Неть читнестэ А.С. Пушкин лемсэ Раськень библиотекасо ютась лембе вастовома, конась алтавсь Эрзянь келень чинтень. Мероприятиянть ютавтыцязо – Эрзянь раськень койтнень-кирдатнень, келень ванстомань ды кастомань-кепетемань фондось.
Кода содатано, РФ-нь Президентэнть Владимир Путинэнь Указонзо коряс, 2026 иесь яволявтозь Россиянь раськетнень вейсэндявомань иекс, секскак мероприятиясь кеместэ сюлмавозель тень ды Степан Эрьзянь чачома чистэнзэ 150 иетнень топодеманть марто.
Лембе валт пурнавозтненень евтась Эрзянь раськень койтнень-кирдатнень, келень ванстомань ды кастомань-кепетемань фондонь прявтось Татьяна Ларина. Сон тешкстась, тиринь келесь – те минек виень лисьмапря, раськень каштанчи ды сюпавчи. Келенть эряви вечкемс ды ванстомс! Истя жо Татьяна Ивановна кортась, эрзятненень эсест мельга эряви кадомс раськень поладыцят, штобу келесь гайгевель седе ламо пингеть.
Эрьва ие, коень коряс, те чистэнть кирвазтеви раськень штатолось. Тедеде сонзэ кирвазтизе СВО-нь ветеранось, эрзянь церась Юрий Полобичев. Специальной военной операциянь таркатнесэ улемстэ сонзэ позывноезэль «Эрзя». Церась те лементь саизе аволь стяко, вишка шкасто саезь сон пек вечксы тиринь келензэ ды раськензэ. Юрий Николаевич евтызе мелявксонзо – неень шкань од ломантне а явить покш мель тиринь келентень. Сонзэ жо бажамозо, штобу эйкакштне кортавольть эрзякс, содавольть эсь ундоксост, эдь весе те кази ломаненть туртов вийть ды каштанчи.
Тешкстасынек, Эрзянь келень чись тешкстави апрелень 16-це чистэ – эрзянь профессоронть ды лингвистэнть Анатолий Павлович Рябовонь чачома чистэнзэ. Тень коряс А.П. Рябов лемсэ лауреатонь премиясь тедеде максозель Анатолий Барговнень. Эряви евтамс, эрьва шканть эсензэ ломанензэ, конат весе виест ды содамочист максыть эсь раськенть ванстомантень. Истят содавикс ломантнестэ вейкесь – Россиянь художествань академиянь член-корреспондентэсь ды Мордовия Республикань народной художникесь Анатолий Николаевич Баргов. Эсензэ артовкстнэсэ сон вадрясто панжи раськень теманть, шны эрзятнень эрямо лувост, сынст культураст, невти тиринь модантень весе вечкеманзо.
Анатолий Николаевич тешкстась, сон ашти покш каштанчисэ, мекс тонавтызе тейтерензэ эрзякс кортамо, эзизе емавто покштятнень-бабатнень пельде таштазь сюпавчинть.
Истя жо шумбракстнемань вал марто инжетненень пшкадсь Мордовия Республикань Культурань, раськень политикань ды архивень тевень министерствань консультантось Анна Калинкина. Сон пачтясь, кодамо покш важодема топавтови тиринь республикасо эрзянь раськенть ды культуранть ванстомга.
Кода уш тешкстазель седе вере, те иесь эрзятнень туртов лия енов а молиця, эдь минь тешкстатано ине скульпторонть Степан Эрьзянь чачома чистэнзэ 150 иетнень. Сокицянь-видицянь кудораськесэ чачозь-касозь, сон дивавтызе весе масторонть эсензэ ерокчисэнзэ.
Седе тов сценанть лангсто гайгсть тиринь кельсэ морот. Инжетнень туртов эрзянь кельсэ гимнанть морызе «Ламзурь» фольклорной ансамблясь. Ине скульпторонть лемензэ ледстнемга стихть ловность эрзянь кельсэ сермадыцятне Геннадий Гребенцов, Татьяна Мокшанова, Людмила Рябова, Марина Слугина ды Саранскоень 5 ды 8 №№ школатнесэ тонавтницятне.
Алена Артемьева