Вторник, марта 19, 2024
Важное


АВОЛЬ УМОК КОЧКУРБУЕНЬ ВИРЬ АЛО ТАВЛАНЬ В.РОМАШКИН ЛЕМСЭ ЭТНО-КУДОСОНТЬ ЮТАСЬ ЛЕМБЕ ВАСТОВОМА.
ЭТНО-КУДОНЬ ПРЯВТОСЬ, ЧУВТОСТО КЕРСИЦЯСЬ П.В.РЯБОВ УМОК ТЕРДСЬ «ВАЛ» ЭРЗЯНЬ СЁРМАДЫЦЯНЬ ВЕЙСЭНДЯВКСОНТЬ. НАМА, АВОЛЬ ВЕСЕ ОД ЛОМАНТНЕ САВСТЬ. ТАВЛАНЬ ЭРИЦЯТНЕНЬ ТУРТОВ ЮТАСЬ ЛИТЕРАТУРАНЬ ДЫ МУЗЫКАНЬ ЧОКШНЕ. СЕДЕЙШКАВАНЬ ВАСТОВОМАТ ТЕСЭ ЭРСИТЬ КИЗНАЯК, ТЕЛЬНЯЯК.

Чокшненть ушодызе Александр Данильчев. Сон ловнось Р.Б.Щанкинань книгасто мизолкст, весе сынь саезь эрямосто, авторонтень ёвтнинзе Пенза ёнксонь эрзясь А.Туркичёв. Сельведь марто пейдинек! Кодат эрзятне ракавтыцят, вейкень-вейкень лангсо кежтеме згилицят. Пейдема лувонть поладызе Татьяна Мокшанова. Сон ловнось «Калонь фамилия» од мизолксонзо ды валморот. Неень шкань эрямодо пшти валморот алтась ловныцятненень Марина Слугина. Теде башка, зярыя стихть сон казсь Тавлань чувтосто керсицятненень, седе виде ули меремс, сынст теевкстнэнень.

Теде мейле вал сайнесь Николай Карпов. Сонзэ свал мельспаро кунсоломс. Машты ваныцятнень кецявтомо, талновтомо, ёжонь паролгавтомо. Николай ловнось валморот, седясь гитарасо, морась эсензэ ды А.Араповонь, А.Подгорновань ды лиятнень морост. Ловнызе Л.Седойкинэнь «Ташто кудо» ёвтнеманзо.

Те вастовомантень сакшнось школасо тонавтницясь Настя Адушкина. Сонгак анокстась. Ловнось Я.Кулдуркаевень «Эрьмезь» поэмасто саевкс. Истя жо тесэ ульнесь Пакся Тавлань «Толава» фольклорной ансамблясь. Сыньгак морасть тенек морот.

Аламо шкань ютазь Этно-кудов састь шабратнеяк. Вансызь – вальмасонть тол ды кудонть икеле машинат, капшазевсть варштамо, кить састь инжекс. Сынь мельспаросо кунсолость ды ледстнесть, кодамо ульнесь Тавлась, зярдо тесэ эрясть ламо ломанть.
Эрзянь келень тонавтыцясь Н.Д.Баляйкина ёвтась инжетнень туртов ламо сюкпрянь валт. Сон пачтясь, велесэнть пек ризныть школань пекстамонть кувалма. Кодамо те веле, бути тосо а кармить гайгеме эйкакшонь вайгельть? Тавласо а важоди Культурань кудоськак… Эрямось састыне лепами. Ды истят тевтне минек ламо велетнева.
В.Ромашкин лемсэ Этно-кудонтень поладыть сакшномо эрьва ёндонь инжеть. Кадык истя ули седе товгак. Тесэ лембестэ вастыть эрьванть, ёвтнить минек койтнеде-кирдатнеде, эрямодонок, домкасто пачтить «Торама» ансамблянь пурныцядонть В.Ромашкиндэ, конань лементь кандтни те кудось.

Татьяна МАТОРКИНА
фототне авторонть
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».