Вторник, марта 19, 2024
Важное

Неень шкане эрьванть туртов панжозь келей ки шкинемантень. Бути улить ёрокчить ды мелеть, эстеть муят аволь ансяк мелень коряс ды вечкевикс тев, истя жо лезэвгак.

Ды пек вадрясто течи теньсэ лезды Интернетэсь. Тесэ улить эрьва кодат видеоурокт, конат кармить вадря лездыцякс аволь ансяк весемесэ кедьчелькевенть туртов, ушодыцянть туртовгак. Истя, ламот кармасть явомо башка мель эсь хоббинтень. Кие викшни вадря картинат, кие сты-коды оршамот, кие кази мазычи тейтерь-аватненень (тейни-мазылгавты кенжть, сельмепонат) ды эштё пек ламо лия мезе. А вана Саранск ошонь тейтересь Надежда Баландина пиди-тейни эрьва кодамо мазычи сапоньстэ. Сонзэ роботатнень ванномсто а сеске чарькодят, кедьсэть кирдят сапоньстэ теевкс.


– Шкинемантень ёрокчись монь уш эйкакшпингстэ саезь, – ёвтни Надежда. – Тонавтнинь художественной школасо, вечкилинь викшнеманть ды кодамонть. Зярыя иеде икеле варчия эсь кедьсэ теемс сапонь, истя весемесь ушодовськак.

Н.П. Огарёв лемсэ МГУ-со тонавтнемадо мейле (получась историкень диплом) тейтересь зярыя шкань перть роботась школасо, полавтсь сеть тонавтыцятнень, конат кодамояк тувталонь коряс эзть саво. Свалшкань тарка школасонть эзь муеве, истямо лувсо жо важодемась ульнесь аволь мелень коряс. Весть Московсо, микшнемань центрава якамсто, сонзэ сельме икелев понгсь сапонень теемань туртов човорявкс. Надежда сонзэ рамизе, сась кудов ды варчизе теемс. Нейгак ледстни, васень сапонесь ульнесь кофень чине марто ды лангс ваномс аволь мазыйне. Ансяк те тейтеренть эзизе тандавто. Тонавтнесь видеоуроктнень вельде, варчнесь эрьва кодат ёнкст, технологият. Сапонень пидемань тевесь сонензэ кармась туеме мельс. Васняяк тейниль эсензэ, мейле малавиксэнзэ ды ялганзо-оянзо туртов. Аламонь-аламонь пурнась опытэнть, роботанзо яла седе вадрялгадыльть. Сапоньстэ тейнесь цецят, ракшат, эмежть. Ломантне кармасть кедьстэнзэ рамамо. Те шкастонть саезь сапоньстэ теевкстнэнь анокстамось Надеждань туртов кармась аволь ансяк хоббикс, истя жо лезэв тевекс.

Микроволновой пецькасо пидезь сапонень човорявксонть, козо мейле каяви тюсонь максыця артома ды тантейстэ качадыця ой, тейтересь кайси тень туртов эрявикс форматнева, ды вана уш анокт эрьва кодамо тюсонь цецят, эмежть, фруктат, ракшинеть, машинынеть ды ламо лия мезе. Тееви эрьва мезе. Ды ламо шкань перть кудосо мезеськак а кирдеви, весементь рамить. Неень шкане сапоньстэ теевкстнэ кармасть паро казнекс куш кодамо кенярксчис. Кода ёвтни Надежда, казнетнень кармавтыть уш икелев, штобу кенярксчинтень сынь улевельть анок. Од иентень ламот кармавтыть иень тешксэнть (ракшиненть), Отечествань ванстыцянь чинтень цёратненень рамить сапоньстэ теезь танкт, Авань чинтень весе учить цецяпусмотнень, седе сеедьстэ тюльпантнэнь. Кармавтнить ламот лия кенярксчитнененьгак.

– Ней тетятне-аватне пек сеедьстэ кармавтнить эйкакшост туртов сапонь. Вишкинетненень пек вечкевить мазый фигуркатне, теке марто истямо сапоньсэнть арасть кодаткак берянь човорявксткак, – тешксты тейтересь.

Сапоньстэ теезь мазычинть ванозь, мон кевкстия тейтеренть, арази киньгак сатыть виензэ неть цецинетнесэ, ракшинетнесэ ды лия теевкстнэсэ шлямс кедтнень? Надежда мизолдозь тешкстызе, сувенирной сапоненть седе ламот саить мазычинть кисэ. Нама, ульнесть истят тевтькак, зярдо сонзэ човорясть алкуксонь ярсамопель марто. Ульнесть истят, кие бажась сэвемс сапоньстэ теезь эмежтнень, бутербродтнэнь ды лия ярсамопельтнень.


Надежда Баландина киньгак эйстэ а кекши сапонень теемань салавачитнень. Сон покш мельсэ ютавты мастер-класст школасо тонавтницятнень туртов, тердтнить эйсэнзэ выставкатнес-ярмункатнес. Эйкакштненень пек вечкеви сапонень човорявксонть кайсемс форматнева ды ваномс, мезе лиси.
Шкинеманть туртов весе эрявикс материалтнэнь Надежда кармавты Интернетэнть вельде, тосо жо, социальной сеттнесэ, невтияк эсь продукциянть ды муи рамицятнень.
Тейтересь тешксты, сапонень теемась – алкуксонь искусства, кона кази кеняркс ды кепети ёжонть!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».