Эрси, тееват содавиксэкс ломаненть марто, кортнят седе-тонадо ды те вастовомадонть мейле кадоват мельспаросо. Истя лисськак, зярдо минь вастовинек эрзянь аванть Ольга Андреевна Каталова марто. Те ломанесь – сэтьме, аволь покшкавтниця, прянь а шныця, эсензэ тевензэ пек парсте топавтыця.
Сон уш 19 иеть важоди Ицялонь райононь Пардалесэ медсестракс. Медицинасо важодицякс бажась улемс вишка шкасто саезь. Авась ледстни, кода эйкакшокс ялганзо налксильть някинесэ, сон жо ладсесь прянзо неть налкшкетнень лецицякс. Тейтересь кассь, ансяк важодемс медицинасо мелезэ ковгак эзь ема, мекевлангт, седеяк кемекстась. Кода весе ялганзо, Ольгаяк бажась туемс тонавтнеме ошов, ансяк сонзэ одксчизэ прась истямо шкатнес, зярдо од ломантнень кадовтсть эрямо ды важодеме тиринь велень колхозсо. Сон эзь карма покшкавтнеме, кармавтоматнень коряс кадовсь велес. Уставась важодеме колхозонь фермасо скалонь потявтыцякс. Кияк бу содаволь, кодашка ризкс кирдсь те важодеманть кувалма Ольга. Сон эрьва чистэ, прок клеткасо пекстазь нармушкине, бажась ливтязь туемс ошов тонавтнеме. Эдь тесэ, тиринь велесэ важодезь, сон марясь прянзо а эсензэ таркасо. Тейтеренть седейсэ палсь кемемань толнэсь – сон эште варчасы прянзо медицинасо.
Ней уш а ледстясы, кода цидярдызе иенть. Сексень васенце читнестэ сон ушодызе тонавтнеманть Саранскоень медучилищасо. Тонавтнесь вадрясто, мелень путозь. Училищанть прядомадо мейле, направлениянь коряс мольсь важодеме Ицялонь райононь Вечкусы рузонь велев. 1990 иетнестэ тесэ эште важодсь участковой больницясь ды тесэ сон кармась палатань медсестракс. Корпусось таштоль, тень лангс апак вано, важодемань условиятне ды ломантне ульнесть вадрят. Ольга Андреевна мельсэнзэ кирди важодемань таркасо тонавтыцянзо ды лездыцянзо леместкак, сынст ютксо – Вечкусы велень участкой больницянь прявт врачось Виктор Васильевич Шалятов, акушерэсь-гинекологось Таисия Серафимовна Храмова ды фельдшерэсь Клавдия Егоровна Алексейкина. Самай неть ломантне макссть од тейтеренть туртов ламо эрявикс содамочить ды превс путомат, конатнень Ольга Андреевна неень шкастояк нолдтни тевс.
– Важодемань васенце иетнестэ савсь ламо мезе неемс, эрьва кодамо ормадо ды сэредькстэ идемс ломантнень. Важодинь кода сыретнень, истя ансяк чачозетнень мартояк. Васня сехте стакакс, нама, ульнесь тонадомс эйдетнень марто важодеме. Покш ломанесь эдь сеске евтасы, косо ды мезезэ сэреди, вишкинькатне жо седе ламо авардить, секскак савиль нолдамс тевс салавачинь лувт – косо ушодылинь евкскень евтнеме, косо лавсень морынеть морамо, лиясто кортазеват кодамояк мультфильмань героень вайгельсэяк, ансяк бу туемс вишка пациентэнть мельс ды аволь пеле эйстэнь, – евтни Ольга Андреевна.
Нама, медицинасо важодемась аволь шождатнестэ. Ансяк роботань стакачитнень лангс апак вано, тейтересь эзь пота удалов. Аламо шкань ютазь лиссь мирденень Вечкусы велень рузонь цера экшс. Мирдеть-нить стявтсть кудо, уставасть трямо ракшат, кастомо эмежть. Чачтасть кавто церабайнеть. Ды кудоютконь тевтнеде башка, мельспаросо важодсть.
Шкань ютазь Вечкусы велесэ больницянть пекстызь. Ды од авась кармась важодеме шабра Пардалесэ. Зярдо Ольга сась важодеме те велень медпунктов, тесэ эште роботась Галина Ефимовна Ионова. Сон ульнесь медпунктонь прявтокс. Аватне ниле иеть важодсть кавонест, седе тов Галина Ефимовна тусь пенсияв. Ольгань жо кадызь медпунктонь медсестракс ды велесэ эриця ломантнень ормаст-сэредьксэст лангсо прявтокс.
Эзь марявояк, кода ливтязь ливтясь шкась. Ды вана малав уш 20 иеть Ольга Андреевна важоди те велесэнть. Эрьва чистэ шабра велев моли ялго. Сисем вайгельбень кувалмосо кись аванть туртов стакакс а маряви. Кода корты минек героинясь, ялго якамось кувалгавты сонзэ эрямонзо.
– Те монь эрьва чинь зарядкам. Васняяк пачкодян медпунктов, зярскак лекстян, сокарясынь коневтнень ды сырган велеванть сыре ломантнень ванкшномо. Ней Пардалесэ эрицятнестэ седе ламотне – сыре ломанть. Кой-конатне медпунктов а пачкодить, секскак варштамост якан кудова. Те велесэнть эрицятнеде весемезэ ансяк 187 ломанть. Велесь чами, чачтыцят арасть. Весе од ломантне бажить туемс эрямо ошов. Эдь велесэнть арасть важодема таркат, школанть пекстызь уш ютазь иетнестэ, кадовсь ансяк Велень культурань кудонь зданиясь, косо ашти монь важодемань нупалемгак, – евтни Ольга Каталова.
Эряви меремс, Велень культурань кудосо медпункттонть башка, аштить администрациясь, почтась, библиотекась ды велень музеесь. Ольга Андреевна евтни, тесэнь важодицятнень марто сон эри покш ялгаксчисэ.
– Эрси, сан важодеме седейсэ мелявкс марто. Озатано аватнень марто обедамо, кортнетяно седе-тонадо, ды а фатявияк кода седейшкава кортамотне ладсесызь весементь кода эряви, берянь ежось витеви, эрямось тагояк валдомгады, – евтни минек героинясь.
Истя, ялга марто свал седе вадря важодемс. Ольга Андреевна мельспаросо евтни, зняро иень перть те велесэнть важодезь, эрицятнеяк сонензэ теевсть паро оякс. Эрьванть вадрясто содасы, эрьвантень лезды, бути кияк ормалгады.
– Ледстяса, ютазь иестэ ормалгадынь истя пек, натой ниле ковт эзинь лисекшне важодеме. Кудосо аштемстэ арсинь, сась шкась, туян пенсияв. Ансяк кода ежом вадрялгадсь, мельтне полавтовсть. Чарькодинь, зярс сатыть кедень-пильгень вийтне, знярс карман важодеме вечкевикс роботасон, – тешкстась авась.
Евтнесь медсестрась седеяк, кодамо орма марто седе сеедьстэ тензэ пшкалить велень эрицятне. Сынст ютксо, нама, сексень-телень шкатнестэ седе сеедьстэ вастневить экшендямонь орматне. Медпунктс свалшкань совицятнень ютксот диабетсэ, гепертониясо ды седеень-санонь орматнесэ майсицятне. Тесэ теить профилактикань прививкат, уколт, анокстыть спискат диспансеризациянь ютамс. Вейке валсо, Ольга Андреевнань пек ламо тевензэ, сынст топавтомс эряви ламо шка ды вийть, ансяк эряза авась куш ков кенери. Важодемадонть башка морси «Килейне» велень фольклорной ансамблясо. Авась евтни, морамонь ерокчись ютась тензэ аванзо пельде. Кода тешксты минек героинясь, «Килейне» ансамблясонть весемезэ кемень морсицят. Весе сынь Пардалень, сон ськамонзо ютксост ве ендо сазесь. Ансяк тень лангс кияк а ваны.
Эряви меремс, Ольга Каталова лови прянзо уцяскав авакс, эрямосонзо ули кеме нежезэ – семиязо, ули вечкевикс важодемазо. Ютко шканзо, конась велень авантень пракшны пек чуросто, сон истя жо ютавты седейшкава – морси морокуросо, тундонь-кизэнь перть касты мазый цецят, а сексень-телень кувака чокшнетнестэ эйкакштненень-нуцькатненень понань сурестэ коды варьгат, носкат ды лембе шарфт.
Алена Артемьева