Эйдень кужось – те аволь ансяк тарка, косо эйкакшонть туртов максовить содамочить, те евксонь мастор, косо ракшатне ды нармушкатне кортыть ломанень кельсэ, косо эрьва чистэ лиснить дивань тевть, косо воспитателесь, теке тиринь ава, вадяшатанзат пря ланга ды евты теть лембе валт…
Аволь умок минь ульнинек инжекс Саранскоень 90 № эйдень кужосо, косо теевинек содавиксэкс эсь тевест парсте содыця, ероков ды эряза важодицятнень марто. Сынь евтнесть тенек, кода молить тевтне те эйдень кужосонть. Васенцекс кортынек старшей группань воспитателенть, эрзянь аванть Елена Павловна Афанасьева марто.
Елена Павловна весе пингензэ алты эйкакш марто важодемантень. Те эрзянь авась чачсь Чаунзабуень Покш Маризь велесэ. Тетязо-авазо велень ломанельть, важодсть колхозсо. Авазо – скалонь потявтыцякс, тетязо – трактористэкс. Кемень иень школанть прядомадо мейле од тейтересь тусь тонавтнеме Саранскоев Н.П. Огарев лемсэ МГУ-нь филологиянь факультетэв. Вузонть прядомадо мейле направлениянь коряс кучизь важодеме Покш Березникень райононь Гарт велень школав, косо комсь иеть тонавтсь рузонь кель ды литература.
– Эйкакш марто важодемась саи эрямосон покш тарка. Мон уш ней а содангак, кода те роботамс лия енкссо. Сюкпря евтан Мария Петровна Артаеванень – школасо эрзянь келень тонавтыцянтень. Сонзэ лангс ванозь, монгак кочкия педагогиканть. Ледстяви, кода минь бажинек куш мейсэяк кенярдовтомс тонавтыцянть: кандомс стака сумканзо, шлямс-нардамс эсенек классонть, валномс вальмалангсо аштиця цецятнень… Минь ловинек сонзэ тиринь авакс. Нейгак мельсэ кирдян школасо важодемань васенце читнень – эйсэнь ульнесь апокш талнома, ансяк кода совинь классонтень, неинь эйкакштнень сельмест, лембе мизолксост, секе жо шкастонть весе мелявкстнэ стувтовсть. Ушодынь важодеме шожда седейсэ, – евтни Елена Павловна.
Комсь иень перть авась мирдензэ марто эрясть колхозонь пельде максозь кудосо. Елена Павловнань мирдезэ истя жо прядызе университетэнть, тонавтнесь Аграрной институтсо агрономокс. Самай студентэкс улемстэ од ломантне теевсть содавиксэкс, ютксост кирвазсь вечкема.
– Тевесь лиссь студентэнь стройотрядсо улемстэ. Ледстяви, советской шкане вузонь весе студенттнэ эрьва кизэ пурнавилинек вейсэ. Те шканть перть отрядтнэсэ лакась пси важодема. Чокшне ланга минь, од ломантне, свал пурнавилинек толпандянь перька, цератне налксильть гитарасо эли жо гармониясо, тейтертне морыльть. Вейке истямо чокшнестэ минь вастовинекак мирдень марто. Шкань ютазь налксинек свадьба, университетэнть прядомадо мейле вейсэ сынек эрямо районов. Тосо жо чачсть кавто тейтерьканок, – корты авась.
Шкань ютазь Гарт велень школанть пекстызь, тонавтыцятнестэ ламот ютасть важодеме шабра велень школав, Елена Павловна семиянзо марто састь эрямо Саранскоев. Авась арсесь поладомс важодеме школасо, ансяк таркат арасельть. Секскак варчизе прянзо воспитателекс. Важодеманзо ушодызе 121 № эйдень кужосо, мейле тердизь важодеме 90 № эйдень кужов.
– Те эйдень кужосонть важодян 18 иеде ламо. Коллективесь минек покш, эрятано ояксчисэ. Мезесь кенярдовты – ютксонок важодить ламо од ломанть. Улемс воспитателекс – тевесь аволь шожда, тесэ эряви призвания. Бути сон арась, эйкакштне тень сеске чарькодьсызь. Койсэнь, минек коллективсэнть важодить алкуксонь профессионалт. Зярдо сынь важодеме кужонтень, карминь ветямо эйкакштнень туртов «Баягине» эрзянь келень ды культурань коряс кружок. Эряви меремс, те кружоконтень эйдетне якить покш мельспаросо. Весе вейсэ минь тонавтнетяно мазый келенть, раськень культуранть, койтнень-кирдатнень. Эйкакштненень вечкеви тонавтнемс эрзянь моротнень, стихтнень ды евтнематнень. Программась, конась ветяви эйдетнень туртов, шожда ды мельстуиця. Эрьва занятиясь – те содамочинь масторов путешествия. Бажан евтнемс эйкакштнень туртов эрзянь фольклордонть ды мифологиядонть. Ней уш эрьвась вадрясто содасы, кить истят Вирьавась ды Ведьавась, косо чачсь Куйгорожось ды кодат тантей каванямкат раськень кенярксчитнес пидесть-пансть минек покштятне-бабатне. Эйкакштне мельспаросо тонавтнить келенть. Минек эрьва занятиясь ушодови тиринь кельсэ шумбракстнемасто, седе тов евтатано эште зярыя валрисьметь эрзянь кельсэ. Мейле поладан ловномо стихть, евтнемат, лиясто невтян тенст презентацият. Эйдень кужосо ютавтовиця раськень кенярксчитнестэ свал бажатано анокстамс эрзянь кельсэ пелькске. Эйкакштне марто моратано морот, налксетяно сценкат, теньсэ седеяк кемекстатано содамочитнень. Вадря, минек эйдень кужосонть ютавтови истямо покш важодема эрзянь-мокшонь кельтнень ды культуранть ванстомаст коряс. Те тонавты эйкакштнень кемекстамс чачома енксонтень вечкеманть, – евтни воспитателесь.
Елена Павловна тешксты, сонзэ эрямозо а улевель бу истямо маней, бути сон а кочкавлизе вечкевикс важодеманть. Воспитателенть эрьва чизэ ушодови эйдетнень марто кортамосто. Эйкакштне евтнесызь весе мельспарост ды мелявксост. Эрьвась бажи пачтямс омбоце аваст туртов, кода ушодовсь сонзэ валскезэ, мезе рамасть тензэ тетязо-авазо эли кодамо тев лиссь мартонзо эйдень кужов ютамсто… Самай неть седейшкавань кортамотне, лембе кутмордамотне кемекстыть ды покшолгавтыть Елена Павловнань важодемантень вечкеманзо.
Седе тов кортынек Мария Сергеевна Абайкина марто. Тейтерьавась важоди те эйдень кужосонть колмоце ие. Чачома тарказо – Ковылкинань райононь Русское Вечкенино велесь. Сон мокшава. Школань прядомадо мейле сась тонавтнеме Саранскоев М.Е. Евсевьев лемсэ МГПУ-в. Васняяк получась дошкольной образованиянь специальность, седе тов тонавтнесь вишка классонь тонавтыцякс.
– Важодема ким ушодовсь Саранскоень 125№ эйдень кужосо. Седе тов ютынь роботамо тей. Мельсэ кирдян, кода вастымизь тесэнь важодицятне – эрьвась бажась тень лездамс. Колмо иень перть ульнесь эрьва мезе: кода кенярксов чить, истя нусманят. Ансяк стакачитненень эзь изняво важодемантень вечкемась. Арсян, тевесь эйдетнесэ. Эдь самай сынь лездытькак стувтомс весе мелявкстнэнь. Мон важодян седе покшкетнень марто. Теде башка, ветян мокшонь келень коряс кружок. Койсэнь, эйкакштненень вишка порасто саезь эряви содамс тиринь енксонь культуранть, кельтнень. Эсень важодемасон бажан евтнемс эйдетнень туртов, кода минек республикасо ванстовить кельтне, культурась ды койтне. Вишкинетне мельспаросо чопавтить содамочинь масторонтень. Ламот сынст ютксо рузт, ансяк мокшонь келенть тонавтнемась сынст а тандавтни. Занятиятнень прявт смустест – эйдетне марявлизь келенть ды ушодовольть кортамо эйсэнзэ. Чарькодеви, те лувось лезды ванстомс минек культурань сюпавчинть, – евтни Мария Сергеевна.
Эряви евтамс, неень шкань педагогтне свал тевс нолдыть лия енов а молиця методикатнень ды практикатнень, конатне кепедить эйкакштнень мелест тонавтнемс келенть ды раськень культуранть. Весе одонть воспитательтне саить Интернетстэ. Ней сон васенце лездыця тонавтыцятнень туртов. Неень шкань эйкакштне пек мобильнойть, уш нейке весень кедьсэ гаджетт-телефонт, секскак педагогонтень эряви арсемс, кодамо лувсо анокстамс тонавтомань программанть, штобу дивавтомс эйдетнень.
Алена Артемьева
Фототне 90 № эйдень кужонть.