Ютазь читнестэ Кочкурбуень Сурвелень «Орбита» эйкакшонь шумбрачинь витемань лагерьсэнть пекставсь этнокультурань енкс марто «Эряк, тиринь кель!» кизэнь оймсемань сменась. Кодамо сон ульнесь ды зяро ероков ды эряза эйкакшт сон пурнакшнось вейс, евтнетяно материалсонок.
«Эряк, тиринь кель!» этнолагерень сменась тагояк пурнакшнынзе вейс эсь келень ды раськень вечкиця эйкакштнень. Тей сакшность олимпиадасо изницят, научно-практической конференциясо ерокчинь невтицят, тиринь кельсэ морыцят ды сермадыцят. Сынст вейсэндинзе вейкесь – раськень сюпавчинь ванстомась ды кастомась. Эряза, ероков, мазый эйкакштне иеде иес сюпалгавтыть этнолагеренть историянзо. Тедеде регионъютконь культурань сменась пурнась вейс 50 эйкакшт, конат састь Московсто, Татарстансто, Ульяновскойстэ, Пензасто ды минек республикань малав весе районтнэстэ. Чистэ чис тесэ гайгсть эрзянь, мокшонь ды татаронь кельтне. Те коесь, конантень ушодксонть теизе ды конань топавтоманзо саизе эсензэ лангс Мордовия Республикань Образованиянь министерствась, эзь колаво тедедеяк.
Тешкстасынек, те лагерьсэнть эйкакштнень туртов тееви весемесь кода оймсемаст ды шумбрачист ванстомга, теке шкасто содамочист кастомгаяк. Эйкакштне, оймсемадо башка, вастневсть содавикс ломань марто, сыненст инжекс сакшность общественной деятельть, спортсмент, сермадыцят, морыцят, блогерт ды кедьчелькев ломанть. Седе келейстэ сменанть важодемань енкстонть тенек евтнесь «Эряк, тиринь кель!» этнокультурной сменань прявтось, Мордовия Республикань заслуженной тонавтыцясь Марина Николаевна Миронова.
– Мордовия Республикасо уш колмоце ие панжови этнокультурань, тонавтомань ды шумбрачинь «Эряк, тиринь кель!» регионъютконь лагересь. Те сменась пек вадря, тезэнь сакшность истят эйкакшт, конатнень седеест ды оймест пиить-палыть тиринь келест, культураст ды раськест кис. Тешкстаса, покш уцяска важодемс истямо эйкакш марто, конатнень туртов минь теевинек аволь ансяк вадря тонавтыцякс, паро ялгакскак. Ютавтомс те лагерьсэнть шка – Пазонь казне. Кода а евтнемс, тедеде лагерень территориясонть ульнесть полавтомат. Грантонь коряс тевс нолдавсь проект, конань вельде стявтозельть кавто од эрямо таркат. Строительствась эште поладови. Тесэ весемесь кенярдовты седей ды сельметь. Кода свал, эйкакштнень туртов анокстазель мельстуиця программа. Эрьва чи минь ветинек келень интенсивть. Эйкакштне явовильть колмо кужова (эрзянь, мокшонь ды татаронь) ды покш мель марто тонавтнесть кельтнень. Нама, тонавтнемадонть башка, минь ветинек ламо эрьва кодат мероприятият, конатнень лувсо ютавтозельть вастовомат республикань ды сонзэ томбалень содавикс ломань марто. Саемга, сменань меельце читнестэ миненек инжекс сакшнось «Ламзурь» фольклорной ансамблясь, конась кенярдовтымизь раськень мазый моросо ды евтнемасо, теде башка, эйкакштнень туртов невтезельть зярыя эрзянь-мокшонь раськень коень невтемат. Эйкакштненень меревсь невтемс ерокчист неть невтематнесэ. Ламот мельспаросо тейсть те тевенть. Арсян, неть вастовоматне седеяк сюпалгавтызь эйдетнень содамочист ды кемекстасызь келентень ды чачома масторонтень вечкеманть, – тешкстась Марина Николаевна.
Эряви меремс, кавто недлянь перть этнолагерьсэнть мольсь пси важодема. Кода тонавтыцятне, истя жо эйкакштнеяк свал лакасть тевсэ. Евтама, тедеде сменасонть важодсть кавто отрядт – «Варма» ды «Дуслык». Ероков тонавтыцятне – Фазия Фаритовна Боярова ды Вера Александровна Маскаева – теить весементь, штобу те этнолагерень сменась седе кувать кадоволь эйкакштнень мельс. Истя, эйкакштнень туртов ветязельть раськень дискотекат, косо гайгсть эрзянь-мокшонь морот. Дискотекасонть секе-тев марявсть Андрей Бочкановонь, Артем Мамаевень, Бакич Видяень ды музыкань лия мэтратнень морост. Эрьва чокшне эйкакштне мельспаросо оршнилизь раськень оршамопелест ды сыльть шканть вадрясто ютавтомо. Сменань программанть коряс истя жо ветязельть истят кенярксчить, кода «Сабантуй» ды «Акша Келу», конатнесэ эйкакштне невтсть ерокчист. Этнолагересь нолдась тевс истямо вадря кой – вана уш омбоце ие отрядтнэ сермадыть СВО-нь участниктнень туртов сермат. Неть серматне сермадовить кавто кельсэ. Сермась ушодови рузокс, прядови жо се кельсэнть, конась ашти тиринсекс сермадыцянтень.
Ды кода а евтнемс оймень сыремтиця эште вейке койденть – тедеде сменань ушодома чистэ этнолагерень тонавтыцятне ды инжетне весе вейсэ озавтсть чувтонь апокш аллея. Ней этнолагерень пертьпельксэнть мазылгавтыть вишка килейнеть ды туминеть. Арсетяно, те коесь поладови седе товгак.
– А мезть кортамс, этнолагерень сменанть пек сюпав ды келей программазо. Тень кисэ покш сюкпря минек ероков тонавтыцятненень. Сынь иеде иес бажить совавтомс программантень мезеяк од ды седеяк мельстуиця. Арсетяно, самай тень кувалма эйкакштнень арась мелест туемс тестэ кудов. Эрьва ие минек сменась прядови кеме алтамосо – сы иестэ вастовомс одс ды а емавтомс тесэнь кемекстазь ялгаксчинь сюлмотнень. Прядови сменась, кода свал, кавто отрядтнэнь проектэст ванкшномасо. Тедеде эйкакштне явсть мель Рая Орловань «Время Z» сборникстэнзэ саезь сермадовкстнэнь ванкшномантень, – евтни Марина Миронова.
Лембе валт лагерентень ды ялганзо туртов евтась Алина Пискайкина. Сон – Ицялонь райононь Папулева велестэ. Тейтерькась эште тонавтни школасо. Пек вечксы тиринь келензэ ды раськензэ. Этнолагерев путевкась тензэ максовсь эрзянь келень олимпиадасо федеральной этапсо колмоце таркань саеманть кисэ.
– Школасо тиринь келесь ды литературась а максовить. Неть предметтнэнь коряс покш важодема мартон вети авам – Лариса Викторовна Пискайкина. Сон уш ламо иеть важоди школасо. Вети географиянь ды биологиянь уроктнень. Юткошкасто мон вечкан морсеме раськень морот ды кодамо чевте налкшкеть. Те этнолагерьсэнть мон васенцеде. Тесэ явови покш мель тиринь келень ды культурань вечкемантень. Весе – эрзятне-мокшотне-татартнэ – эрятано покш ояксчисэ, – корты эрзянь тейтерькась.
Алена Кудинова сась Мордовияв натой Пензань областень Пазелки велестэ. Тейтересь сась а ськамонзо – Ксюша сазорканзо марто. Сынь кавонест эште школасо тонавтницят. Тейтерькатне морсицянь семиясто. Кадык кудосо кортыть рузкс, школасо тонавтнемстэ тейтерькатне явить покш мель эрзянь келень тонавтнемантень. Истя жо ламо содамочить сынст туртов максы вечкевикс бабаст. Алена меельце шкасто ламоксть ульнесь Пензань областьсэ ды лия регионсо ютавтозь фестивальтнесэ ды пелькстамотнесэ. Тейтересь сюпалгавты морамонь ерокчинзэ.
– Те этнолагерентень мон сынь омбоцеде. Тесэ улемась максы ламо содамочить покштянь-бабань кельденть. Эдь монь ули покш мелем тонадомс ильведькстэме сермадомо ды кортамо неть кавто мазый, гайтев, теке цековонь морот, эрзянь ды мокшонь кельтнесэ, – евтни Алена.
Эряви меремс, «Эряк, тиринь кель!» этнолагерень эрьва сменась эйкакштнень седейс кады мелень витиця сяткине. Сон умок уш теевсь вадря коекс. Минь весе седейсэ арсетяно те коентень иеде иес поладовомс ды эште а весть пурнамс вейс эрьва кодамо раськень ероков од ломанть ды эйкакшт.
Алена Артемьева