Вторник, марта 19, 2024
Важное

Татарстанонь Эрзянь Кармалка велесэнть эрить важодемань вечкиця ломанть, умок сынь стявтнесть кеме кудот, кастыть кши, ванныть ракшат. А сехте стака тевтнень топавтыть вейсэ. А стяко кортави эрзянь валмеревкссэнть: «Эштё эйдекс эрзянть вейке пильгезэ лавсьсэ, омбоцесь – паксясо соки». 

Кармалкань эрицятне маштыть тонавтомо од ломантнень кезэрень койтнень-кирдатнень ванстомань тевентень. Эрзянь Кармалка велень эрьва семиясь лиятнень ёнов а молиця сеньсэ: сынь раськень оршамопелест аволь горобиясо ванстыть, кандтнить истяконь чистэяк, кудост-чист мазылгавтыть эрьва кодамо мазый тюссо, анокстыть коень ярсамопельть, кортыть тиринь эрзянь кельсэст.

Ломантне важодить тиринь Кармалкасо, конась ловови «Сатурн-Урал» аграрной предприятиянь омбоце отделениякс, Сарабикуловасо – васенце отделениясо, истя жо сынь важодить бюджетэнь сферасонть, нефтяной отраслятнесэ.

Велень сехте сыре ломантнестэ вейкесь – Петрякова Екатерина Максимовна, неень шкас сон сиземань апак сода пии-палы веленть культурной ды духовной эрямосонть. Сонензэ топодсть 82 иеть, 60 иес важодсь «Победа» колхозсо скалонь потявтыцякс, свал икельцетнень ютксоль. Екатерина Максимовнань ниле эйкакшонзо: цёразо, Николай Николаевич, армиядо мейле кадовсь тиринь велес, важодсь колхозсо сварщикекс ды нейгак топавты сварщикень тевенть «Сатурн-Урал» ООО-сонть, Екатерина Максимовнань тейтерезэ тусь аванзо киява – потявты скалт.

Эрзянь Кармалка велень эрицятне а неить эсь эрямост «Балтай» кенярксчивтементь. Иестэ иес, «Троицянь» кенярксчиде мейле сыця недлячистэнть, покшнек-эйкакшнек якасть ды нейгак якить вирень кужов овтонь наряжамонь коень ветямо ды велень ульцятнева сонзэ ютавтомо, кода зярдо-бути яксесть сынст кезэрень покштяст-сырькаест.

Велесь содавикс аволь ансяк «Балтайсэ», эштё кезэрень моротнень вечкемасо. «Пизёлнэ» ансамблясь 2003 иестэ пурназель велень культурань кудосо, конань прявтокс вана уш кемзисемге иень перть важоди Кудашова Валентина Георгиевна, велень культурань кудонь художественной руководителекс комськавтово иень перть важоди Кудашова Елена Семёновна.

«Пизёлнэ» ансамблянтень совицятнень лезксэст вельде ДК-сонть теезель «Эрзянь кудо» раськень музеесь, козонь пурназь эрзянь культурань предметтнэ, кезэрень сокицятнень-видицятнень курмост-кармост, кедьчелькев ломантнень шкинемань теевкстнэ. Неень шкасто музейсэнть лововить эрзянь культурань ды бытэнь 230 ламо экспонатт.

Фольклорной ансамблясь кандтни народной почетонь лементь.
Ансамблянть юрсо теезь «Лисьмаприне» эйкакшонь пурнавксось. Неень шкасто эйзэнзэ совить вете эйкакшт, конатне ёвтнить эрзянь кельсэ стихть – тиринь ёнкстонть, тиринь кельденть, пертьпелькстэнть, ды морыть эрзянь морот. Ёрокчист свал невтить райононь кенярксчитнесэ ды фестивальтнесэ.

Эрзянь Кармалкань велень библиотекась топавты важодема эрзянь культуранть ванстоманзо ды виевгавтоманзо коряс. Сон неень шкасто ашти национально-культурной, информационной, просветительской куншкакурокс аволь ансяк сынст велень, истя жо весе Лениногорской райононь эрицятненень.

Кевкстеманть лангс, мезесь кирди течинь чистэ Эрзянь Кармалканть, сонзэ эрицятне максыть каршо валт: «Минек койтне-кирдатне. Покш мельспаросо сындест ёвтнетяно эйкакшонок ды нуцьканок туртов». 2021 иень июнень 1-це чистэ Архангел Михаилэнь православной церькованть панжомазо корты текеде жо. Велень весе эрицятнень, Эрзянь Кармалкань ды чевте седей ломантнень покш путовксост сонзэ стявтомасонть.

Анокстазь «Ватаным Татарстан» газетанть марто вейсэ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».