Четверг, июня 20, 2024
Важное

1945 иень маень 9-це чись – а стувтовикс чи. Истя, Ине Изнямонь 78 иетнень тешкстамонтень «Эрзянь правда» газетась яволявтокшнось республиканской творческой пелькстамо: «Кияк апак стувто! Мезеяк апак стувто!», «Никто не забыт! Ничто не забыто!». Сон мольсь апрелень 24-це чистэ саезь маень 10-це чис.

Те шканть перть минек редакцияв кучовсть видеот, конатнесэ пелькстыцятне ёвтнить стихотвореният эли морыть морот эрзянь ды рузонь кельтнесэ, конатне алтазь Ине Изнямонь чинтень! Истя жо састь ламо артовкст ды теевкст, конатне истя жо алтавить те Ине чинтень. Весе неть роботатне максовсть «Эрзянь правда» газетань социальной сеттнень куротнесэ. Сынст ванность минек ловныцятне ды истя жо ёвтасть эсь мелест.


Маень 19-це чистэ «Эрзянь правда» газетань редакциясо пурназель кенярксов вастовома, конань лувсо казезельть «Кияк апак стувто! Мезеяк апак стувто!», «Никто не забыт! Ничто не забыто!» республиканской творческой пелькстамонь изницятне.
Пелькстамосонть эсь ёрокчист невтизь сядодо ламо ломанть, конатнень ютксо эйдень кужов якицят ды воспитательть, школасо тонавтницят ды тонавтыцят, культурань ды образованиянь ёнкссо важодицят Саранск ошсто, республикань районтнэстэ ды Россиянь колмо регионтнэстэ: Московсто, Пензасто, Саратовасто.
Жюрись, козо совасть МР-нь Писателень союзонь председателесь Татьяна Мокшанова, МР-нь Журналистэнь союзонь председателесь Людмила Резяпкина, «Эрзянь правда» газетань прявт редакторось Марина Девятова, газетань художественной редакторось Галина Табаева, малав 60 роботатнень эйстэ кочкизь 15 сехте вадрятнень. Кода тешкстызе жюрись, теемс тень ульнесь пек а шожда, эдь эрьва важодевксэсь лиятнень ёнов а молиця, мельстуиця.

Истя, «Артовкст ды эсь кедьсэ теевкст» номинациясонть сехте вадрякс ёвтазь Саранск ошонь 80-це № эйдень кужов якицясь 5 иесэ Матюшкина Александра (воспитательтне О. Ю. Захарова ды Ю. В. Титова). Омбоце тарканть кисэ казевсь Саранск ошонь 112-це № эйдень кужов якицясь, сехте вишкине участникесь Борисов Матвей. Сон анокстась эсь кедьсэ теевкс. Колмоце таркась максовсь Саранск ошонь тейтерькатненень – 6 иесэ Оля ды Аня Барсуковатненень, сынь казевсть Изнямонь чинтень алтазь теевксэнть кисэ. «Эрзянь кельсэ стихотвореният ды морот» номинациясонть васенце таркась максозь Отяжелень райононь Ламбаське велень школасо тонавтницянтень Надежда Аитованень. Сон ловнызе Александр Щегловонь «Киносо» стихотворениянть. Омбоце таркась максовсь Орданьбуень райононь Тургеневань средней школань рузонь келень ды литературань ды эрзянь келень тонавтыцянтень Галина Марочкинанень «Зяро иеть ютасть» авторской стихотворениянть кисэ. Колмоце тарканть кисэ тешкставсь Отяжелень средней школань 8-це классонь тонавтницясь Мамаева София Павел Любаевень «Ванстодо мирэнть!» стихотворениянть ловноманзо кисэ. «Рузонь кельсэ стихотвореният ды морот» номинациясонть изницякс ёвтазель Кочкуровань средней школань 9 «Б» классонь тонавтницясь Будаева Анастасия.

Пелькстамонтень сон кучокшнызе «Снимки без фоторамок» эсь стихотворениянзо, конань алтызе эсь сыре покштянстэнь Варлам Андреевич Лыбаевнень. Эряви меремс, Анастасиянь стихотворениязо пек тусь мельс жюринтень ды социальной сеттнесэ «Эрзянь правдань» куронтень совицятненень. Омбоце таркасонть Саранск ошонь 80-це № эйдень кужонь 3-це ды 8-це старшей группатнес якицятне ды тей жо икелень якицясь, баянистэсь Леонтьев Кирилл. Сынь кучокшность «У костра» музыкальной вишка сценка.

А вана колмоце таркась максозь Саратовань областень Советской СДК-нь «Живое слово» студияв якицянтень Ева Тараненконень «Чулочки» стихотворениянть ловноманзо кисэ. Эрзянь кельсэ видеороликенть кисэ васенце таркась максовсь Саранск ошонь 99 № эйдень кужонь воспитателентень Наталья Видякинанень, сон ловнызе «Монь покштям» стихотворениянть. Омбоце ды колмоце таркатне сатотсть Отяжелень средней школань 8-це ды 10-це класстнэсэ тонавтницятненень Татьяна Составкинанень ды Виктория Кудашкинанень. Сынь ловнызь «Тиринь мастор» (авторской) ды «Мон течи туян бойс» стихотворениятнень. А вана рузонь кельсэ видеороликенть кисэ покш казнесэнть тешкставсь Саранск ошонь 8-це № эйдень кужов якицясь 4 иесэ Павел Лепеленков (воспитательтне Т. А. Малышева, Н.С. Чернова). Павел ловнызе «Дедушкин портрет» стихотворениянть. Омбоце таркасонть – Московонь «Эрзянь вайгель» ансамблясь «Мы возвращаемся домой» моронть марто. Колмоцесэнть – Саранск ошонь 99 № эйдень кужонь 12-це группав якицятне. Сынь снимасть Изнямонь чинтень видеопоздоровт.

Весе участниктне тешкставсть сертификатсо, изницятненень максовсть дипломт ды мельстуиця казнеть. Сынст анокстамосо лездасть «Композит» ООО-сь ды Эрзянь-мокшонь раськень общественной вейсэндявксось.
Вастовоманть шкасто Саранск ошонь 80 № эйдень кужов икелень якицясь, а ней 11-це № школань тонавтницясь Леонтьев Кирилл кенярдовтынзе весень баянсо седямосо. Сон сединзе Изнямонтень алтазь «Сэнь пацине» ды «Катюша» моротнень, конатнень морызь 80-це кужонь тейтерькатне.

Теде икеле чистэнть минек редакциянь журналисттнэ якасть Отяжеле велень средней школав, косо казизь «Никто не забыт! Ничто не забыто!», «Кияк апак стувто! Мезеяк апак стувто!» республиканской творческой интернет-пелькстамонь изницятнень: 8-це классо тонавтницянть Татьяна Составкинань ды 10-це классо тонавтницянть Виктория Кудашкинань, конатне кучокшность сехте паро видеороликть эрзянь кельсэ ды саизь 2-це ды 3-це таркатнень.

Истя жо 8-це классо тонавтницянть София Мамаевань, конась ловнось сехте парсте стих эрзянь кельсэ ды сайсь 3-це тарка.
София ды Виктория те чистэнть туекшнесть лия пелькстамос, секскак сынст казнетне максозельть тонавтыцяст Людмила Анатольевна Федотованень ды Любовь Михайловна Русяеванень.

Отяжелень райононь прявтось Константин Николаев те шкане максынзе минек казнетнень – I-це степенень дипломонть, ламбамопельтнень ды книганть – Ламбаське велень школасо тонавтницянтень Надежда Аитованень, кона, кода уш тешкставсь икеле, сайсь 1-це тарка эрзянь кельсэ сехте парсте стихень ловноманть кисэ ды эштё казезель администрациянть пельде сюкпрянь конёвсо шкинемасо покш изнявкстнэнь кисэ.

Теке марто специальной казнесэ – «Эрзянь правда» газетанть лангс сёрмадстомасо – казевсть минек пелькстамонь участниктне Римма Жегалина, Раиса Щанкина, Надежда Баляйкина, Ольга Лесина ды Вера Каяцкая.

«Эрзянь правда» газетань прявт редакторось Марина Девятова покш сюкпря ёвтась весенень, кить явсть мель минек пелькстамонтень. Ды яволявтсь маласо шкастонть лия пелькстамонь ютавтомадо. Ванодо минек социальной сеттнень мельга, косо весемеде карми ёвтазь седе домкасто.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».