Чаунзань райононь Покш Маризь велесь сеске редяви Саранск ёнов ардомсто. Ашти сон овсе ки чиресэ, ламоксть ваксканзо ардтнилинек командировкав, ансяк совамс тов та-кода эзь лисне. Аволь умок те ильведьксэнть витинек ды мейле мик янксинек, мекс истя куватьс эзинек содавто эрзянь мазый веленть, конанть пек мельстуиця эрямопингезэ.
Кода ёвтасть велень эрицятне, Покш Маризь веледе ташто книгатнесэ ульнесть сёрмадовкст эштё XVI пингень куншка видьстэ, лисни, тензэ малав ветесядт иеть. Велесь, келя, саизе лемензэ Кердяксэнь Маризень пельде, конась васенцекс стявтсь кудо тесэнь Коське Аморда леенть чирес. XVIII пингестэ велень эрицятне лемдевтизь пряст ды кармасть христианинэкс, стявтсть паро церькова. Колмо баягатнень казекшнинзе сонсь Екатерина II инязоравась. Кода ней, истя умокто-умок, велесь аштесь покш кинть чиресэ ды тень кувалма тесэ панжозельть Саранск ошонь почтань кудот-кардазт, косо кирдевсть кемгавтово лишметь. 1863 иестэ велесэнть уш ульнесть 145 кудоюртт. Комсь иеде мейле велень эрицятне стявтсть церковно-приходской школа марто од церькова, конанть В. И. Ленинэнь тетязо И. Н. Ульянов теевтизе народной училищакс. Од экономической политиканть шкасто, конась прась ютазь пингень 20-це иетнес, велесь пек сюпалгадокшнось. Неявсь, тосо эрясть важодемань вечкиця ломанть, эдь сынь стявтсть 23 варма ведьгевть, ямксонь 4 яжавтомкат, кедьчелькевтне теильть чарыть, боцькат, стыльть, кодыльть, микшнильть эсест теевксэст. 1930 иестэ Покш Маризь велесэ теезель колхоз, васенце председателекс мельга-мельцек ульнесть И.Ф. Кузнецов, Н. И. Чернов. Мейле колхозось явозель колмов ды сехте икелев молицякс ульнесь И. В. Новиковонь прявтсо хозяйствась, конась стявтсь автоматизированной фермат. 1992 иестэ сон лемдезель «Рассвет» СХПК-кс, ней неть модатне лия азоронь кедьсэть.
…Кизэнь велесь вастымизь шалтсо, спецовкасо цёратне китнень чирева ледсть тикшенть. Тия-тува ардтнесть машинат ды велосипедсэ эйкакшт. Ташто, кувака чувтонь кудонть вакссо (карминек мейле содамо – те икелень клубось, седикелень ташто церьковась) псиденть майсесь оршамо-карсемапелень микшницясь. Истямо мини-базарось велесэнть эрявикс, а весень ули шкаст ардтнемс районга-ошка. Теке марто велентень чизэнзэ автобустнэ сакшныть зярыяксть. Ломантнеде тесэ эрить, лия велетнень коряс, байтяк – малав 1100. Кудотнеяк Покш Маризь велесэ чаво а эрсить, сеске рамасызь эли теке велесэнть чачозтне, эли Саранск ошонсетне. Тувталось сеньсэ: велесь прявт ошонть эйстэ ансяк 40 вайгельбеде васоло, Чаунзанть эйстэ – 12 вайгельбеть.
Велень прявтонь тевенть топавтыцясь Ольга Николаевна Куракина (тейтерькс – Андрейкина) сась тей важодеме овсе а умок, кавто ковткак арасть. Авась тескень, Маризь велень, ансяк эрясь куватьс лия районсо, ней велявтсь тиринь велев семиянзо марто ды кундась прявтонь тевтнес. Ольга Николаевна тешксты, тёжа эрицятне, нама, – те аволь ансяк Покш Маризь велень эрицятне, вейке велень поселенияс совить эштё вете велеть: Мокшалей, Пянгелей, Красный Воин посёлкась, Сырятино ды Огарёвка.
Покш Маризь велесэ ули весемесь парсте эрямонть туртов: общеобразовательной школа, козонь якить шабра велетнень эйкакштнеяк (малав ведьгемень тонавтницят), «Чипайне» эйдень кужо (малав кемзисемге эйдеть), велень библиотека, фельдшерско-акушерской пункт, банконь отделения, почта, кавто лавкат. Ломантне важодить «Юбилейное» ООО-нь ферматнесэ, паксятнесэ ды производственной лия площадкатнесэ. Велесэнть ули центральной водоснабжения, тедеде ведень башнясь одкстомтозель-витнезель. Ломантне, нама, од порасто бажить ошов, а мейле, седе сыредезь, мекев велявтыть кудоюртозост эли рамить шабрань чаво кудот.
– Минек эрицятне пек эрязат, ёжовт, бути улить кодаткак мелявкст, сеске гайневтить, сёрмадыть вейсэнь сёрмат, бажить решамс весементь мирём. Вана куншкакуросонок стявтозь од церькова, теицясь, ярмаконь максыцясь – эсенек велень эрицясь Виктор Николаевич Куприянов. Содавикс эрицятнень лемсэ, конатне уш тусть юткстонок, Покш Маризь велесэ лемдезь кавто ульцят. Евгений Иванович Новиков ульнесь Республиканской больницянь прявт врачокс, а Иван Степанович Видяйкин колхозонь прявтоль, конань пингстэ хозяйствась пек виензакшнось ды те шкастонть велеськак кассь-кепететсь, пештявсь эрявикс инфраструктурадо, – ёвтни Ольга Николаевна.
Велесэнть улить неень шканьгак алкуксонь геройть. Покш Маризь велень зярыя цёратне, зярдо тенст састь повесткат, апак кавтолдо тусть специальной военной операцияв. Дмитрий важодсь сельхозпредприятиясо, понгсь мобилизацияс, Михаил истя жо тусь тиринь масторонть кисэ аштеме, ды эсь тевест сынь топавтыть кеместэ. Аволь умок сакшность отпусков, содавтызь родняст-раськест. Ды тесэнь аватнень-сырькайтнень истят цёратнеде, нуцькатнеде пек ламо. Лисни, видестэ тризь-кастызь, совавтсть пряудемезэст виде мельть-превть.
Покш Маризь велесь, кода лия эрзянь велетнеяк, эри неень шкань лувсонть. Ризксэнтень, азораватне лоткасть скалонь, вазонь трямо-кастомо. Велесэнть те тевсэнть важоди ансяк вейке фермерской хозяйства. Ловсонть рамсить лавкасто эли шабра Мокшалейстэ – «по заказу». Ансяк аволь весе вишка велинетнесэ улить лавкат, мелявксонть витить Чаунзань ды эсест велень индивидуальной предпринимательтне, недлязонзо весть-кавксть ардтнить автолавкат ды усксить эрявикс товарт. Истямо лувось покштятненень-сырькайтненень седеяк вечкеви, машинась лоткси кудост икелев, товарось свал свежа, ускить, мезе энялдат.
Ольга Николаевна Куракина а сёпи лия мелявкстнэньгак: эряви витнемс-одкстомтомс Маризь велентень совамо кинть ды ульцятнева, сынст валдомгавтомга, палмантнень прява путома од лампочкат, учить од кить Мокшалеень эрицятне, Пянгелеенсетне – сэденть витнема. Тень теемга эрявить анокстамс проектт, секскак тевтне сатышкат ды весе сынь ськамонзо прявтонть лавтовонзо лангсот. Пек учи прявтось эстензэ секретарь, конанть марто, арси, карми седе шожда топавтомс тевтнень.
Покш Маризь велева якамсто минь вастынек кавто эйкакш марто од, мазый тейтерь-ава. Кода карминек содамо, Екатерина Семенова (тейтерькс – Терешкина) – ламо эйдень триця ава, сонзэ кавто тейтерьканзо ды вейке цёрынезэ. Ленанень кемень иеть, Милананень – вете, Давиднэнь ансяк колмо. Екатерина – тескень, Маризь велень, лиссь мирденень Пичеуры велень цёрантень, эрить Чаунзабуень Комсомольский посёлкасо, вишкинетне якить эйдень кужов, а покш тейтерькаст – 2-це № школав (тешкстама, сон паро мельсэ тонавтни тосо эрзянь келенть), а вана кизэнь каникулатнень эйкакштне ютавтыть покштяст кедьсэ. Тейтерь-авась важоди райононь администрациясо секретарекс, ули мелезэ тонавтнемс бухгалтерэкс. Мирдезэ важоди промышленной предприятиясо. Семеновтне – классической семия, конантень кавто эйкакшонь чачтомадо мейле максовсь авань капитал, а колмоценть кисэ – региононь авань капитал. Сынь рамасть эстест од квартира ды неть ярмактнесэ пандызь ипотекаст. «Мордовиясто ковгак туеме а бажатано, миненек тесэяк пек мельспаро эрямс!» – тешксты Екатерина ды мизолдозь ёвтни семиядонзо. Истямо кенярдовтыця вастовоматнеде мейле те эрзянь велентень минь меринек «вастомазонок» ды максынек вал содавтнемс сонзэ седе сеедьстэ!
Марина Девятова