Понедельник, января 17, 2022
Важное

Авань кенярксчись 1998 иестэ саезь масторонь келес тешкстави ноябрянь меельце недлячистэнть. Тедеде те покш чись сави ноябрянь 28-це чинтень.

Эрьванть юткстонок сехте питней ды лембе ледстнематне сюлмавить аванок марто, косо бу ней сон аволь уле… Минь сыненст ёвтатано сюкпрянь валт эрямонь каземань, трямонь-кастомань, минек шумбрачинек ванстомань ды весе тевенек коряс седейшкава мелявтомань кисэ.

Нать, а стяко малав эрьвась юткстонок васенцекс ёвтасы Авай валонть. Нать, а стяко эйкакшпорасто саезь минь ансяк сонензэ капшатано чамдомо ризксэнек-мелявксонок, ёвтамо кенярксонок.

Виде, сеть вийтне, конатнень сон кази тенек кастомстонок, эрямонь виде ки лангс ливтемстэнек, мейсэяк а онкставить, кодамояк питнесэ а пандовить. Тень кувалма, миненек свал тенст явома покш мель, бути сынь вакссонок – мазылгавтомс сыречист, шождалгавтомс эрямост, седе сеедьстэ содавтнемс...

Самай истя теи Саранск ошсо эриця ламо эйкакшонь триця Адушкинтнэнь семиясь, кить малав эрьва оймсема читнестэ капшить ардомо Орданьбуень Чукало велев тетяст-аваст содавтомо, ламо тевсэ тенст лездамо.

Кезэрень шкасто ульнесь истямо лув, сехте пек велесэ эрицятнень ютксо, зярдо одтнэ вечкевильть вейкест-вейкест туртов, венчамодо-урьвакстомадо икеле кучнесть малавикс ломанть одирьванть ды содамонть раськетнеде салава кевкстнеме, свадьбадо икеле седе ламо родост-раськедест содамо. Ансяк теде мейле кучнесть кудат одирьванть чиявтомо-ладямо.

Виде, истя эзть тее Дмитрий ды Юлия Адушкинтнэнь коряс тетяст-аваст, зярдо сынь ёвтызь мелест венчамодо-урьвакстомадо. Бути жо кандовомс сеть умонь шкатнес, кавонест раськетнень ёндо бу баслававлизь вейсэнь эрямос одтнэнь кода Орданьбуень Чукало велесэ эриця Дмитрий Адушкинэнь тетязо-авазо Василий Дмитриевич ды Анна Ильинична, истя жо Юлия Боклачевань (тейтерьксэнь фамилиязо) тетязо-авазо Александр Степанович ды Надежда Михайловна. Неть кавонест раськетнеде марямсто, сынст покштяст-бабаст эрямодост кунсоломсто, сыть арсемат, прок сонсь Пазось вейсэндинзе одтнэнь, малавикс ломанекс теинзе кавто виев, тевень вечкиця, стакачиде а пелиця раськетнень.

Видькстан, неень пандемиянь шкастонть минек, сёрмадыцятнень, материалонь саемга аволь кудов, офисэвгак чуросто кармасть тердтнеме. Адушкинтнэнь од семиясь жо, апак кавтолдо, цётазь шкантень тердимизь эрямо тарказост. Чарькодеви, кудос совамсто сеске редяви, кодамо кедьчелькев тосо кудазорось, мезе машты тееме кудазоравась.

Седейшкава, мизолкс марто вастымизь Дмитрий Васильевич ды Юлия Александровна Адушкинтнэ сынст лембе ды пек мазыйстэ теезь «пизынесэст». Натой тенст совамодо мейле эзинь кирдеве шнамонь валтнэде, мезень коряс толковамот тейсь кудазоравась, келя, мазылгавтомань арсематне монь, «сырнень кедтне» мирдень.

Сехте покш сюпавчист – эйкакштне

 

 

Дмитрий ды Юлия Адушкинтнэ теевсть содавиксэкс апак учо, Саранскоень А. С. Пушкин лемсэ парксонть улемстэ. Виде, ансяк шкань ютазь минь чарькодтяно, апак учонь вастовомат масторлангсо а эрсить. Нать, сонсь Пазось вейсэндинзе неть од ломантнень, казсь колмо эйкакшт. Эрьва недлячистэ ды покш читнестэ ояксчисэ эриця те семиясь яки храмов. Тонавты эйкакштнень православиянь кемемантень (верантень). Эрьва эйкакшонть, школасо тонавтнемадо башка, ули вечкевикс тевезэ. Невтемакс, Кира машты мазыйстэ артомо, сон яки художественной школав, теде икеле тонадсь парсте тенниссэ налксеме, дзюдонь коряс ламо содамочинь пурнамо.

Роман истя жо парсте тонавтни школасо, машты парсте морамо ды спортсо васенцекс улеме. Колмо иензэ топодемадо мейле цёрыненть васенцеде ветизь спортзалс, ды се шкастонть саезь сон кармась улеме тензэ омбоце школакс. Кодамо спортонь видэнь коряс ансяк эзь невте ёрокчинзэ: тхэквондонь, ушу-сань, велоспортонь, мотокроссонь коряс, тайской боксонь ды истя седе тов.

Виде, сехте вишкинентень, Васянень, зярс эштё ансяк вете иеть, сон яки эйдень кужов. Цёрынесь чачсь православиянь Крештениянь покш чистэнть, кемеви, сонзэ истя жо учить ламо эрьва кодат ёрокчинь кастомань тевть. Кодат – невтьсы шкась.

Мезесь вечкевсь ды каявсь васень варштавкс лангс, Юлия Александровна ламо шкань перть мартон кортамсто тунь эзинзе кадно тевензэ. Эдь ансяк сась важодема таркасто кудов мирдезэ обедамо, сонзэ эряви тантейстэ андомс, шкань ютазь вейке омбоце мельга совасть кудов школасто Роман цёраст ды Кира тейтерест. Неявсь, те семиясонть эйкакштне тонавтозь эсест мельга сынсь якамо, ламонь апак корта, семиясост ладявозь лувонь коряс, ярсамодо мейле эрьвась апак кармавто кундась эсензэ тевс. Вишка цёрынест Василий се шкане ульнесь эйдень кужосо. Нама, аволь эрьва семиясо истямо редят. Васняяк ёвтнетяно тетядонть-авадонть, истят эйкакштнень кастыцятнеде.

 

Адушкинтнэнь

раськеде

Дмитрий Адушкинэнь чачома тарказо – Орданьбуень Чукало велесь. Сон ламо эйкакшонь триця семиясто. Тетязо-авазо – Василий Дмитриевич ды Анна Ильинична – трясть-кастсть ниле цёрат. Тетяст ульнесь В. И. Ленин лемсэ колхозсо зоотехникекс, аваст теке хозяйствасонть ламо иеть важодсь агрономокс. Шкань ютазь Василий Дмитриевичень ладизь колхозонь прявтокс. А мезть сёпомс, тетяст-аваст свал ульнесть важодема таркасо, кудоютконь тевтнень топавтсть цёрынетне, текенень поладсынек, покштне вансть вишкинетнень мельга. Сынст свал ульнесь покш хозяйстваст, кардаз потсо ламо ракшаст ды певтеме тевть эмежпиресэ. Эйкакшпингедензэ ледстнемстэ Дмитрий Васильевич тенек пачтясь, келя, ялганок кизна экшелямо, чинь каршо рунгост калямо капшасть, а минь – паксяв, васня якстерькаень, мейле модамарень мотыжамо, сёксень шкастонть сынст таргамо.

Ансяк ней, аволь аламо шкань ютазь, ниленест цёратне чарькодсть, кодамо паро эрямонь тонавтома школа макссть тенст вишкапингстэ тетяст-аваст. Тонавтызь алкукс важодеме, эрьва тевенть педе-пес прядомо, ламонь эсест кедьсэ тееме маштомо. Виде, неень шкане сыненст а эряви сиведемс ве ёндонь ломань те эли тона тевенть топавтомсто. Текенень поладсынек, те семиясонть ниленест цёраст – ламо эйкакшонь триця тетят. Покшонть, Сергеень, ниле эйкакшонзо, омбоценть, Дмитриень, ды колмоценть, Юриень – колмонь-колмо, Василиень мик кото. Истя, Василий Дмитриевич ды Анна Ильинична Адушкинтнэнь кемготово нуцькаст. Сынь весе сеедьстэ пурнавкшныть покштяст-бабаст кудос, покштне лездыть кудоютконь тевтнесэ, вишкинетне кенярдовтыть мизолкссост, вечкемасост.

Дмитрий Адушкинэнь ледстнеманзо коряс, аванзо тетясь, сонзэ покштясь, Илья Александрович Прытков, сынст велесэ истя жо ламо иень перть ульнесь колхозонь прявтокс, те хозяйствантень сонзэ кучизь важодеме Куцян велестэ (те чачома тарказо). Никс од прявтось саизе велень вадря тейтеренть Валентина Сергеевнань.

Сон аволь умок тусь эрямосто. Паро, нуцькатненень бабаст кенерсь ёвтнемс войнань а шожда эрямодонть. Зярдо покштяст тусь масторонть идеме, семиясь пек майсесь, сеедьстэ кадовкшность пельсвачо, ялатеке обуцяст кемельть ды виевстэ важодсть, секс

весементь цидярдызь, кодат шкат ансяк эзть саво те семиянтень печтямс. Обуцясост ванстовсь сехте питнеесь – свал улемс видечинь вечкицякс, киньгак а покордамс, а сявадомс сельме лиятнень ули-парост лангс ды бажамс теемс паро ломантненень. Сынст эрямо лувонть поладыть нуцькасткак.

Чукало велесэ школанзо прядомадо мейле Дмитрий Адушкин тонавтнесь Н. П. Огарёв лемсэ МГУ-нь промышленной электроникань факультетсэ. Вузонть прядомадо мейле мусь эстензэ вечкевикс тев, конанть парсте тонавтнемадо мейле теевсь башка предпринимателекс.

Урьваст Юлия Адушкинань вановтонзо коряс, сон свал ёвты седейшкавань сюкпрянь валт атявтонзо ды ававтонзо туртов истямо цёранть, сонзэ мирденть кастоманзо ды эрьва мезень тееме тонавтоманзо кисэ.

– Кода сынь васенцеде Адушкинтнэнь кудос, сеске сельмезэнь каявсь сынст покш хозяйствась, косо эрьва ули-парось эсензэ таркасо, кенярдовтымим кудопотмонь мазычись ды ваньксчись. Виде, теньсэ покш путовксост монь ававтонть Анна Ильиничнань ды атявтонть Василий Дмитриевичень. Сынь алкуксонь азорт ды истят тетят-ават, кеман, кить зярдояк а кармить кирдеме визьксчама эйкакшост ды нуцькаст коряс. Сынь весементь теизь эйдест алкуксонь ломанекс кастомга.

Виензэ ды

содамочинзэ сатыть эрьва тевс

 

Неть валтнэ пек ладить республикасонок ды сонзэ томбале содавикс блогерэнтень, ёроков дизайнерэнтень, ламо эйкакшонь триця авантень Юлия Адушкинанень (Боклачеванень). Те мазый чачо, эрьва тевс дока тейтерь-аванть ундоксонзо Отяжелень Ламбаське велестэ. Тетянзо Александр Степановичень ёндо покштязо ульнесь эсест велесэ колхозонь прявтокс. Сонсь жо Александр Степанович пингень перть важодсь Саранск ошонь «Тепличное» панжадо акционерной обществасонть, ламо иеть ульнесь бригадирэкс консервань теемань цехсэ. Вана нейгак, пенсияв туемадо мейле, те предприятиянь прявттнэ эйсэнзэ а стувтнить, эрьва кенярксчинтень кудос тензэ пачтить казне. Юлиянь тетязо-авазо школань прядомадо мейле тусть эрямо Саранскоев, ансяк седе ламо шка эрясть Луховка посёлкасо. Авазо, Надежда Михайловна (тейтерьксэнь фамилиязо Русяева), профессиянь коряс врач-гинеколог, сазоронзо Любовь Михайловна марто сынь кавтаськеть. Кавонест кочкасть вейке тев, ансяк Любовь Михайловна важоди Ташто Шайговань райбольницясо.

Русяевтнень раськесь содавикс аволь ансяк минек республикасо, сонзэ томбалеяк. Надежда Михайловнань авазо, Вера Петровна, содавикс тонавтыця, пингень перть важодсь школасо. Мирдензэ Михаил Яковлевич марто трясть-кастсть кавксо эйкакшт ды эрьвантень лездасть видестэ муемс эрямо кист, кеместэ стямс пильге лангс. Сынст раськесэ улить юристт, экономистт ды ламо врачт. Нать, а стяко 2008 иестэ «Семья года» пелькстамосонть сынь лиссть изницякс «Династия врачей» номинациясонть.

Эштё вейке ине тевень коряс пингеде- пингес Ламбаськень эрицятне, сехте пек Пазнэнь кемицятне, кармить ледстнеме Вера Петровнань лементь: сынст велесэ храмонть теемстэ покш путовксонзо кисэ. Иетнень лангс апак вано, те эрзянь авась ютынзе малав весе икелень тонавтницянзо, ялганзо ды содавиксэнзэ сынст велесэ храмонть теемадо кулянть марто. Виде, ламот юткстост покш мельспаросо вастызь те паро ушодксонть ды, ков сатотсть виест, лездасть.

Вера Петровна кода сонсь ульнесь Пазнэнь кемиця, истя жо весе кавксонест эйкакшонзо тонавтынзе аволь ансяк озномо, истя жо содамочис бажамо, малавикстнэнень ды весенень, кить тенст пшкадсть, стака шкасто лездамо. Неть: сонзэ тейтертне – Раиса Наумкина, Нина Русяева, Надежда Боклачева, Любовь Силантьева, Анна Мхчан, Евдокия Русяева ды цёраст Николай ды Михаил Русяевтне. Тешкстасынек, Раиса Михайловна, прявт врачонь тевень топавтомадо башка, ламо иеть ульнесь Саранск ошонь горсоветэнь депутатокс, Нина Михайловна васня важодсь хирургокс Атяшевань райбольницясо, мейле Саранск ошонь нилеце номер эйдень поликлиникасо.

Надежда Михайловна малав колоньгемень иеть важоди акушерэкс-гинекологокс, а лововияк, зяро семиянень лездась теевемс уцяскав авакс, зяронь кортынзе а каявтомс эйкакшост, каземс тенст эрямо.

Вишкапингстэ Юлия тейтерезэ сеедьстэ ульнесь аванзо важодема таркасо. Те шкас сельме икелензэ истямо сценась: авазо кеместэ корты пешксесэнть марто, кармавты кадомс эйкакшонть. Сынст верьга вайгельть кортамонтень шабра кабинетстэ састь лия врачт, вейсэ мезе-бути решить ды, окойники, прасть вейке мельс ды юткстост кой-кинь мик сельведест лиссть. Ансяк неть сельведтне аволь нусманят, уцяскавт! Лисни, эштё вейке эйкакшонь эрямось ванстовсь.

Боклачевтнень семиясо лиясто пелеветь гайневтить аваст туртов, кенярксов куля пачтить шумбра эйкакшонь чачтомадо. Истят шкатнестэ аваст Надежда Михайловна валскес мейле а матедеви ды зярдояк тень коряс мельсапаро а кирди, мекевлангт, седейшкава кенярды сонензэ пшкадицятнень уцяскаст коряс.

Мирдензэ марто вейсэ лиятнень кисэ кенярдомо тонавтынзе кавонест тейтересткак: Юлиянь ды Екатеринань. Тейтерькатне парсте тонавтнесть школасо, Екатерина прядызе сонзэ сырнень медаль марто, а седе тов – якстере диплом марто Н. П. Огарёв лемсэ МГУ-нь экономической факультетэнть, конань прядомадо мейле важоди специальностень коряс МР-нь Финансонь министерствасо.

Юлия Александровнань васенце специальностезэ – врач-терапевт, Н. П. Огарёв лемсэ государственной университетэнь медицинской факультетэнть прядомадо мейле колмо иеть важодсь «Мордовия» спорткомплекссэ врачокс-косметологокс. Теке шкасто ушодсь топавтомо эштё вейке мелень витиця тевензэ – кудопотмонь, садпирень мазылгавтоманть, весе ули-паронть видестэ ды лезэвстэ аравтнеманть (дизайнерэнь) тевенть.

Виде, Мордовиясо сонзэ седе пек содасызь кода Instagram-блогерэнть, кие невти эрямонть эрьва ёндо, истя, кодамо сон алкукс. Невтемакс, велев эрьва сыцясь кудоютконь тевень топавтомсто каясынзе мазый оршамопелензэ ды карсемапелензэ, кода свал, таргасынзе ташто нулатнень ды оршасынзе, мезесь умок уш кандтневиця. Аламо кие юткстонок невтьсы прянзо ды малавиксэнзэ истямо лувсо. Юлия Александровна жо а визди невтемс эрямонть истямокс, кодамо сон ули. Нать, а стяко неень шкане сонзэ лангс сёрмадстозь 7 тёжадо ламо ломанть, кить умок уш тусть велестэ, а седейсэст те шкас ванстовсь тиринь таркантень вечкемась, икелень эрямодонть ледстнемась. Паро, неень шкане од ломантнень ютксо улить истят семият, кода Адушкинтнэ ды Боклачевтне (Русяевтне). Самай сынь кастыть тевень вечкиця, ламос бажиця эйкакшт ды а виздить невтемс сынст социальной сеттнень вельде, косо ней чинек-венек аштить минек эйкакштне ды нуцькатне.

Адушкинтнэнь кедьсэ улемстэ карминь содамо, те семиясь пек вечки эрьва ков якамо, васоло оштнень ды велетнень ванкшномо. Виде, эрьва мезе эрси ки лангсо улемстэ. Весть, кода-бути эсест ёнкска ардомсто, пек капшильть вейке таркав, шкаст тунь арасель. А тесэ икелест кинь-бути яжавсь автомобилест, ломантне уш аволь одт. Кудазорось Дмитрий Адушкин апак кавтолдо лоткась ды кармась тенст лездамо. Юлия низэ содась, сон лиякс а машты, варштавкссо тензэ пачтясь, зярс а тейсы, сынь а сыргить. Виде, неть ды ламо лиятнеяк, кинень савсь тенст лездамс, аволь ансяк сыненст, тетяст-аваст туртовгак ламо сюкпрянь валт ёвтасть истят эйкакштнень кастомаст кисэ.

Авань кенярксчиденть икеле минь а стяко саинек мель ёвтнемс неть кавто покш раськетнеде. Эдь ламось эйсэнек улезесь: обуцясь, кода минь ветятано прянок лия ломантнень коряс, аноктано-арась лездамс кажос понгозентень, а ютатано вакска зыянов тевень лисемстэ, весемесь саеви семиясто. Минь эрямосо тейтяно истя, кода бу теевельть малавиксэнек. Нать, а стяко Пазонь книгасо сёрмадозь: тейть ломантненень истя, мезе учат пельдест тонсь.

Дмитрий ды Юлия Адушкинтнэнь семиянть ули арсемазо: путомс мазый ды паро кудо. Теемс покш садпире, кодамо ульнесь Юлия Александровнань эйкакшпингстэ: озавтомс ламо чувтот, кастомс мазый цецят, седейшкава якамс корьмай моданть мельга, кода тейсть неть кавто раськетнень покш семиятне.

Тонавтомс тенень эйкакшост, штобу сынь поладовлизь покштяст-бабаст паро тевтнень, улевельть истят жо алкуксонь ломанекс, ламос бажицякс ды малавиксэст туртов кенярксонь казицякс.

Те паро тевентень ушодксось уш путозь. Одтнэ сайсть мода Кочкурбуень Булгакова велестэ. Кемеви, маласо шкасто тосо карми улеме аволь ансяк паро кудо, истя жо покш садпире, конась карми кенярдовтомо весе раськенть. Сынст кенкштне свал кармить панжадо малавиксэст ды ламодояк ламо содавиксэст туртов.

Авань кенярксчиденть икеле ёвтатано поздоровт республикань весе аватненень, кить казить эрямот, кить виест ды содамочист максыть эйкакшост кастомантень, сыненст уцяскав эйкакшпингень каземантень. Кадык аволь ансяк кенярксчистэнть, свал аватнень чачосо налксезэ мизолксось, кудопотмотне жо пештявост эйкакшонь ды нуцькань кенярксов пейдемадо.

 

Валентина ЮДИНА.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».