Вторник, марта 19, 2024
Важное

 

Ине Отечественной войнась токизе масторлангонь малав эрьва семиянть, сельведь ды покш седейризкс марто совась эрьва кудос, ниле иень перть покш майсемат кирдсть фронтсо ятонть каршо тюрицятне, а седе шожда уцяска прась ськамост ламо эйкакш марто кадовозь аватненень, вачо пекень кирдицятненень, чинек-венек важодицятненень.



Нама, Ине Изнямонь 75 иетненень икелепелев ульнесь покш анокстамо, ансяк эрямозонок апак учонь полавтомат совавтсь коронавирусонь апаро ормась. Сонзэ лангс апак вано, те кенярксчинть кияк кедьстэнек а нельгсы. Нать, а стяко пингеде-пингес а стувтовикс те датантень анокстамось ютавтовсь ков седе эрязасто ды парсте.

Кочкуровань райононь Семилей велесэ эрицятне Ине Изнямонь чинть вастызь покштояк покш мельспаросо. Монументэнь те композициянть лангс ванозь, койсэнек, сынст коряс кенярксчисэ аштить республикасонок эриця ды течи те снимканть неиця весе ловныцянок. Виде, истямо ёроков тев, конань анокстызе содавикс скульпторось Николай Филатов, аволь ансяк минек республикасо, масторсонокак вейкине.

Вете иеде икеле ине тевень арсемась ды сонзэ эрямос совавтомась сась Кочкуровань райононь «Норов» Производственной фирмань компаниянь группатнень прявтонтень, МР-нь Госсобраниянь депутатонтень Александр Ильич Поздняковнень, зярдо сонзэ бажамонзо, ярмаконь лезксэнзэ вельде Семилейсэ стявтозельть культурань ламо од объектт, конатнень ютксо Социальной центрась, ФОК-сь, эйдень кужось, церьковась.

Ды вана ней, Ине Изнямонь 75 иетнень тешкстамонь чинтень анок те велесэнть икелень эрицятнень, весе шкатнестэ алкуксонь патриоттнэнь, Ине Отечественной войнань участниктнень лемест марто вете метрань кувалмосо ледстнемань комплексэсь.

Гранитэнь плитатнесэ ветесядто ламо лемть. Тосо сёрмадозь аволь ансяк Ине Отечественной войнань геройтнень лемест, истя жо муевсь тарка Чечнясо маштовозь Сергей Пивцайкиннэнь. Башка сёрмадозь сетнень лемест, кить войнадо мейле велявтсть тиринь велев ды лездасть вельмевтемс тиринь велень хозяйстванть. Тозо жо сёрмадозь кувака пингень (100 иень) эрицянть Анна Беззубовань лемесь.
Неть сёрмадовкстнэнь кавто ёндо ванстыть историянь башка эпохань фигурат: Александр Невскоень ратникень полконть эйстэ саезь Российской Армиянь солдатонть видьс. Сон алтави Отечествань весе ванстыцятненень. Композициянть мазылгавтыть Георгиевской парсеесь ды Георгиевской крёстось. Сехте тёкшсо – баягинесь, конань кавто ёндо мазылгавтыть нармунть.

А.И.Поздняковонь валонзо коряс, минек покштятнень, тетятнень ине подвигест астувтомась – те сехте покш сюпавчи. Миненек эряви ванстомс историянть, се тарканть, косо минь чачинек-касынек, содамс, кить ульнесть малавиксэнек, кодамо покш тешкс сынь кадсть эсест мельга. Невтемакс, Александр Ильичень покштязо, Игнат Матвеевич Поздняков, ульнесь кавто войнатнесэ: Гражданскойсэ ды Ине Отечественнойсэ. Сон казезь Якстере Тештень ды Отечественной войнань ордентнэсэ.

Монументэнть икеле свал палыця тол, сон прок эрьвань седейс канды лембе минек тетянок, покштянок пельде, кить маштовсть течинь сэтьме эрямонок ды маней менеленек кисэ.

Кемеви, курок сы се шкась, зярдо зыянов ормадонть апак пеле те велень эрицятне вейсэ инжетнень марто сыть те монументэнть панжомо, ине тевень топавтыцятненень карксамос сюконямо.

фототнесэ: КОЧКУРКИН М.Г.
ТЯТЮШКИН Б.Е.
БЕЗЗУБОВА А.А.
КИПАЙКИН А.Ф.
ПОЗДНЯКОВ И.М.
ГОРДЕЕВ А.Е.
ЖИДКИН И.А.
СОЛДАТКИН Н.А.

Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».