Аволь умок Орданьбуень райононь Пиксяська эрзянь веледенть кармасть содамо аволь ансяк Мордовиянть, весе Россиянть келес. Пиксяськасо чачозь ероков од ломантне веленть эйстэ аволь васоло аштиця Пизелпандонть пряс стявтсть покш нурямот, конатнень ваномо ней ардыть эрьва ендо.
Неть читнестэ минь содавтынек те веленть ды вастовинек Пиксяськань администрациянь прявтонть Владимир Николаевич Громов ды тосонь эрицятнень марто. Владимир Николаевич евтнесь веленть течинь эрямодонзо, тесэ эриця ломантнеде, талновтыця тевтнеде-мелявкстнэде. Невтинзе весенень уш содавикс нурямотненьгак.
Ялгат, кодат мазыйть тесэнь таркатне! Веленть маласо аштиця пандонть прясто Пиксяськась, мерят, теке кедеть лангсо ашти. Пандонть лия пеле – пиче ды лия чувто марто касыця вирь. Коштось истямо ванькс-ванькс! Тесэ жо, пандонть прясо, ули лисьмапря, конась зярыя иеде икеле светязель Иневанькстнэнь Петрань ды Павелэнь лемсэ. Покш кенярксчистэ ломантнеде тесэ пурнавкшныть ламо. Бути жо тесэ тееви оймсемань туртов вадря тарка, веледенть кармить содамо седе ламо ломанть, паряк, тень коряс эрицятнеяк седе ламолгадыть.
Течинь чине Пиксяськасо лововить 250 ломанть, юткстост седе покш пельксэсь – пенсионерт. Кенярдовты, улить эште зярыя од семияткак, эйкакшткак.
– Пек берянь, зярыя иеде теде икеле эсенек велесэ школанть пекстызь, – корты Владимир Громов. – Ниле эйкакштнень усксить Низовкав, колмотне тонавтнить Отяжелесэ. Низовкань ды шабра Чукало велень школав тонавтыцякс саизь эсенек школань зярыя роботыцятненьгак. Отяжелев эсь эйкакшост ускси Кузнецовтнень семиясь, конатне састь тей Саранскойстэ. Пиксяськасо сынь эрить уш зярыя иеть. Тесэ малавиксэст кияк арасель, велесь тусь мелезэст ды састь тей эрямо. Рамасть кудо, витнизь-вадрялгавтызь, стявтсть поладкс. Ракшат трить-кастыть ды тесэ эрямось пек тукшны мелезэст.
Школань зданиясонть жо ней аштить велень весе учреждениятне: администрациясь, ФАП-сь, библиотекась, почтась, Культурань кудось. Важоди Пиксяська велесэ «Ардатов» МАПО-сь, конась ашти важодема таркань максыцякс ды велень весе тевтнесэяк васень лездыцякс.
Кода евтнесь Владимир Николаевич, од ломантнестэ седе ламотне тиринь велев сакшныть ансяк оймсема читнестэ, теке марто сынь пек активнойть. Самай истят кавто ероков од ломантне – Денис Тетин ды Николай Казаков – Пизелпандо пряс теизь-стявтызь покш нурямотнень, конатне ней кенярдовтыть аволь ансяк велень эрицятнень. Пиксяськав, мерят, панжовсь туристической од маршрут.
– Ней неть нурямотнень ваномо чинек-венек ардыть эрьва ендо. Те весе паро. Ансяк пшкадян весенень улемс ежомарицякс – а эряви стувтнемс эсь прянь ванстомань енкстнэде. Теке марто, пандонть прясо касы вирь, косо эряви топавтомс кирвазематнень а нолдамонь правилатнень. Ванодо пштистэ, илязо лисе кодамояк зыян, – корты Владимир Николаевич.
Кода мерсь велень прявтось, пароль бу теемс машинатнень туртов башка тарка, штобу кадомс сынст алов ды а ардомс пандонть пряс. Ансяк неть тевтнес эрявить ярмакт. Косто сынст саемат велень администрациянтень? Паряк, муевить мелень явиця ломанть ды Пизелпандонть тейсызь оймсеманть туртов вадря таркакс. Кода невтизе нурямотнень ладямось, сыцятнеде тей алкукс кармить ламо.
Теке марто, кода мерсь Владимир Николаевич, меельце шкастонть велентень велявтомо кармасть сетне, кить тесэ чачокшность, эли жо умок уш тусь эрямо покш ошов. Сакшныть, витнить-вадрялгавтыть тетяст-аваст ды покштяст-бабаст кудотнень, кизэнь шканть ютавтыть Пиксяськасо. Те шкастонть велесэ ломантнеяк ламолгадыть, сон, прок, вельми, пешкеди эйкакшонь вайгельде.
Весемесэ лиясо Пиксяськась эри, кода ламот лия велетнеяк. Важодемань прявт енксось – те велень хозяйствась. Эрицятне кирдить скалт, сеят ды лия ракшат, озавтыть-кастыть эмежть. Ды эсь вийсэ бажить седе вадрялгавтомс-мазылгавтомс эсь тиринь веленть.
Эрицятнень ды государстванть лезксэст вельде, самообложениянть тевс нолдазь, топавтозельть ламо тевть.
– Минек велесэ ули инициативной группа, козонь совить эсь веледенть мелявтыця эрицятне. Сынст арсемаст коряс, велесэ эрямонть вадрялгавтомга эрявикс тевтнес эрицятнень кедьстэ кавксть пурназельть ярмакт. Лездасть аволь ансяк тесэнь эрицятне, Пиксяськасо чачозетнеяк, конатне ней эрить ве ено. А мейле арсинек, мекс бу а нолдамс тевс самообложениянь енксонть, зярдо пурназь целковоенть лангс государствась миненек явсь эште ниле целковойть. Истя, неть ярмактнень лангс топавтынек покш робота. Васняяк, вадрялгавтынек калмазыренть – путынек од пирявкс, теинек часовня, пильсинек-урядынек покш чувтотнень. Одкстомтынек велень лисьманть. Седе тов те енкссонть важодеманть поладсынек.
Тедеде, Изнямонь 80 иетненень, Пиксяськасо одкстомтозель 1941–1945 иетнестэ Ине Отечественной войнасо чавовозтненень кеврунгось: путозель од мемориальной лаз, козо сермадызь весе фронтовиктнень лемест, конатне Пиксяськасто туекшнесть тиринь масторонть сэтьмечинзэ кис тюреме. Семс 83 фронтовиктнень лемест косояк арасельть тешкстазь.
Велень эрицятнень валост коряс, эсь тевенть Владимир Николаевич топавты кода эряви, эсь веледенть мелявтозь ды ломантнеде арсезь. Тевтнестэ ламотнень, конатне сюлмавозь веленть вадрялгавтоманзо марто, сонсь теи. Улезэ те – китнень витнемась, администрациянть ды чавосто аштиця кудотнень перька касыця тикшенть леднемась, куракштнень керсемась, телень шкасто китнень ванськавтомась. Весе тевтнень топавты. Ды апак покшкавтне лезды эрьва пшкадицянтень. Самай истят ломантнень вийсэ ванстовитькак эште велетне.
– Эрьва ломаненть туртов сехте малавикс, мельстуиця ды вадря тиринь енксось – те се, косо сон чачсь-кассь, теинзе васенце эскельксэнзэ, евтызе васенце валонзо. Монь туртов истямокс ашти Пиксяська велесь. Сонзэ марто сюлмавозь весе эрямом – эйкакшчистэ саезь течинь чис, – евтни Владимир Громов. – Институтонть прядомадо мейлеяк мон сонзэ эзия полавто ошонть лангс. Велявтынь мекев. Васень шкастонть роботынь «Пиксясинский» СХПК-со. Мейле, 2016 иестэ, кочкимизь велень администрациянь прявтокс. Ды те шкас роботан те тевсэнть.
Владимир Николаевич нинзэ, Марина Валентиновна марто трясть-кастсть кавто церат. Покшось прядызе Россиянь ФСИН-нь Воронежень институтонть, вете иеть тонавтнесь. Ней роботы Московсо. Ули семиязо. Омбоцесь тедеде прядызе А.Ф. Можайский лемсэ Военно-космической академиянть (Санкт-Петербург). Тетяст-аваст туртов кавонест цератне – каштанчи ды кеме неже.
Юлия Еремина
Фототне Егор Горинэнь