Бути тынк кевксттядызь, мезе кевердить понасто, мезе сеске сы тенк превс? Арсян, ламонень Орозбиень понань кемтне. Ды те карми виде. Ансяк, улить ломанть – фелтмейкерт, конатне ревень эли лия ракшань штердезь ды кевердезь понасто теить эрьва мезть: оршамопельть, мазылгавтомат, налкшкеть, варьгат ды натой самоварт.
Те техникантень рузкс мерить «валяние» ды сонзэ ундоксонзо пек умонь. Эштё минек кезэрень покштянок-бабанок кевердильть эстест аволь ансяк кемть, истя жо оршамот, пацят. Бути кемтнес понась эрявсь седе эчке, войлокось теевиль седе шождынекс ды човинекс, ялатеке истямо жо лембинекс.
Фелтмейкертнэде-дизайнертнэде минек масторсо а пек ламо, Мордовиясо жо ве кедьлапань сурсо можна ловомс. Вейкесь эйстэст – Ольга Гостяева, конанть марто минь карминек содавиксэкс мелят «Шумбрат, Мордовия!» фестивалень выставкасо, косо тень пек вечкевсть сонзэ кедьсэ теезь мештес понгавтовиця мазый цецятне. Нама, раминь эстень, цела ие кецякшнынь ды янксинь, мекс эзинь сае кедьстэнзэ интервью. Аволь умок таго вастовинек, ды ней уш мелем топавтовсь.
Кодамо мельспаросо Ольга Владимировна ёвтни эсензэ теевкстнэде, сеске неяви, эрьвантень яви покш мель ды оймепелькске.
– Мон кеветее иеть уш тейнян кевердезь понасто эрьва кодат оршамопельть, мазыльмат, пацят, кирьгава каявкст… Те материалось лия ёнов а молиця, эйстэнзэ моли лембе, сэтьмечи, мастерэнть энергетика, – ёвтни Ольга Гостяева.
Те мазый авась чачсь-кассь Саранскойсэ, ансяк эрямонь киулотне ветизь Санкт-Петербург ошов, косо сон семиянзо марто эрясь комсь иеть. Самай те ошсонть Ольга кармась тонавтнеме дизайнерэкс ды анокстынзе кевердезь понасто колмо коллекциянзо: «Райский сад», косо пек ламо эрьва тюсонь оршамопельть, «Дочки-матери», конанть алтызе аванстэнь ды тейтерьканстэнь, ды вечкевикс Питердэнть – «Dress sky». Кавто иеде икеле Гостяева велявтсь Саранскоев, ансяк тевензэ эзизе кадо, ды эрьва чистэ сонзэ кедтне теить лия ёнов а молиця лембе казнеть. Гостяева, кевердезь понадонть башка, совавты теевкстнэс парсей, вискоза, алкуксонь материят, лияназ. Кодашка мазычи эйсэст, тень эряви неемс.
– Кияк, паряк, арси, понасто теезь оршамопельтне ладить кандтнемс ансяк тельня. Те а истя. Монь ули кизэнь коллекциямгак, тозонь совасть платият, шарфикть, сарафант, сумкинеть, шляпкат. Неть оршамопельтнесэ а карми пси, сынь теезь човинекс ды шождакс, теке менельсэ пельнетне. Кемевттядызь, ваксканк ютыцятне а кадтадызь вановттомо, – мизолдозь ёвтни Ольга Владимировна.
Косто тейтерь-авась саи мельть-арсемат? Корты, пертьпельксэсь невти тензэ. Васняяк мелезэнзэ чачи арсевкс, мейле ушоды топавтомонзо. Кевердезь понатнень мастерэсь эли арты сонсь, эли рамси анок материал итальянской ды немецкой производительтнень кедьстэ. Сон зярдояк а озы важодеме берянь мель-ёжо марто, кеми, эрьва арсемась, конась коштсо, сови кедьсэ теевкстнэнь оймес. Секскак эрьва кодавксонть-ставксонть, эрьва пидевксэнть-паневксэнть эряви теемс ансяк кенярдозь, паро арсема марто ды бажамс истя теемс весе эрямонть перть. Ольга Владимировна эсь тевентень тонавтызе тейтерензэяк. Сон тейни а покш цецинеть, налкшкеть, лезды аванстэнь анокстамс выставкатнес ды невтнемс товаронть. Гостяева тенень пек кенярды, эдь од ломантне неень шкане а пек бажить кедьчелькев тевтнес, седе пек сынст кенярдовты Интернетэсь.
Ольга Гостяевань теевксэнзэ кавто вейкеть зярдояк а эрсить, эрьванть аноксты од вановтсо ды свал лисить од произведеният. Секскак лембе нармушкатне, понань кемнетне, цецятне учить свал эсест азорост. Эдь, невтемакс, берянде ванстыця понань кемнетне, бути потмозост тошкат эсеть мелеть-арсемат, вансттадызь зыянтнэде, а бути каят эйзэст трёшникке, сестэ учок сюпав эрямо. Неть сувениртнэнь понгавтнить кенкш верев эли автомобильс. А кода цитнить од иень кузнэ лангсо понань баягине марто гирляндатне, кода мазылгавтсызь платиянть мештензэ ожо, сэняжа, якстере цецятне! Мезе ансяк а теи Гостяева, натой кузнэс налкшкетькак. Валонзо коряс, рамицятне сехте пек вечкить кирьгас шарфикть, пряс пацят, варьгинеть. Сынст мельга якамс а стака. Ансяк а эряви муськемс понанть пси ведьсэ, саеде лембе ведне, ёрвалинк ды лепштинк кедькуншкасо, илинк мерька. Покш оршамопельтнень кандынк химчисткав. Видестэ мельгаст яказь, неть оршамопельтне, кудонь ды рунгонь мазылгавтомапельтне кармить служамо тенк ламо иеть.
Поздоровт Од иеденть икеле:
– 2025 иестэнть арсян весенень шумбрачи, парочи, сэтьме менель, ванстомс вейкень-вейкень мелявкстнэде, каземс седе ламо мизолкст, лембе валт ды лембе казнеть.
Понасто кевердить кавто техникасо: начкосто ды коськестэ. Васенценть лувсо саить пона ды сапонь, понантень совавтыть коцт, суреть, лияназ… Коске лувсонть важодить башка салмукс вельде.
Понась-войлокось эжди, максы лембечи ды натой леци сэредькстнэнь. Сонсь важодемаськак рунгонтень ды ойментень канды паро: суртнэнень ды кедькоморотненень тееви массаж ды те лезды ливчакавтомс весе прянть.
Марина Девятова