Эрзянь ды мокшонь национальной драматической театрасо ютась кенярксчи. Сон алтавсь Эрзянь ды мокшонь кельтнень весероссиянь чинтень ды ютась Раськетнень вейсэндявомань иенть лувсо. Кода содатано, РФ-нь Президентэсь яволявтызе 2026 иенть Россиянь раськетнень вейсэндявомань иекс.
Лембе вал марто пурнавозтненень пшкадсь МР-нь Прявтось Артем Здунов:
– Весемесь ушодови тиринь келентень, тетянтень-авантень, тиринь кудонтень, велентень вечкемасто. Те улияк алкуксонь патриотизма. Эрзянь ды мокшонь кельтне – те минек раськень генетикань кодось, лия енов а молиця культурань виев юрось, минек ламо пингень духовной койтне-кирдатне. Россиянь раськетнень вейсэндявомань иенть лувсо миненек эряви Мордовиясо раськетнень вейсэнь эрямось, ютксонок ялгаксчись, семиятне, раськетнень ютксо урьвакстоматне, ламо эйкакшт. Покш тевесь – кельтнень ванстомась ды кастомась-кепетемась, максомс минек эйкакштненень ды нуцькатненень аволь ансяк валт, истя жо оймень се виенть, кона ашти эрзянь-мокшонь кортамосо, моросо, евтамосо ды койтнесэ. Минь тень тейсынек ансяк эсенек примерэнть вельде!
Мордовиясо тень туртов ютавтови покш важодема. Парсте топавтови раськень культурань ды келень ванстомань ды кастомань государственной программась, эрзянь ды мокшонь кельтнесэ нолдавить тонавтомань ды художественной литература, максови лезкс од автортнэнень.
Ютавтовить ламо тевть, конат аравтозь раськетнень этнокультурной виевгавтомантень. Те иень июльстэ Саранскойсэ карми «Всемирная сокровищница родных языков: оберегать и лелеять» Раськеютконь покш конференциясь.
Мордовиянь Прявтось тешкстызе, тиринь кельтнень ванстомасо покш таликазо школанть. Кельтнень тонавтомантень ней парсте совавтовить мультимедийной технологиятне – электронной валкстнэ, интерактивной пособиятне, искусственной интеллектэнь инструменттнэ. Сынь теить тонавтомань тевенть седе мельстуицякс од ломантнень туртов.
Ютазь иестэ саезь эрзянь ды мокшонь кельтне кармасть улеме «Яндекс Переводчиксэ». Ней Сберэнть марто вейсэ ветяви важодема «GigaChat» искусственной интеллектэнть юрсо отечественной сервисэнть эрзянь ды мокшонь кельтненень тонавтоманть коряс. Истя жо моли эрзянь ды мокшонь кельтнень туртов кортамонь лувонь чарькодемань автоматической системань анокстамось.
– Васняяк, келесь эрязо, сон гайгезэ эрьва семиясо, пачтявозо тетятнень-аватнень пельде эйкакштненень, нуцькатненень. Евтан сюкпря весенень, кить эрьва чистэ важодить те аволь шожда тевсэнть: тонавтыцятненень, ученойтненень-филологтненень, писательтненень, журналисттнэнень, культурань деятельтненень ды кить важодить туризманть ды инфраструктурань тееманть коряс. Те ине ды просветительской важодемась пек питней, – тешкстызе Артем Здунов.
МР-нь Прявтось те кенярксчисэнть казинзе тонавтыцятнень, эйдень кужосо важодицятнень, журналисттнэнь. Сынст ютксо «Мордовия» ГТРК-нь «Сияжар» национальной вещаниянь корреспондентэсь Екатерина Евстигнеева, сонензэ максозь «МР-нь культурань заслуженной роботник» лемесь. МР-нь Прявтонь Благодарностьсэ казевсть Саранскоень 5 № школань эрзянь келень тонавтыцясь Л.Д. Осяева, 90 № эйдень кужонь воспитателесь Е.П. Афанасьева, М.Е. Евсевьев лемсэ МГПУ-нь тиринь келень ды литературань кафедрань доцентэсь С.Н. Маскаева. Этнокультурной сюпавчинть ды морамонь культуранть ванстомань кисэ МР-нь Прявтонь Благодарностьсэ казевсь Орданьбуень Низовка велень «Цековне» народной фольклорной ансамблясь. Сцена лангс лиснесь художественной руководителесь В.В. Тюгашкин. Ансяк мекс-бути аватнень эзизь моравто те покш чистэнть.
Истя жо поздоров марто пшкадсь Эрзянь ды мокшонь раськень регионъютконь общественной вейсэндявксонь прявтось Юрий Мишанин. Сон евтась сюкпря весенень, кить састь Мордовияв.
– Течи минек алкуксонь кенярксчи. Келенек гайгить тесэ, Мордовиясо. Ютавтынек исполкомонь вадря промкс, ков састь регионтнэстэ минек ялганок, кортынек икелепелев мельтнеде-бажамотнеде, сы шкань тевтнеде. Тешкстаса, республикасонть кельтнень ды эрицятнень кевкстематненень явови покш мель региононь прявттнэнь пельде. Зярдо ули истямо вейсэнь тев, республикань Прявтонть ды Мордовиянь весе команданть лезкс, ули кемемаяк: минек кельтне кармить эрямо ды гайгеме! – кортась Юрий Мишанин.
Инжетненень паро вал марто пшкадсть МР-нь Рузонь культурань центрань ветицясь Игорь Лошкарев, «Якташлар» МР-нь татартнэнь раськень-культурань автономиянь прявтось Руслан Мухаев, спецоперациянь ветеранось Юрий Полобичев, Россиянь Раськетнень ассамблеянь минек региононь отделениянь прявтось Елена Ломшина ды Мордовия Республикань Раськетнень кудонь ветицясь Татьяна Ларина.
Кенярксчись прядовсь мазый концертсэ. Сонзэ анокстызь Мордовиянь государственной филармониянь артисттнэ. Сцена лангсо ульнесть МР-нь заслуженной артистэсь Андрей Бочканов ды «Варма» арт-театрась, МР-нь заслуженной артисткась Карина Сергеева, Г.И. Сураев-Королев лемсэ «Келу» фольклорной ансамблясь, «Арсема» эстрадань группась, МР-нь народной артисткась Нина Спиркина, «Разгуляй» казаконь моронь ды киштемань ансамблясь ды лият.
Татьяна Маторкина.
Фототне Егор Горинэнь.