2026 иенть Россиянь Президентэсь Владимир Путин яволявтызе Россиянь Раськетнень вейсэндявомань иекс. Тень коряс Республикань Культурань кудосо ютась покш кенярксчи – те иенть панжомась. Тей сакшность инжеть эрьва районсто, ульнесть школань тонавтницят, студентт, СВО-нь участникть ды трудонь ветерант.
Лембе вал марто пурнавозтненень пшкадсь МР-нь Прявтось Артем Здунов. Сон тешкстызе: масторонок историясо ульнесть эрьва кодат стака шкат, зярдо яттнэ каявсть минек олячинть лангс, ансяк весе неть каявоматне беряньстэ прядовсть. «Россиянть марто а мезть тюремс. Минь – ламо раськетнень эйстэ – вейкине раське, улить вейсэнь духовной питнейчинек, конат ванстовить пингеде-пингес», – мерсь Артем Здунов.
Раськетнень вейсэндявомань иесь невти минек вейсэндявоманть, масторонь вандынь чинть кисэ вейсэнь ответственностенть. Самай неть мельтне-арсематне аштить маласо кемень иетнес раськень государственной политикань од Стратегиянть юрсо. Ледстясынек, те документэнть кемекстызе Россиянь Президентэсь, сон тешксты раськень политикань юртнэнь: гражданской вейкетьксчинь кемекстамонть, раськетнень этнокультурной койтнень виевгавтоманть, раськетнень ды религиятнень ютксо чарькодемань топавтоманть, истя жо общественной сэтьмечинь кастоманть.
Иень панжомасонть ульнесь «Ассамблея народов России» Весероссиянь общественно-государственной организациянь прявтонь полавтыцясь Назиржон Абдуганиев. Сон евтась шумбракстнемань валт Россиянь раськетнень Ассамблеянь прявтонть Владимир Васильевень пельде: «Евтан поздоровт Россиянь Раськетнень вейсэндявомань иенть панжоманзо кувалма. Кеман, сон карми эште вейке эскельксэкс эрзянь ды мокшонь моданть лангсо сэтьмечинть ды чарькодеманть кемекстамосо. Мордовиясо Вейсэндявомань иесь ушодовсь эрзянь, мокшонь, татаронь кельтнень ды литературань коряс олимпиадатнестэ. Ды те а стяко, эдь келесь – раськень ойме. Минек покш сюпавчинек – вейке-вейкенень мелень явомась, культурань вейсэнь лувось. Залсонть ламо од ломанть, СВО-нь участникть – тынк кувалма кирдтяно каштанчи, Отечествантень служамось ашти минек туртов невтемакс. Весенень, седе пек од ломантненень, эряви чарькодемс, минь эрятано вейке покш семиясо, косо стака шкасто свал ули лездамо».
СВО-нь участникесь, «Авангард» учебно-методической центрань прявтось Сергей Абедкин мерсь: «Раськетнень вейсэндявомась – сехте питней, мезе ули масторсонть. Россиясо эрить 190-де ламо раськеть. Сехте стака шкатнестэ сынь вейсэндявильть вейс – Россиянь раськес. СВО-со ульнинь ротань прявтокс, мон аштинь вейке стройсэ Мордовиянь, Татарстанонь, Чувашиянь, Марий Элэнь цератнень марто. Окоптнесэ арасть раськеть – тосо тон Россиянь кис тюриця».
Паронь арсемат евтась Эрзянь ды мокшонь раськень регионъютконь общественной вейсэндявксонь прявтось Юрий Мишанин.
Весе инжетнень туртов невтезель мазыйдеяк мазый концерт, сонзэ анокстызь Саранскоень ды республикань районтнэнь артисттнэ.
Анокстызе
Татьяна Маторкина.