Четверг, декабря 02, 2021
Важное

Ютасть 40 чить, кода тусь эрямосто минек редакциянь журналистэсь, экономикань ды велень хозяйствань отделэнь прявтось Пётр Васильевич Зиновьев.


Газетасонть важодемань перть сон ардтнинзе республикань малав весе велень хозяйствань предприятиятнень ды вадрясто содылинзе весе сынст прявттнэнь. Пётр Васильевич кортакшов ломанель, сон эрьванть марто муиль кель-вал. Коллективенть ютксояк сон ульнесь, кода рузтнэ мерить, «душа компании», чевте седей, панжадо ойме. Кодамо ёжот илязо уле, Пётр Васильевич марто кортамодо мейле мелеть кепетиль. Истят ломантне важодемеяк маштыть, ломань ютксо пряст ветямояк. Семиясо сон паро мирдель, вечкевикс тетяль ды покштяль.

Журналистэнь профессиянтень Пётр Васильевич Зиновьев сась а сеске. Сон чачсь 1959 иестэ Покш Березникень райононь Шугурова велесэ. Эштё школасо тонавтнемстэ сёрмалесь «Заветы Ленина» райононь ды республикань газетатнес. Тень кисэ содыцянзо лемдекшнизь корреспондентэкс. Сестэ покш журналистикадонть кияк эзь арсеяк. Пётр Зиновьевнень пек вечкевкшнесь гражданской авиациясо ливтницянь тевесь. Шугурова велень средней школанть прядомадонзо мейле сыргась Рязанень областень Сасовань гражданской авиациянь училищав. Самай тосо анокстасть истят специалисттнэнь. Кие соды, паряк, эрямосонзо икелепелев сёрмадозель уш улемс тензэ журналистэкс, ансяк тей самодо мейле цёранть мелезэ полавтовсь, куш ютазель шумбрачинь комиссияськак.

Саранскоев самодо мейле максынзе документэнзэ Н.П. Огарёв лемсэ Мордовской госуниверситетэнь филологической факультетс. Тонавтнемась тензэ вечкевсь. Перьканзо оятне ульнесть эрзят ды мокшот. Колмо курстнэде мейле апак учо Зиновьевень тердизь деканатов. Кортамось аволь кувакаль. Сестэнь кафедрань прявтось Виктор Миронович Макушкин мерсь, келя, минек факультетстэ эряви кучомс ломань тонавтнеме Уралонь государственной университетэнь журналистикань факультетс. Эряви меремс, се шкане лия ошонь тонавтнемань заведениятнес лавшосто тонавтницятнень а кучнильть. Пётр Зиновьев согласясь апак кавтолдо, куш тонавтнемскак эрявсь иеде седе ламо.

Студентэкс улемстэ од цёрась кемекстась тонавтнеманзо практикасо, свал сёрмалесь эрьва кодат жанрань материалт «Уральский рабочий» газетас. Тиринь ёнкссо практикатнень Пётр Зиновьев ютась свал «Эрзянь правдасо». Те шкастонть савсь сёрмалемс материалт эрьва кодамо темас. Ульнесь а шожда, эдь журналистикань факультетсэ эрзякс сёрмадомо эзть тонавто. Тенень эрявсь эрзянь ойме ды обуця.
Вана уш ютасть тонавтнемань иетнеяк. Кевкстема, ков молемс роботамо, Зиновьевень икелев эзь стякшно. «Эрзянь правдань» икелень редакторось Пётр Прохорович Борейкин умок уш вансь цёранть сёрмадовксонзо мельга ды а весть тердсь роботамо тиринь газетас.

Сонськак уш арсизе умок, сы роботамо тей. Те ульнесь 1982 иестэ. Од корреспондентэсь уставась важодеме велень хозяйствань отделсэ. Отделэнь прявтось Виктор Дмитриевич Ганчин кодат ансяк заданият эзь максне. Цёрась свал снартнесь топавтомс тевенть кода эряви.
Ледстневи, кода-бути кучизь Пётр Зиновьевень командировкав Теньгушевань районов. Тосонь «Дружба» колхозсонть вельть уш тевтне мольсть беряньстэ. Председателенть ды роботыцятнень марто кортнемадонть мейле, Зиновьев весе тувталтнэнь невтинзе «Эрзянь правдань» лопатнесэ. Материалось ванкшнозель Теньгушевань райкомонь бюросо. Асатыкстнэ витезельть ды тевтне сыргакшность таркастост. Иень ютазь од корреспондентэсь кармась роботамо культурань отделсэ. Прявтокс сестэ тесэ ульнесь Василий Иванович Дёмин журналистэсь. Од журналистэсь тесэяк невтизе перанзо пштичинть.

Весть Покш Березникень районсо командировкасо улемстэ савсь понгомс тензэ Эрзянь Найман велес. Тесэнь од ломантне а весть сёрмалесть газетас а роботыця велень клубдонть. «Эрзянь правдань» культурань отделэнь корреспондентэсь ванкшнынзе тевтнень эрьва ёндо ды сёрмадызе мелензэ «Од ломантне арсезевсть…» материалсонть. Сон эзь чумондо велень прявттнэнь, конат эзть муе ярмакт клубонть витнемс, сон чумондынзе эсест од ломантнень, конат эсест туртов тунь мезеяк а снартнить теемс. Печатазь материалдонть мейле ютавтозельть промкст, ды зярыя шкань ютазь икелень клубось полавтовсь. Весе роботанзо перть Зиновьев снартнесь эсь материалтнэсэ невтемс эрямонь асатыкстнэнь, сынст печтямонь китнень-янтнэнь.

Шкась таркасонзо а ашти. Иетнень ютазь таштавсь журналистэнь опытэськак. 1989 иестэ Пётр Васильевич аравтозель культурань отделэнь прявтокс. Эсь роботадонть башка сон топавтыль ламо лия тевтькак. Культурань отделсэ ютавтсть практикаст Н.П. Огарёв лемсэ Мордовской госуниверситетэнь филологической факультетэнь студенттнэ. Пётр Васильевич весенень лездыль, максниль заданият. Ней неть студенттнэстэ ламот роботыть республикань изданиятнесэ. Культурань отделэнь прявтокс роботамсто покш робота ветясь внештатной автортнэнь мартояк. Сонзэ кабинетэсь зярдояк чаво а эрсиль. Свалшкань инжекс тесэ ульнесть газетань икелень автортнэ Артём Богомолов, Иван Ведяшкин, Павел Любаев ды лият.

Культурань отделсэ роботамодо мейле Пётр Васильевич зярыя иень перть ульнесь экономикань ды велень хозяйствань отделэнь прявтокс. Газетань лопатнесэ свал лиснесть республикань промышленной ды агропромышленной комплексэнь предприятиятнестэ материалт. Сеедьстэ невтсь Саранскоень предприятиятнень роботасткак. Экономикань тевтнень невтемаст кис «Эрзянь правда» газетась лиснесь республиканской конкурсонь лауреатокс. Теньсэ, нама, покш таликазо отделэнь прявтонть П.В. Зиновьевень.
 

Пётр Васильевичень ламо эрьва кодат казнензэ. Сон ламоксть ульнесь Мордовиянь Журналистэнь союзонь конкурсонь иень сехте паро материалонь лауреатокс. Национальной печатенть кемекстамонзо кис Пётр Васильевич казезь Мордовиянь Госсобраниянь Почетонь грамотасо. Теде башка, а весть казезель Мордовиянь Печатень министерствань Почетонь грамотатнесэяк. Мордовиянь агропромышленной комплексэнь профсоюзонь организациятнень эрямост невтемань кис Агропромышленной комплексэнь профсоюзной рескомось казекшнизе сонзэ Почетонь грамотасо. Республикань Журналистэнь союзонь конкурстнэсэ Зиновьевень материалтнэ а весть ловозельть сехте парокс.
Печатьсэ ламо иень перть роботамонь кис П.В. Зиновьев казезь Российской Федерациянь Культурань профсоюзонь ды Массовой коммуникациянь министерствань Почетонь грамотасо. Сон – Мордовиянь массовой информациянь средстватнень заслуженной роботник.

Пётр Васильевичнень ульнесь ансяк 61 ие… Сонзэ юткстонок туемась – а ёвтавикс сэредькс, ёмавтома ды певтеме ризнэма.

«Эрзянь правда» газетань коллективесь
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».