«Семиясь – те сехте питнеесь, мезе ули ломаненть эрямосо» – неть ды лия лембе валтнэ гайгсть Саранскоень электромеханической колледжень актовой залонь сцена лангсо, косо декабрянь 12-це чистэ пурнавкшность студенттнэ, преподавательтне, журналисттнэ «Мы в России все живём» мельстуиця концертэнь ваномо. Тесэ тешкстызь зярыя интернациональной семиятнень, конат эсь ёрокчист невтизь аволь ансяк морамосо, эрьва кодамо теевксэнь анокстамосояк.
Концертэсь ды выставкась кармасть меельце мероприятиякс «Клуб «В семье единой» проектэнть пельиень перть тевс нолдамонь шкасто. Сон топавтозь Президентэнь фондонь Культурной инициативатнень грантонь конкурсонть лезксэнзэ вельде. Те проектэсь алтазь Семиянь иентень. Сонзэ ушодыцянзо – «Литова» эрзянь авань вейсэндявксось, конань прявтсо ашти Раиса Щанкина, ды Саранскоень П. С. Кириллов лемсэ библиотекась. Проектэнть прявт тевекс ульнесь невтемс, кода ломантне неень шкасто эрить интернациональной семиятнесэ, кодат сынст ютксо ёжомарямотне, кода тосо марить эсь пряст эйкакштне ды ванстовить раськень койтне. Теде башка, проектэнть вельде семиятне теевсть содавиксэкс эсь ютковаст, неизь, кинь кодамо ёрокчизэ. Проектэнть участникекс кармасть Саранскоень кото интернациональной семият, конатнень марто мольсь важодемась пельиень перть. Те шкастонть мартост ульнесть ютавтозь творческой колмо вастовомат: «Многоцветие татарской культуры», «Болью и счастьем пронизанная жизнь», «Две родины – одна семья». Ютавтозельть вейксэ мастер-класст, истят, кода «Поющее дерево», «Песня гончарного круга», «Славянский сувенир», «Национальная кукла – оберег и забава», «Поэзия мордовского костюма» ды седе тов. Весе теевкстнэ невтезельть «Радуга талантов» выставкасонть.
Концертэнть молемстэ невтезельть семиятнень ланга кото видеороликть, косо ёвтневсь мирдетнень ды нитнень раськетнеде ды сынст вастовомань историяст. Тесэ ульнесть Шехмаметьевтнень (рузонь ды татаронь семиясь), Листраткинтнэнь (рузонь ды мокшонь), Романовскийтнень (евреень ды эрзянь), Кенчадзень (грузинэнь ды эрзянь), Малаевтнень (эрзянь ды мокшонь) ды Чахоянтнэнь (армянонь ды эрзянь) кудораськетне.
Семиятнень туртов казнекс гайгсть Мордовиянь содавикс артисттнэнь ды коллективтнень пельде мазый морот. Неть – МР-нь народной артисткась Анна Атласова ды ламо эрьва кодамо пелькстамонь лауреатось Артём Мамаев, «Ламзурь» ды «Пацят» ансамблятне. Теде башка, мазый моронь морамосо ёрокчист невтизь ушодыця вокалисттнэяк. Неть: Н. П. Огарёв лемсэ МГУ-нь ИНК-нь 2-це курсонь студенткась Валерия Макарова, Лямбирень Эйкакшонь искусствань школань тонавтницясь Диляра Сюбаева ды Саранск ошонь 36-це № школань тонавтницясь Мане Арутюнян.
Проектэнь кураторось, МР-нь культурань заслуженной важодицясь, «Литова» эрзянь авань вейсэндявксонь прявтось Раиса Щанкина тешкстызе: «Течи минь пурнавинек «Клуб «В семье единой» проектэнь участниктненень сюкпрянь ёвтамо. Пельиень перть теезель пек покш важодема. Нама, ульнесть ламо стакачить. Ансяк ней ёвтавлинь паро ёнкстнэде. Икеленсетнень коряс, те ульнесь сехте мельстуиця проект. Зяро вастовомат, зяро кенярксонь кандыця мастер-класст ютавтозельть! Арсетяно весе участниктненень икелепелевгак эрямс эсь юткова покш ялгаксчисэ ды ванстомс семиянь раськень койтнень».
Эрьва семиянь презентациясь, конась невтезель сценань покш экрансонть, пештязель валдо мельде ды вечкемадо. Ды, мерят, эрьвась эйстэдест те чистэнть казизе эсь лембензэ ваныцятненень. Весе семиятненень покш важодемаст кис явшезельть казнеть ды Благодарностть.
Марина Агафонова