Мордовиянь государственной филармониясо ютась Андрей Бочкановонь «Вай, кодамо кач» сольной концертэзэ. Од церась тенень анокстась зярыя ковонь перть, свалшкане репетицият, эзь удсе веть, мелявтсь. Арсетяно, покш талномазо емась сеске, кода сон лиссь сцена лангс. Весе пешксе залось шалнозевсь ды зэрнезевсть виев цяпамот. Истя вастыть ансяк сетнень, кинь пек вечксызь ды парсте содасызь.
Андреень содасызь одтнэяк, сыретнеяк. Сон пек явови лия морыцятнеде. Васняяк, нама, сонсь сермады моротнень, музыканть. Теде башка, морси эрзянь кельсэ. Истят артистт неень шкане костояк а муят. Морсемс тиринь кельсэ – те вейке тев, кода солавтомс ломантнень седеест? Натой кить а чарькодить, мезде моры церась, ялатеке вастыть эйсэнзэ покш мельспаросо. Моронзо теевсть виде-паро хитэкс. Музыказо ритмичной, киштевтиця, эль кирдеват таркасот. Ламот эзть аштеве озадо, лиснесть киштеме! Кить жо виздсть, сельмень сявадозь вансть лангозост.
Концертэнь программась сюпаволь. Андрей Бочканов содавтымизь «Минь истя эринек» од альбомонзо марто. Морась эрзянь, рузонь кельсэ. Моротне алтавсть вечкемантень, тиринь енксонтень. Сонсь кенерсь морамсто киштемеяк. Моротнень ютксто седейшкава кортнесь ваныцятнень марто рузкс ды эрзякс, макснесь кевкстемат, ютась залга. Аволь эрьва артистэсь машты муеме кель-вал кунсолыцятнень марто ды улеме мартост ве лувсо. Ваныцятне натой кепедсть «Вай, кодамо! Эрзянь цеков!» сермадовксонть марто плакат.
Морыцянтень лездасть филармониясо важодиця коллеганзо: Илона Довгань, Карина ды Александр Сергеевтне, Владимир, Олеся ды Маруся Фоминтнэ, «Девчата» ансамблясь. ART-Vision киштемань театрась малав эрьва моронтень анокстась киштемань номер. Истя жо сцена лангс мазый оршамопельсэ лиснесь «Варма» арт-театрась.
– Течинь концертсэнть а евтавияк кодамо виев энергетика, ды те пек паро! Андрей – аволь ансяк морсиця, сон – моронь автор, концертэнь пек вадря ветиця. Кияк а соды, зяро вийть сон путы творческой те тевентень. Пек ламо важоди. Сонзэ вечкить весе регионтнэсэ, косо эрить эрзятне ды мокшотне, Крымстэ саезь васоло енкстнэс! Сон теевсь ламонень вечкевикс артистэкс. Сюкпря тиринь кельсэ гайгиця моротнень кисэ! – кортась МР-нь культурань, национальной политикань ды архивень тевень министрась Светлана Баулина.
МР-нь Прявтонть кармавтоманзо коряс музыкальной искусствасо изнявкстнэнь кисэ Андрей Бочканов казевсь «Мордовия Республикань заслуженной артист» почетной лемсэ. Те кулясь вастозель виев цяпамосо! Теде башка, морыцянтень макссть «Равось – ояксчинь лей» раськеютконь этнокультурной экспедицияв сертификат. Тедеде экспедициясь юты Самара–Волгоград–Астрахань оштнева.
Концертэв сакшнось Андреень авазо Людмила Никитична, мельспародонть сонзэ эзть кирдеве сельведензэ.
– Сюкпря Пазонтень, эрямонь килангсо свал вакссон паро ломанть ды вадря ялгат! Сюкпря весенень, кить састь концертэв! – пшкадсь Андрей Бочканов ды меельцепелев бис лангс морызе «Вай, кодамо» моронзо. Ваныцятне цяпасть стядо ды кувать эзть нолда артистэнть сцена лангсто. Икелев молемань ки теть, Андрей!
Андрей чачсь-кассь Рузаевкасо. Ундоксонзо жо Кочкурбуень Кацялай велестэ, тосо чачсть тетязо-авазо. Прядсь музыкальной школа, косо тонавтнесь налксеме аккордеонсо. Музыкась ульнесь сонзэ туртов хоббикс. Школанть прядомадо мейле тонавтнесь Н.П. Огарев лемсэ МГУ-нь архитектурно-строительной факультетсэ, мейле – магистратурасо. Студентэнь шкасто эрьва косо морсесь. Самай сестэ сонзэ редизе МР-нь заслуженной артисткась Оксана Глебова, кармась тонавтомонзо вайгелень ладямо, морамо, тердизе невтемс прянзо филармониясо. Ды уш 2015 иестэ од церанть саизь тов важодеме. Шкань ютазь Андрей ушодсь моронь сермадомо. Эрзянь моротнень сермадомсто кармась тонавтнеме литературань эрзянь келенть, иляст уле кодаткак ильведькст, эдь сон кортнесь велень кортавкссо. «Вай, кодамо» васенце морозо теевсь алкуксонь хитэкс. Эдь ламонь эйкакш пингест ютась истя, кода морави моросонть. Седе тов ушодсь сермадомо морот эйкакштненень ды коллеганзо туртов. А стяко те концертсэнть ялгатне лемдизь сонзэ эсест Игорь Николаевекс, Игорь Крутоекс – машты тееме моросто хит!
Татьяна Маторкина