Четверг, декабря 08, 2022
Важное

КОЧКУРОВА ЁНКСОНЬ ВИРЬ ТАВЛАСО В. И. РОМАШКИН ЛЕМСЭ «ЭТНО-КУДО» МУЗЕЕСЬ ТЕЧИНЬ ЧИНЕ ПАРСТЕ СОДАВИКС АВОЛЬ АНСЯК МОРДОВИЯСО, ВЕСЕ РОССИЯНТЬ КЕЛЕС ДЫ ОМБО МАСТОРСОЯК. ТЕСЭ СВАЛШКАНЕ ЛАМО ИНЖЕТЬ. ЭДЬ УЛИ МЕЗЕ НЕВТЕМС, МЕЗЕ ВАННОМС.



Ули меленк марямс эрзянь кезэрень фольклоронть ды чопавтемс раськень койтнес-кирдатнес? Эстенк неемс, кода оймень путозь эрзятне вастыть инжетнень? Сестэ илядо таргсе шканть. Моледе. А зярс сыргатано экскурсияв вейсэ.

В. И. Ромашкин лемсэ «Этно-кудо» музеесь панжозель 2006 иень сентябрянь 6-це чистэ, зярдо Владимир Ромашкиннэнь чачома чистэнзэ саезь топодекшнесть 55 иеть. Музеенть панжомадо меленть ёвтызе «Эрьмезь» Тавлань кедьчелькевтнень союз» общественной вейсэндявксонь прявтось Пётр Рябов, кона парсте содылизе Владимир Ромашкинэнь. Меленть шнызь лия общественной вейсэндявкстнэ, муезельть спонсорт, ды Ромашкинэнь кудось аламодо витнезель-петнезель. Музеенть туртов экспонаттнэнь жо пурнасть весе масторонть келес. Пек лездасть велень эрицятнеяк, конатне кандызь ютазь пингень ули-паронть.

– Музеень панжомась кармась мелень явомакс ломанентень, конась весе эрямонзо алтызе тиринь эрзянь раськентень, тейсь пек ламо келенть ды культуранть ванстомга, этнической духовностенть вельмевтемга, – тешкстызе музеень прявтось Пётр Владимирович Рябов.
Ды музеесь, эряви меремс, полады Владимир Ивановичень тевензэ, кармась эсь койсэ раськень культурань курокс ды эрзянь келень ванстомань-виевгавтомань таркакс.

Весемесэнть кезэрень ёжо

Неень шкане музейсэнть пурназь малав ниле тёжат экспонатт. Ды лия ёнов а молиця кедьёнкстнэнь пурнамось поладови нейгак. Ломантне те шкас кандыть икеле шкань ули-паронть, Владимир Ромашкинэнь ялганзо ды содыцянзо максыть музейс сёрматнень, фотографиятнень, аудио- ды видеоматериалтнэнь. Тесэ ламо книгат Мордовиянь содавикс писательтнень, поэттнэнь, научной важодицятнень пельде.
Кода мерсь Пётр Рябов, сехте питней экспонатокс тесэ лововить фольклористэнть сценической оршамозо, ташто фотографиятне, Владимир Ромашкин марто видеоматериалтнэ, «Голоса России» весероссиянь фестивалень значокось, конась ульнесь Смоленск ошсо 1993 иестэ ды косо «Торамась» сайсь васенце тарка, «Панасоник» весенень содавикс видеокамерась ды ламо лия мезе.
Арсицятне-пурныцятне музеенть бажасть теемс лия ёнов а молицякс ды интерактивноекс. Тесэ весементь мереви варчамс, токшемс. Эрьва экспонатонть марто мереви фотографировамс, терявтомс налксемс музыкальной инструментсэ, эсеть лангс оршамс раськень оршамопель, кунсоломс Владимир Ромашкин лемсэ «Торама» фольклорной ансамблянь моротнень, содавтомс Тавлань налкшкетнень теемань мастер-классонть ды невтемс эсь ёрокчинть раськень налксематнесэ.

– Минек музейсэнть ули раськень ойме. Паряк, те кармавтыяк самс тей инжетнень, – корты Пётр Рябов.
Бути кортамс инжетнеде, тей сакшныть эрьва кодамо иесэ ломанть. Пек паро, иеде иес тей сакшныть седе ламо эйкакшт. Сынст мельс тукшны аволь ансяк сонсь кудось-музеесь, сонзэ перька аштиця чувтонь скульптуратнень марто этно-паркоськак, конась пурназель-теезель «Кой», «Вейсэнь ундокст», «Тавлань лишме» ды лия чувто ланга керсицятнень фестивальтнень ютавтома шкасто. Улить тесэ покш нурямоткак, конатне эсь виенть варчамо тердить эрьванть.
Улить экспонатт, конатне кепедить инжетнень мельёжост. Истятнэнь ютксо «Одирьвань паресь». Ламот эйстэнк содыть, мезе те истямось? Монь койсэ, аламот. Ней уш велетнесэяк кармасть стувтовомо икелень шкань койтне. «Одирьвань паресь» – мирденень лисиця тейтеренть ули-парозо. Седикеле ульнесь истямо кой. Бути семиясонть чачиль тейтерне, тетянтень эстензэ эрявсь теемс сонзэ ули-паронть (приданоенть) туртов горобия. Горобиясь – те парь, конась теезь пекшестэ, келезэ метрашка ды сэрезэ истя жо малав метра эли аламодо седе ламо. Паренть перька теезь керсевкст, конатне кортыть свалшкань эрямодо, ды орнаментэнть вельде ёвтавить паронь арсемат сы шкань семиянтень.

Музеень алкуксонь азорава

Раиса Васильевна Водясова – «Этно-кудо» музеень азорава, инжень вастыця, тесэнь историянть ды койтнень-кирдатнень марто содавтыця. Сон музеенть лангаяк весементь ёвтнесы, тесэнь эрицятнень эрямодонтькак ламо соды: кода велесь эрясь кезэрень шкатнестэ, мезе паксясо-пиресэ кастсть, кода виресь идесь эйсэст куш кодамо зыяндо ды вачочиде. Сон кува ёвтни, кува морояк серьгеди, стихсэяк кортазеви. Превей, ёроков. Зяро соды минек Мордовиянть историясто, эрзятнень ды мокшотнень седикелень эрямосто. Ды лиякс а кода. Раиса Васильевна ламо иеть алтась школасо важодемантень, эйкакштненень содамочитнень максомантень. Ансяк Пакся Тавласо школанть пекстызь, ды зярыя иес авась кадовкшнось тевтеме. Варчнинзе виензэ ламосо, конаськак аволь сонзэ. Ды ансяк музеесь сонзэ, мерят, вельмевтизе. Тесэ сонзэ содамочитне ды ёрокчись панжовсть одс. Ды вечкевикс тевесь кармась эрямонь тевекс.

«Торамась терди»

Кода уш тешкставсь икеле, В.И. Ромашкин лемсэ «Этно-кудось» ней содавикс весе масторонть келес. Тей инжеть ардыть эрьва ёндо: Москов, Санкт-Петербург, Удмуртия, Марий Эл, Башкирия, Татарстан, Осетия, Казахстан, Петропавловск-Камчатский… Сеедьстэ сакшныть омбо масторонь инжетькак: Эстониясто, Венгриясто, Финляндиясто…
«Этно-кудонть» юрсо уш зярыя иень перть ютавтневить эрьва кодат вастовомат, фестивальть, кенярксов мероприятият. Седе содавикстнэ эйстэст: «Кулдор-Калдор» пейдемань кенярксчись, эрьва ие Владимир Ромашкинэнь чачома чистэ – сентябрянь 6-це чистэ – «Торамась терди» раськень моронь фестивалесь, «Тюштянь налксемат» раськень спортонь фестивалесь, «Вейсэнь ундокст», «Кой», «Тавлань лишме» чувто ланга керсицятнень фестивальтне ды ламо лиятне.

– Садо инжекс, весемеде ёвтнетяно, весементь невтьсынек. Музеесь минек свалшкане одкстомтови, ламолгавтови од, лия ёнов а молиця экспонатсо. Минек тесэ алкукс раськень культурань ды койтнень ванстома тарка, – кемексты Пётр Рябов.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».