Эрзянь келенть, культуранть ды койтнень-кирдатнень вечкемась Анастасия Симаконь (тейтерькс Бояркинань) чачсь уш вишка шкасто. Тейтеренть натой ванстовсь фотозояк, косо сон Саранск ошонь Культурань кудонь сцена лангсо эрзякс моры лавсень моро. Се шкастонть сонензэ ульнесть ансяк сисем иеть.
Культурасо важодемась
Анастасия чачсь Кочкурбуень Од Пурня велесэ. Тетязо-авазо – велень ломанть, кавонест эрзят. Тетязо, Анатолий Максимович, эрямонзо перть важоди водителекс. Юткошкасто седи гармониясо. Сон натой тиринь велень ансамблянь гармонистэкскак ульнесь. Авазо, Мария Дмитриевна, МР-нь культурань заслуженной роботник, весе эрямонзо алтызе велень клубсо важодемантень. 1983 иестэ саезь ды пенсияс лисемс важодсь Од Пурня велень «Гайги вайгель» народной фольклорной ансамблянь прявтокс. Эряви меремс, Бояркинтнэнь весе семияст музыкальной. Настянь лелязояк од шкасто налксиль гармошкасо, лиясто морсиль сцена лангсо.
Школасо тонавтнемстэяк Настя ульнесь пек активноекс. Покш классо тонавтниця тейтерькатнень марто эрьва кенярксчинтень путнесть раськень киштемат, нурькине сценкат, невтнесть концертт.
Школань прядомадо мейле од тейтересь кочкизе Н.П. Огарев лемсэ МГУ-нь филологиянь факультетэнть, косо мельспаросо тонавтнесь тиринь ды омбо масторонь кельтнень, историянть ды философиянть. Филологиядо башка сонензэ вечкевсь юриспруденциясь, секскак сон заочна прядызе юридической факультетэнть.
Университеттэ мейле кармась важодеме Республикань Раськень творчествань кудосо эрзянь-мокшонь раськень шкинемань отделэнь ведущей методистэкс.
– Истя лиссь, эйкакш пингестэ саезь башка мель явинь раськень культурантень. Секскак тонавтнемадо мейле кувать эзинь арсе, ков молян роботамо, – корты Анастасия.
Тейтерьаванть важодемазо кеместэ сюлмавозь республикасо ютавтовиця раськень творчествань кенярксчитнень марто.
– Минь анокстатано истят мероприятиятнень, кода «Шумбрат, Мордовия!» раськень творчествань фестивалесь ды региональной лия покш кенярксчитне. Теде башка, покш важодема ветяви методической енкссонть, коллегатнень марто свал сермадтано статьят, ардтнетяно республикань районтнэва, ваннотано, кода лиятне важодить, лездатано куш мейсэ, – евтни авась.
Важодеманзо коряс Анастасия ламо ардтни эрьва кодамо мероприятиява, прими участия куш кодамо проектсэ. Савкшнось улемс лия регионсояк. Истя, 2025 иестэ якась Московов. Тосо ютавтовсь «ЭтНИК: кадры решают» весероссиянь проектэнь колмоце этапось, ков минек героинясь понгсь эсь важодемасо покш ерокчинь невтемань кисэ.
– Те проектэсь аштесь колмо этапсто. Васенцесь ютавтовсь онлайн вельде. Весе участниктненень, сындест ульнесть малав 800 ломанть, эрявсь топавтомс зярыя заданият: ваномс тематической видеороликть, седе тов сынст коряс теемс ламо тестт. Сеть, кить вадрясто топавтызь сынст, ютасть омбоце этапов, конась ульнесь Россиянь колмо ошсо – Санкт-Петербургсо, Астраханьсэ ды Казаньсэ. Мон понгинь Казанев. Омбоце этапонь вешематнень коряс эрявсь кочкамс эсеть туртов куратор ды зярыя ковонь перть анокстамс мартонзо лия енов а молиця теварсевкс. Монь кураторокс ульнесь Марий Элэнь «Культурно-информационный центр «ИНТЕЛЛЕКТУАЛ» АНО-нь прявтось, проектной менеджерэсь, этноблогерэсь Эльвира Куклина. Авась сон пек ероков, дока, ламос чарькодиця. Пек шожда ды мельспаро ульнесь мартонзо важодемс. Вейсэ сермадынек «Межрегиональный молодежный фестиваль национальных культур «Оймень гайть» проект. Сон лиссь мелень салыця, алтавсь минек масторонь сеть од ломантнень туртов, кить мелявтыть эсь тиринь раськест ды культураст кисэ. Жюринтень мельс тусь минек проектэсь. Специалисттнэнь кармавтомаст коряс кураторонть марто натой анокстакшнынек сонзэ ПФКИ-в. Вейке баллдо тенек эзь лисе изнямс, – евтни Анастасия Симак.
Седе тов, вадря проектэнь сермадомань кисэ, тейтерьаванть тердизь Московов, косо ютавтовсь колмоце меельце этапось. Тов Мордовиясто, Анастасиядо башка, якасть Николай Берсенев, Ольга Дорофеева ды Оксана Белкина ероков од ломантне.
– Колмоце этапось сехте мельстуицяль, эдь минь недлянь перть тонавтнинек М.В. Ломоносов лемсэ МГУ-нь филологиянь факультетсэ. Эряви евтамс, мартонок важодсть покш профессионалт, Россиясо содавикс историкть, философт ды политикань лидерт. Саемга, пек вечкевсть Владимир Зоринэнь лекциянзо. Те – содавикс историк, кунсолат эйсэнзэ, маряви, тонськак понгат сеть шкатнес, конатнеде кортави. Тонавтнемадонть башка минь якинек Россиянь Общественной палатав экскурсияв. Приминек участия проектэнь лувсо участниктнень туртов конференциянь анокстамосо, тосояк эрявсь невтемс эсь профессиональной ерокчинть. Проектэнь меельце чистэнть весе участниктнень туртов явшесть важодемань квалификациянь кастомадо сертификатт. Монь койсэ, истят вастовоматне казить а стувтовикс ежомарямот, од содамочить ды ояксчинь кеме сюлмот, – корты тейтерьавась.
Эряви евтамс, 2025 иестэ, те проекттэнть башка, Анастасия ульнесь ламо лия мероприятиясо. Истя, майстэ сон якась Московов, косо В.Д. Поленов лемсэ Раськень творчествань кудосо ютавтовсь раськеютконь конференция, косо сон коллеганзо марто евтнесь тиринь Мордовиядонть. Теке жо иень кизэстэнть ульнесь Зубово-Полянань районсо, косо важодсь фольклорно-этнографической экспедициясь.
– Истят экспедициятне Мордовиясо ютавтовить свалшкане. Московсто сакшныть культурасо важодиця федеральной экспертт, историкть, методистт, конатне евтнить эсь важодемадост. Минь жо содавттано сынст Мордовиянь историянть, эриця раськетнень, сынст келест ды культураст марто. Истя, зярыя чинь перть ютавтови покш важодема, чачить вейсэнь од проектт, – евтни Анастасия Симак.
Семиясь – кеме неже
Анастасиянь туртов сехте покш уцяскась – вечкевикс семиязо. Сергей мирдензэ марто трить-кастыть колмо церынькат. Сынь – ламо эйкакшонь триця семия.
– Лован эсь прям уцяскавокс, Пазось казсь тень колмо шумбра ды шкинемав эйкакшт. Сехте покшось – Вова, сонензэ 12 иеть, пек вечксы музыканть. Мельспаросо яки музыкальной училищав, косо тонавтни налксеме баянсо. Омбоцесь – Денис, сонензэ 10 иеть, истя жо яви мель музыкантень, налкси фортепианасо. Сехте вишкинесь – Артемка, сонензэ топодсть 5 иеть, кочкизе художественной гимнастиканть. Эрьванть эсензэ обуцязо, эсензэ ерокчизэ, теньсэ эйсэнек кенярдовтытькак, – тешксты авась.
Анастасия мельспаросо, эйкакшонзо истя жо явить покш мель культурантень, вечкить музыканть. Юткошкасто сонськак вечки морсеме. Седе сеедьстэ моры эрзянь эли рузонь народной морот, эстрадансетне сонензэ а вечкевить. Корты, народной моротнесэ невтеви тиринь раськенть весе сюпавчизэ.
– Лиясто понгат кодамояк мероприятияс, ушодыть кевкстнеметь: мейсэ невтеви тонь раськенть оймезэ?! Мон апак кавтолдо кортан – тиринь кельсэ моротнесэ. Ды серьгедян эрзянь моро. Кунсолыцятне дивсить моронть мазычинтень. Койсэнь, раськень эрьва морось евтни кодамояк история, – корты Анастасия.
Кода уш тешкстынек икеле, Анастасиянь кудораськесэ весе вечкить морамо. Секскак сынст ули вадря кой: эрьва кенярксчистэ пурнавить вейс ды гармошкань седямонь мельга морсить седей токиця морот. Арсетяно, те коесь пек паро, эдь Симактнень семиясо улить сонзэ поладыцянзо.
Алена Артемьева