Январень 31-це чистэ Республикань Культурань дворецсэнть ютавтовсь «Мордовия! Тобою я живу» кенярксчинь мероприятия, конась алтазель Мордовской автономиянь теевемань чистэ 95 иетнень топодемантень.
Те кенярксчинтень РДК-со пурназель «Мордовия – 95! Территория развития» интерактивной выставкась. Васенце этажонь фойесэнть невтевсть Мордовия Республикань Государственной архивень фондтнэстэ лия ёнов а молиця документтнэнь выставкась, 1941–1945 иетнень войнань ды трудонь подвигень мемориальной музеень ды И. Д. Воронин лемсэ республикань краеведениянь музеень фондтнэстэ Ине Отечественной войнань шкань раритетной экспонаттнэнь ды специальной военной операциянь, СВО-нь участниктнень портреттнэнь выставкатне. Омбоце этажсонть ульнесь оршамопелень ды мазылгавтоматнень этноколлекциятнень выставкась.
Кенярксчинь мероприятиясь ушодовсь театрализованной спектаклястонть, конасонть эсь ёрокчист невтизь культурань ды искусствань деятельтне, Мордовиянь государственной филармониянь шкинемань прявт коллективтне ды Мордовиянь государственной театратнень актёртнэ. Прологсонть невтезель Мордовской автономиянь теевемань историясь, эрзянь-мокшонь раськень культурась ды неень шкань тевтне. Спектаклянь участникекс истя жо ульнесть СВО-нь ветерантнэ.
Мордовиянь эрицятненень поздоровонь ёвтамсто, Федерациянь Советэнь Председателесь Валентина Матвиенко мерсь: «Тынк модась – тесэ эриця весе раськетнень кезэрень койтнень-кирдатнень, культурань ды алкуксонь ялгаксчинь марто лия ёнов а молиця ёнкс. Мордовиясь ды Россиясь вейсэ уш тёжадо ламо иеть. Те невти: минек масторось эсь историянь васенце иетнестэ саезь ульнесь ды кадови ламо раськень, ламо конфессиянь государствакс. Тень эйсэ минек ине, а изнявиця виесь. Минек раськетнень койтне-кирдатне, культурась, кемемась эрить-аштить сэтьмечисэ, чарькодемасо, вейкень-вейкень сюпалгавтозь».
Федерациянь Советэнь спикерэсь тешкстызе, весе шкатнестэ Мордовиянь эрицятне ульнесть Россиянь государственностень ванстомасо ды виевгавтомасо. Сонзэ эрицятнень ютксто ламот пингеде-пингес сёрмадызь эсь лемест Отечествань историянтень. Сынст ютксо – Мордовиянь иневанькс ванстыцясь, содавикс адмиралось Фёдор Ушаков, ине скульпторось Степан Эрьзя, Советской Союзонь Героесь, военной лётчикесь Михаил Девятаев.
«Мордовиясь содавикс аволь ансяк эсь сюпав историясонть, истя жо течинь чинь изнявкстнэсэ. Те гособоронзаказонь топавтомась, инновационной производствань ды интеллектуальной парочинь виевгавтомась, инвестициянь вадря климатонь кемекстамось», – тешкстызе ФС-нь Председателесь.
Сонзэ валонзо коряс, каштанчинь прявт ёнксось – велень хозяйствасо региононть изнявкстнэ. «Сделано в Мордовии» брендэсь – те вадрячинь гарантия.
Валентина Матвиенко ледстизе, тедеде тешкстави историянь покш датась – Ине Отечественной войнасо Изнямонь 80 иетне. Войнань иетнестэ республикань эрицятне – мокшотне, эрзятне, рузтнэ, татартнэ – Советской Союзонь лия раськетнень представительтнень марто вейсэ лавтовдо лавтовс бороцясть фашистэнь оккупанттнэнь каршо. Течи сынст тевень поладыцятне – специальной военной операциянь участниктне – ванстыть Россиянь суверенитетэнть ды сэтьмечинть.
«Республикань тёжат эрицятне лездыть боецтнэнень: пачтить гуманитарной грузт, анокстыть кекшемань алтымат ды эрявикс лия снаряжения. Истямо вейсэндявомась – минек Изнямонь прявт юр, конась, кода 80 иетнеде икелеяк, карми минек, – мерсь ФС-нь Председателесь. – Кеман, тынк вейсэндявоманть ды патриотизманть марто Мордовия Республиканть ды весе Россиянть учить од изнявкст», – тешкстызе сон.
Валентина Матвиенко явшесь Федерациянь Советэнь наградат. «За заслуги в развитии парламентаризма» ФС-нь Почётонь тешкссэ казезь Мордовиянь Прявтось Артём Здунов, МР-нь Государственной Собраниянь Законодательствань ды законностень коряс комитетэнь председателесь Валерий Алехин. Парламентэнь верце палатань наградат истя жо максозь региононь Государственной Собраниянь депутатонтень Сергей Агеевнень, Рузаевкань муниципальной райононь Депутатонь советэнь председателентень Вячеслав Марчковнень, Саранск ошонь округонь Депутатонь советэнь депутатонтень, Саранскоень 25-це № лицеень прявтонтень Ольга Падерованень.
Поздоровт истя жо ёвтась Равчирень федеральной округсо Российской Федерациянь Президентэнь полномочной представителесь Игорь Комаров: «Эрзятне-мокшотне – инжень вечкиця, чевте седей ды ёроков ломанть. Тынк регионось – раськетнень ды конфессиятнень ютксо чарькодемань невтема! Мордовиянть ули весемесь неень ды сы шкань поколениятнень туртов вадря условиятнень теемга».
Российской Федерациянь Президентэнь Указонть коряс агропромышленной комплексэнь виевгавтомантень покш путовксонть кисэ Ялгаксчинь орденсэ казезь «Талина» компаниятнень группань президентэсь Виктор Бирюков.
Семиянь институтонь кемекстамосо ды эйкакштнень трямосо-кастомасо изнявкстнэнь кисэ «Родительская слава» орденэсь максозь Чаунзань районсто Эдуард ды Светлана Ховатовтненень.
Ярсамопелень промышленностень ёнкссо изнявкстнэнь кисэ «За заслуги перед Отечеством» II степенень орденэнь медальсэ казезь «Ичалковский» Сырань теемань комбинатонь прявтось Николай Киреев.
Российской Федерациясо местной самоуправлениянь виевгавтомасо изнявкстнэнь кисэ «Заслуженный работник местного самоуправления Российской Федерации» почётонь лемесь максозь Ташто Шайговань райононь прявтонтень Геннадий Мухиннэнь.
Российской Федерациянь Президентэнь Почётной грамотасо казезь Мордовия Республикань государственной Рузонь драматической театрань артистэсь Сергей Адушкин.
Российской Федерациянь Федеральной Собраниянь Государственной Думасо «Единая Россия» Весероссиянь политической партиянь фракциянь руководителесь Владимир Васильев ёвтась поздоровт республикань эрицятненень ды тешкстызе региононь прявтонь команданть важодеманзо. «Монень прась уцяска роботамс Артём Алексеевичень ды сонзэ коллегатнень марто, конат течи важодить Мордовиясо. Республикань руководителень таркантень сонзэ аравтомась, арсян, сюлмавозь Татарстансо ды Дагестансо важодеманзо марто – минь бажинек тосо роботамс оймень коряс, алкуксокс, видестэ, ломантне тень несть. Течи масторсонть пурнави од элита. Кода партиянь представитель тешкстаса, 2024 иестэ «Единой Россиясь» кочкамотнес эсь спискатнес совавтсь СВО-нь 380 участникть, сынст ютксто 308-тне кармасть эрьва кодамо уровенень депутатокс. Те минек сырнень фонд. Минь изнятано! Изнявкст Мордовиянтень!» – мерсь сон.
Российской Федерациянь Федеральной Собраниянь Государственной Думасо «Единой Россиянь» фракциянь руководителень благодарностьсэ тешкстазь «Агрофирма «Октябрьская» АО-нь Наблюдательной советэнь председателесь Иван Андин, «Оптикэнерго» компаниятнень группань прявттнэнь советэнь председателесь Эвир Боксимер, Мордовия Республикань Государственной Собраниянь Председателень полавтыцясь Наталья Долматова.
Россиянь Раськетнень ассамблеянь Благодарность яволявтозь Эрзянь ды мокшонь раськень регионъютконь общественной вейсэндявксонь председателентень Юрий Мишаниннэнь.
Лембе поздоровт кенярксчинть кувалма ёвтась Мордовиянь Прявтось Артём Здунов: «Сюкпря, те чинть ютавттано весе вейсэ! Сон минек туртов пек тешксэв ды эрявикс! Миненек свал эряви мезень-бути кувалма аштемс каштанчисэ, ломантнень истямо обуцяст: миненек эряви каштангалемс эсь тетятнень-аватнень, эйкакштнень, лелятнень-ялакстнэнь, патятнень-сазортнэнь кувалма, СВО-нь ветерантнэнь ды участниктнень кувалма, эсь раськенть, экономиканть, эсь проекттнэнь кувалма. Миненек мереви аштемс тень кувалма каштанчисэ течияк, Мордовской автономиянь 95 иетнень топодемстэ! Минек раськенть, конась ашти ине рузонь раськень пельксэкс, покш вандынь чизэ. Эряви седе тов ванстомс минек кельтнень, культуранть, койтнень-кирдатнень, штобу сы шкань поколениятне аштевельть каштанчисэ минек кувалма».
Мордовия Республикань Прявтонь Указонть коряс Мордовия Республикань Славань II степенень орденсэ казезь скульпторось Николай Филатов.
Мордовия Республикань Славань III степенень орденсэ казезь Российской Федерациянь заслуженной юристэсь, 1990–2000 иетнестэ Мордовия Республикань прокурорось Павел Сенькин.
Республиканть икеле покш изнявкстнэнь кисэ «Почётный гражданин Республики Мордовия» лемесь максозь Российской Федерациянь искусствань заслуженной деятелентень, Мордовия Республикань Государственной гимнань музыкань авторонтень Нина Кошелеванень. Сонзэ лемс гайгсь Мордовия Республикань Государственной гимнась.
«Народный врач Республики Мордовия» почётонь лемесь максозь Мордовия Республикань центральной клинической больницянь врачонтень акушерэнтень-гинекологонтень Фаина Магдееванень.
«Народный учитель Республики Мордовия» лемесь максозь Лямбирень райононь Покш Елховкань средней общеобразовательной школань рузонь келень ды литературань тонавтыцянтень Тамара Разумованень.
Поздоровонь валт истя жо ёвтазельть Пензань областень губернаторонть Олег Мельниченконь ды Российской Федерациянь Омбо мастортнэнь тевтнень министерствань Кулянь ды печатень департаментэнь прявтонть Мария Захаровань пельде.
Кенярксчинь мероприятиятнень лувсо истя жо ульнесть зярыя вастовомат важодемань кевкстематнень коряс.
Фототне МР-нь Прявтонь Пресс-службанть.