Январень 21-це чистэ Эрзянь ды мокшонь раскень культурань музейсэ панжовсь Мордовиясо ды сонзэ томбале содавикс викшницянть, эрзянь аванть Надежда Ильинична Володинань выставказо. Сонзэ лемесь – «Суре вельде викшнезь койтне», корты ламодо. Васняяк, ашо коцтонть ланга якстере тюсонь суренть вельде мазыйстэ невтевить эрзятнень кезэрень койтне. Выставкань ваныцятне несызь, кодат тевень вечкицят ды кедьчелькевть ульнесть минек раськень ломантне.
Покш смусть путсь Надежда Ильинична церань, авань, тейтерень, эйдень оршамопельтнень викшнемстэ. Истя жо выставкасонть улить ламо чамапацят, эрьгень кирькст, мазылгавтозь тодов лангакст, кескавт, сюлгамот, пулайть ды истя седе тов.
Тешкстасынек, выставканть анокстыцязо – Мордовия Республикань Раськень творчествань кудось вейсэ Эрзянь ды мокшонь раськень культурань музеенть марто. Сонзэ панжомсто ветицясь нурькинестэ пачтясь Надежда Ильиничнань эрямо кидензэ.
Минь, «Эрзянь правда» газетань лопатнесэ, аволь весть сермадынек сонзэ ерокчидензэ ды сеть выставкатнеде, косо невтевсть важодевксэнзэ. Истямо невтемась, зярдо вейке таркас пурназь ансяк сонзэ викшневксэнзэ, республикасонок ютавтови васенцеде. Ванат тейтерьавань ды церань викшнезь мазыйдеяк мазый оршамопельтнень лангс ды арсезеват, косто саевить вийть ды шка те ламо эйкакшонь триця, аволь уш од авантень весе тень теемга.
Тень коряс Надежда Ильинична макссь тенек истямо толковамо: «Минек раськесэ ульнесть ламо викшницят-кодыцят, ревень ды лия ракшань кедьстэ эрьва мезень теицят».
Аволь ансяк эсест велень, весе Ицялонь райононть келес стамонь ды викшнемань коряс ульнесь ероковокс авазо – Роза Ильинична. Сонзэ ланга ламоксть сермадсть райгазетасо, неть публикациятнень те шкас вансты тейтерезэ Надежда Володина.
Сеть умонь шкатнестэ, чокшне ланга, кудоютконь тевтнень прядомадо мейле, авазо таргилизе стамонь машинканзо ды ушодыль эйкакшонзо туртов мазый панаронь, платиянь стамо. Самай сестэ, эште вишка тейтерькакс улемстэ, аванзо вакссо аштемстэ, сон тонадсь викшнеме-кодамо.
Истя лиссь эрямосонзо, школань прядомадо мейле сон кармась тонавтнеме медучилищасо. Теде мейле колоньгемень вете иеть важодсь Орданьбуень райбольницясо медсестракс. Куш эрямонь тевекс кочкизе медицинанть, викшнемань-стамонь ерокчинть свал кирдсь мельсэнзэ ды явсь тензэ покштояк покш мель. Юткошкасто свал ловнось, тонавтнесь, ванкшнось эрявикс литература, штобу эрьва важодевксэнть топавтомс видестэ, кезэрень койтнень-кирдатнень мельс саезь. Бажась викшнемс истя, кода те тевенть топавтсть умонь шкасто малавиксэнзэ. А манявомга, артовксонть сон васня путсы конев лангс, ансяк теде мейле суре марто салмукссо карми пештямо тешкстазь тарканть. Виде, те важодемась саи ламо шка, эдь кудоютконь тевтне велесэ певтеметь.
Ледстясынек, сынь мирдензэ марто трясть-кастсть вейксэ эйкакшт, конатнень ютксто вететне – саезь.
Эйкакштне ды нуцькатне истят жо ероковт, ансяк эрьвась эсензэ тевсэ. Невтемакс, Евгений цераст эрямонь тевекс кочкизе спортонть. Сон – единоборствань коряс тренер. Теде башка ули вечкевикс хоббизэ – машты кшнистэ эрьва мезень тееме ды кедьстэ (кожа) теевкстнэяк сонзэ велявтыть лиятнень енов а молиця изделиякс.
Неень шкане Надежда Ильинична весе маштоманзо бажи максомс кемготово нуцькатненень ды правнуцькантень, сонзэ тевенть поладыцятненень. Весе сынь аштить покш каштанчисэ аваст ды бабаст кувалма.
Тешкстасынек, Надежда Володина викшневксэнзэ марто аволь весть ульнесь республикань, регионъютконь, весероссиянь фестивальтнесэ ды выставкатнесэ. Сонзэ важодевксэнзэ улить Пензань, Самарань областень, Красноярской краень ды Чувашия Республикань башка ломантнень коллекциятнесэ. Санкт-Петербург ошонь Антропологиянь ды этнографиянь музейсэ («Кунсткармерасо»). Вана ней сынь невтевить Саранскоень Эрзянь ды мокшонь культурань музейсэ.
Выставканть панжома чистэнть ламо лембе валт ды паронь арсемат Надежда Ильиничнань лемс евтасть Мордовия Республикань Раськень творчествань кудонь прявтонь тевтнень топавтыцясь Ольга Дашкина, Эрзянь ды мокшонь культурань музеень прявтось Надежда Баулина, Н.П. Огарев лемсэ МГУ-нь Раськень культурань институтонь тонавтыцясь, историянь наукань кандидатось Вера Ковалева, трудонь ветеранось, валморонь сермадыцясь Римма Жегалина, эрзянь содавикс поэтессась, общественной тевдеицясь Маризь Кемаль (Раиса Кемайкина) ды малавиксэнзэ.
Мелень витемань музыкальной казне марто ды поздоровонь евтамо сакшнось тиринь Орданьбуень Низовка велень «Цековне» ансамблясь.
Тешкстасынек, выставкась карми важодеме февралень 20-це чис.
Выставкадонть мельть-арсемат
Тамара Баргова, РФ-нь Писателень вейсэндявксос совицясь:
– Надежда Ильиничнань мазый ды мельстуиця шкинеманзо марто вастовомась тагояк невтизе: кодамо сюпав ды валдо те ломаненть оймезэ. Умок уш минь содатано вейке-вейкенек, теке мерят патят-сазорт мартонзо. Те свал истя эрси, зярдо лиянь оймесь теть малавикс, валдо. Кадык чуродо весть кортатанояк, малавиксчись свал эжди. Те лембенть таго мария музейсэяк. Надежда Ильинична – Пазонь ломань. Сон трясь-кастсь ламо эйкакшт, кудораськезэ – прясто пильгс поладксозо. Те валдо уцяска, теке марто сюпав ды пародо пешксе эрямо. Мелезэнь тусть седейстэ молиця, валдо сельведте пешксе валонзо-арсеманзо, конатнень евтынзе сон те вастоманть панжомсто: «Весенень арсян шумбрачи...» Сонзэ валтнэ пачкодить Пазонь пилес, тесэ кавтолдомс а эряви.
Татьяна Рябова, РФ-нь Журналистэнь вейсэндявксос совицясь:
– Монень пек вечкевить эрзянь-мокшонь викшнезь оршамопельтне. Монськак мельспаросо яван шка те кезэрень тевентень. Аволь весть савкшнось неемс Надежда Володинань башка викшневксэнзэ, а вана ней тень прась уцяска неемс сынст вейс пурназь. Тестэ мон рединь покштояк покш мазычи, ерокчи, а онкставиця путозь вийть!
Те чистэнть поздоровонь евтамо аваст ды сырькаест туртов састь эйкакшонзо ды нуцьканзо, кить седеяк мазылгавтызь мелень витиця вастовоманть.
Валентина Юдина