Вторник, марта 19, 2024
Важное

Курок минек республикасо кармить тешкстамо Велень хозяйствань ды перерабатывающей промышленностень важодицятнень чинть. Мордовиясь – аграрной регион, секскак те кенярксчись ашти прявтокс ламот предприятиятнесэ ды организациятнесэ важодицятнень туртов. Весе сынь теить покш путовкс республиканть ды целанек масторонть виевгавтомга. 

Истят предприятиятнень ютксо «Тепличное» АО-сь. Неень шкане те виев ды кеме предприятия, косо важодить эсь тевень содыця ды ёроков специалистт, конатненень виень коряс топавтомс куш кодамо производственной тев.

3-це цехесь васенцетнень ютксо

«Тепличное» эмежень кастомань предприятиянь 3-це цехесь аволь вишкинетнестэ. Неень шкане тесэ важодить малав 170 ломанть. Тесэнь теплицатнесэ кастыть сёксень помидорт, помидорт-продлёнкат, куярт.
– Тедедень вейксэ ковтнень перть 3-це цехесь роботась а беряньстэ. Те шкастонть пурназь 9300 тоннат продукция. Иенть прядовомс арсеви пурнамс 13 тёжат тоннат. Касовкстнэ а берянть, арсетяно, весе аравтлувтнень топавтсынек, – корты цехень прявтось Алексей Адушкин.
Эмежень кастыцякс тесэ кавксо иеде ламо роботы эрзянь авась Наталья Стенникова. Сонзэ ундоксонзо Покш Березник буень Эрзянь Найман велестэ.
– Теплицатнес важодеме понгинь апак арсе, апак учо, – ёвтни Наталья Стенникова. – Тесэ роботакшнось ялгам, сон ёвтнеськак тень эмежень кастомань предприятиядонть. Касынь велесэ, эмежень кастомань тевенть содылия, секскак роботадонть эзинь тандадо ды сынь.
Н. А. Стенникова важоди куяронь кастомань теплицасо. Эрьва чись тесэ ушодови вейкетьстэ – эмежтнень вадрясто ванносызь, касозь-кенерезь куяртнэнь пурнасызь, а эрявикс лопатнень жо сезнесызь.
– Минек теплицанть покшолмазо 1,37 гектарт. Тесэ важодить кемготово ломанть. Эрьва ковонтень тешкстазь пурнамс малав 220 тоннат продукция. Эряви меремс, октябрясто эмежтнеде пурнынек седе ламо кемекстазенть коряс, – тешксты Наталья Стенникова.
Истя жо эмежень кастыцякс тесэ важоди Марина Николаева. Сонгак Покш Березникень Эрзянь Наймансто. Куяронь кастомань теплицасо важоди вана уш кемголмово иеть.

Школадо мейле тейтерь-авась прядсь Кооперативной техникум, получась товароведэнь специальность. Те тевсэнть жо роботамс савсь овсе аволь кувать.
– Товароведэкс важодемс мелем мекс-бути арасель, сынь «Тепличноев» роботань коряс кевкстеме, – ёвтни Марина Николаева. – Тесэ таркат арасельть, секс кадыя телефоном. Шкась ютась, мон уш стувтынь теде, ушодынь роботамо товароведэкс лия таркасо. Весть гайневтсь тень тесэнь важодицясь Надежда Ивановна Киушкина, кевкстимим, ули-арась мелем самс роботамо теплицав? Мон мерян, уш лиясо важодян. Сон кевкстсь зарплатанть коряс, пачтясь, зяро сынст пандыть. Кувать апак арсе, кадыя икелень роботанть ды сынь тей. Ды ёвтаса, ве чияк эзинь янксе.

Эрьвась вечкевикс тевсэ

«Тепличное» АО-нь 4-це цехсэ течинь чине ловови 121 важодиця. Тесэнь теплицатнесэ кастыть эрьва кодат эмежть: куярт, помидорт, болгарской порцькат (перецть), баклажант. Сынст кастомасо важодить эсь тевень содыця алкуксонь специалистт.

Истятнэнь ютксо эмежень кастыцясь Наталья Буячева. «Тепличнойсэ» важодемантень сон макссь малав 34 иеть.
– Мон важодян болгарской порцькатнень марто, – корты Наталья Ивановна. – Те культуранть алов минек цехень теплицатнесэ максовить сисем соткат. Важодян тесэ ськамон. Порцькатне кастовить колмо тюсонь – якстереть, ожот ды пижеть. Сынь касыть куяртнэнь ды помидортнэнь ладсо, нетьксэст пачколить 5-6 метрат.

Те эмеженть марто роботась явови аволь ламосо. Истя жо сезнить а эрявикс лопатнень, тапарить кувака нетькстнэнь. Озавтомадо мейле порцькась кенери кавто ковонь ютазь. Те шкань перть жо мельганзо домкасто ваныть ды ванстыть весе орматнеде.
Эсь тевенть вадрясто топавтыцятнень ютксо истя жо эмежтнень мельга ваныцясь Татьяна Дружинкина. Авась эрьва валске юты эсь территориянть (те кавто гектарт) ды ванкшны касовкстнэнь, улить-арасть лангсост зыянонь кандыця унжинеть, паряк, кодаткак ормат. Бути мезеяк реди, куроксто пачти касовкстнэнь ванстомань коряс технологонтень.

– Мон монсь Ицялонь райононь Папулевасто, – ёвтни Татьяна Дружинкина. – Роботан тесэ 2004 иестэ саезь. Школадо мейле прядыя Н. П. Огарёв лемсэ МГУ-нь филологиянь факультетэнть. Бажинь улемс тонавтыцякс, важодемс эйкакш марто. Ансяк сеть шкатнестэ школасо таркат арасельть, эйдень кужос понгомс истя жо ульнесь стака. Семиянек сестэ эрилинек Елховкасо ды шабранок мирдть-нить роботасть «Тепличнойсэ». Монгак арсия варчамс.
Тейтерь-авась истя тейськак. Те шкас ледстни, чись ульнесь овторник,
сась видьстэ прявтонтень. Предприятиясонть сестэ важодсь профкомонь прявтокс Людмила Николаевна Живаева. Сон самай янксезевськак, тейтересь тесэ кувать а кирдеви. Вельть уш коськаня ульнесь. Пельсть, виензэ а сатыть.

– Кортасть мартон ды кучимизь кудов. Мерсть самс мартонь 8-це чинь кенярксчиденть мейле. Монь жо семс седеем эзь кирде. Зярыя чинь ютазь апак тално гайневтинь ды саевтия прям нейке, – корты эмежтнень мельга ваныцясь Дружинкина. – Кучимизь роботамо ТЭЦ-нь теплицатнес. Тосо кавто иеть ульнинь эмежень кастыцякс. Мейле ютавтымизь 1-це цехс, конань аволь умок калавтызь. Тосо важодинь вете иеть.

Пек куроксто тонадынь коллективентень, секскак арасель мелем ТЭЦ-стэ туемс, 1-це цехстэнтькак. Зярдо ушодсть тееме световой теплицатнень, кучимизь тов. Пельие важодинь теплицатнень теемасо. Ютыя весементь, строямсто савкшнось чуваргак кайсемс-ацамс. Мейле аламос ульнинь тепличницакс. Ды зярдо кармасть тееме неть теплицатнень, таго ютавтымизь стройкас, бригадирэкс. Ды истя сисем иеть важодинь бригадирэкс-звеньевоекс.

Ней жо малав кавто иеть Татьяна Дружинкина топавты эмежтнень мельга ваныцянь тевенть. Истямо тевенть 4-це цехсэнть топавтыть колмонест. Эрьва чись сынст ушодови планёркасто, косо технологонтень ёвтневи икеле чистэ топавтозь тевтнеде, пачтяви неезденть.

– Предприятиясонть важодемань иетнень перть ютыя весементь: важодинь паксясояк, эрьва кодамо теплицасояк. Ды вейкеяк чи эзинь янксе. Бути икеле содавлинь, карман тесэ важодеме, молевлинь тонавтнеме агрономокс. Эрямосонть монень те ков седе эрявикс улевель. Пек вечкса эсь роботанть. Вечкан ванкшномс эмежтнень, ванстомс сынст зыянонь кандыця унжинетнеде, мелявтан эрьва касовксонть кисэ, – кемексты Татьяна Дружинкина.

Тейтерь-авась аволь ансяк вечксы эсь тевенть, топавтыяк сонзэ вадрясто. Секскак лиснесь изницякс «Лучший по профессии» республикань пелькстамосо, тешкстазь Мордовиянь Велень хозяйствань ды продовольствиянь министерствань Почётонь грамотасо, ламоксть тешкставсь предприятиянь казнетнесэ.
Ды, эряви меремс, «Тепличное» АО-нь эрьва важодицясь – эсь тевень содыця специалист. Сынь теить весементь аволь ансяк эсь предприятиянть, весе республиканть ды масторонть кастомга-виевгавтомга. Тезэнь пурнавсь алкуксонь команда, конань прявтсо Александр Михайлович Живаев, алкуксонь профессионалось, тиринь предприятиянь васенце нежесь.

Мельвановикс ялгат! Ёвтан тенк седейшкавань поздоровт тынк профессиональной кенярксчинк кувалма – Велень хозяйствань ды перерабатывающей промышленностень важодицятнень чинть марто!
Тынк эйстэ ламосо ашти минек республиканть ды целанек масторонть вандынь чизэ. Тынь тейтядо покш ды эрявикс тев: касттадо, пурнатадо эмежть, вансттадо эйсэст, анокстатадо, озавттадо видьмекст модас. Васняяк жо вечксынк эсь тевенк ды макстадо весе ойменк. Арсян тыненк ды тынк малавиксэнк туртов кеме шумбрачи, уцяска, паро мельть-арсемат ды покш изнявкст! Уледе кемевикст эсь кочкавт тевентень!

А. М. Живаев,
«Тепличное» АО-нь прявтось.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».