисэ. Ды мероприятиятнеяк седе сеедьстэ ютавтовить онлайн вельде.
Неень вешематнень коряс эсь важодемань цетамотнень авась путни Интернетс, вети «Вконтакте» ды «Одноклассники» социальной сеттнесэ кулялопат. Зярдо важодят истямо таркасо, свал эряви маштомс дивавтомс ломантнень кодамояк теевкссэ. Авась пек вадря пидиця-паниця. Куш кодамо мероприятияс Елена Петровна пани тантей прякат эли тортт. Ды эрьва паневксэнть мазылгавтнесы тешкскесэ. Важодиця ялганзо умок редизь ерокчинзэ. Ды мерсть тензэ варчамс тейнемс кодаткак теевкст салов чапакссто.
Елена Петровна шка стяко эзь емавтне, сеске кундась тевентень. Ды шкань ютазь кандынзе анокставкстнэнь Орданьбуень Культурань кудов, мейле эсь важодевкстнэнь невтинзе «Шумбрат, Мордовия!» республикань фестивальсэнть-пелькстамосонть. Дивавтынзе весень. Неть теевкстнэ – те цела искусства. «Тюштясь», «Масторавась», «Паксявась», «Кудатясь», «Иненармунесь», «Толавась» ды салов чапакссто теезь ламо лия персонажтне киньгак а кадсызь вадря ежовтомо. Елена Петровнань паннонь коллекциясонзо таштавсть сядошка теевкст. Ды весе сынь теезь ероков аванть шожда кедьсэ.
– Салов чапаксонть теемазо шожда. Эряви почтонть, салонть, кельме веденть човорямс вейс ды зярскак путомс оймсеме кельме таркас. Истямо чапаксонть марто важодемстэ илядо стувтне вельтнемс эйсэнзэ, эдь сон пек куроксто коськи. Чапаксонь конструкциятнесэ ПВА-нь клеенть вельде педявтнян пенгень лазнэ лангс, мейле эйсэст артан гуашсо, кода паннось коськи, вельтяса лаксо, – корты авась.
Эсь важодевксэнзэ Елена Петровна седе сеедьстэ явши питневтеме. Авантень мельспаро, муевить сонзэ тевензэ вечкицят. Ды истятнеде аволь аламо.
Кода евтынек икеле, Елена Петровна истя жо важоди велень библиотекасо. Сон колмоце ие топавты библиотекарень тевенть. Авась тешксты, библиотекась зярдояк а эрси чаво. Ловныцятнеде сатышка, фондось свал сюпалгавтови од книгасо.
Важодемадо башка Елена Петровнань эрямосо прявт сюпавчизэ ды уцясказо – те малавиксэнзэ. Головинтнэнь семияст покш ды виев. Эсь ютковаст весе эрить ояксчисэ ды вечкемасо. Иеде иес ванстыть ладявозь койтнень – эрьва недлянь оймсема читнестэ семиянек пурнавить тиринь кудосо. Кизэнь лембе шкастонть – садпиресэ тол лангсо пидить штюрьба эли сывельям, тельня семиясь пурнавкшны чувтонь столенть экшс. Истямо шкасто марить пряст эштеяк уцяскавокс – весе семиясь вейсэ!
Алена Артемьева